Josua 17

Däm Staum Manasse sien Deel

1See trocken daut Loss fa dän Staum Manasse, Josef sienen ieeschtjebuarnen Sän. Un opp Gilead, dee een stoakja Kjrieja un een Sän von Machir, däm ieeschtjebuarnen Sän von Manasse wia, follen Gilead un Baschan. 2Opp Manasse siene aundre Nokomen foll daut Loss uk no äare Volkjsgruppen: fa Abieser siene Nokomen, fa Helek siene Nokomen, fa Asriel siene Nokomen, fa Sichem siene Nokomen, fa Hefer siene Nokomen, un fa Schemida siene Nokomen. Dit sent de Mana no äare Volkjsgruppen, von Josef sienen Sän Manasse siene Nokomen. #Rech 6,11.24; 8,32

3Oba Zelofhad, Hefer sien Sän, dee Gilead sien Sän, Machir sien Grootsän, un Manasse sien Uagrootsän wia, haud kjeene Säns, bloos Dajchta; un äare Nomes wieren: Machla, Noa, Hogla, Milka un Tirza. #4Mo 26,33; 27,1-8; 36,1-12 4Dise jinjen no däm Priesta Eleasar un no Josua, Nun sienen Sän, un de Staumleida un säden: De Har haft derch Moses aunjeordnet, ons daut Oafgoot mank onse Breeda to jäwen. Un Josua jehorcht däm Harn sien Wuat un behaundeld an bie de Launt Vedeelunk krakjt soo aus äaren Voda siene Breeda. 5Soo jeef daut opp Manasse tieen Deelen, buta daut Launt Gilead un Baschan, aun de oostne Sied vom Jordan; 6De Frues von Manasse siene Nokomen kjrieejen äa Oafgoot mank de Mana. Daut Launt Gilead oba wort Manasse siene aundre Nokomen toojedeelt.

7De Jrens von Manasse wia von Asser aun no Michmetat, waut von Sichem nom Oosten licht, un dan jeit de Jrens rajchtsch no de Enwona von En Tapuach. 8Daut Launt runt om Tapuach jehieed Manasse, oba de Staut Tapuach jehieed to Efraim. 9Von doa jeit de Jrens rauf velenjd dän Riefa Kana, un aun de siedne Kaunt Riefa, jehieren de Städa to Efraim medden mank de Städa von Manasse. Aun de nuadne Kaunt Riefa jeit de Jrens fa Manasse wieda bat aum Mäa. 10Nom Sieden han jehieed daut to Efraim, un nom Nuaden han to Manasse. Un daut Mäa es de Wastjrens. Em Nuaden rieekjt Manasse bat aun Asser, un em Oosten bat aun Isachar.

11En de beid Launtstekja von Asser un Isachar, jehieeden eenje Städa met äare aunligjende Darpa toop to Manasse: Bet Schean met de Darpa toop, Jibleam met de Darpa toop, un de Enwona von Dor un de Darpa, un dee von Endor un de Darpa, dee von Taanach un de Darpa, un dee von Megiddo un de Darpa met de dree Boaj toop. #(11 un 12) Rech 1,27-28 12De Mana von Manasse kunnen dise Städa oba nich ennämen, un soo bleewen de Kanaanita en dise Jäajent wonen. 13Aus de Israeliten stoakja worden, bedwungen see de Kanaanita Sklowenoabeit to doonen; oba see vedreewen dee nich. #Jos 16,10

De Stam von Josef bekloagen sikj bie Josua

14Dan säden de Nokomen von Josef to Josua: Wuarom hast du ons bie de Launt Vedeelunk bloos dän Deel fa eenen Staum jejäft? Wie sent doch een grootet Volkj, wiels de Har ons soo jesäajent haft. 15Josua auntwuad an: Wan jie soon grootet Volkj sent, daut junt daut Boajlaunt en Efraim to enj es, dan trakjt no de Boaj em Woolt, de Perisita un Refaita äa Launt, un doot junt daut utroden. 16De Nokomen von Josef oba säden: Daut Boajlaunt woat nich jenuach Rum fa ons haben, un unjen opp daut jlikje Launt wonen de Kanaanita. Dee haben äwaraul iesane Kaumf Woages, dee waut en de Jäajent von Bet Schean sent, uk dee waut opp daut jlikje Launt von Jesreel wonen. 17Dan säd Josua to de Nokomen von Josef, de Mana von Efraim un Manasse: Jie sent een grootet Volkj, un wiels jie soo stoakj sent, traft junt uk nich bloos een Deel. 18Daut Boajlaunt waut met Woolt bewossen es, saul junt sennen. Dän Woolt kjenn jie utroden un nieet Launt jewennen. Un jie woaren uk de Kanaanita vedriewen, wan see uk iesane Woages haben, wiels jie woaren stoakja sennen aus see.

Currently Selected:

Josua 17: PB

Highlight

Copy

Compare