Josua 13

Gott deit de Vedeelunk von daut Launt aunordnen

1Aus Josua ieescht gaunz oolt wia, säd de Har to am: Du best gaunz oolt jeworden, un doa fält noch een grootet Deel von daut Launt entonämen. 2Daut gaunze Launt von de Filista em Sieden, un em Nuaden daut gaunze Launt von de Geschurita. #1Sam 27,8 3Dit Launt rieekjt von Schihor, de ägiptische Jrens, bat Ekron em Nuaden. Dise gaunze Launtstriep woat to de Kanaanita jeräakjent un doa bowen wieren de Lendarieen von de Filista äare fief Volkjsleida: Gaza, Aschdod, Aschkelon, Gat un Ekron, un de Hiwita äa Launt em Sieden. 4Un wieda jehieed doatoo noch de Kanaanita äa gaunzet Launt von Meara, waut de Sidonia jehieet, bat de Staut Afek, bat aun de Jrens von de Amorita. 5Uk daut Launt von de Gebalita un de gaunze Libanon nom Oosten von Baal Gad aum Boajch Hermon, bat doa, wua daut no Hamat jeit. 6Aul de Sidonia, waut opp de Boaj wonen, vom Libanon aun bat Misrefot Majim, well ekj ver de Israeliten ut daut Launt rutjoagen. Vedeel daut gaunze Launt nu doawäajen aul derch daut Loss mank de Israeliten, soo aus ekj die jesajcht hab. 7Deel dit Launt nu aus Oafgoot en unja de näajen Stam un dän haulwen Staum Manasse. 8De aundra haulwa Staum Manasse un de Stam Ruben un Gad hauden äaren Aundeel aum Launt aul aun de oostne Sied vom Jordan jekjräajen, wiels Moses, däm Harn sien Deena, haud an dit Launt toojedeelt: #Jos 13,32 9Von Aroer aum Raunt von daut Arnon Tol, un de Staut medden em Tol, un daut gaunze huage Launtstekj von Medeba bat Dibon 10un aule Städa von däm Amorita Kjennich Sihon, waut en Heschbon rejieed, bat aun de Amonita äare Jrens, 11un daut Launtstekj Gilead, un daut Launt von Geschur un Maacha un de gaunze Hermon Boajch un daut gaunze Launtstekj Baschan bat Salcha. #5Mo 3,14; 2Sam 3,3; 15,8 12Däm Kjennich Og von Baschan sien gaunzet Rikj, dee en Aschtarot un Edrei rejieed, de latsta waut noch von de Riesen aufstaumd. Moses haud an besiecht un vedräwen. 13De Enwona von Geschur un Maacha hauden de Israeliten oba nich vedräwen; de Geschurita un Maachatita wonden beid medden mank de Israeliten bat disen Dach. 14Bloos däm Staum Levi jeef hee kjeenen Aundeel aum Launt, wiels däm Harn, Israel äaren Gott, siene Fiaopfa jehieeden an; hee selfst es äa Oafgoot, soo aus hee an daut toojesajcht haft. #1Mo 49,5; 4Mo 18,20-21; Jos 13,33

Däm Staum Ruben sien Oafgoot

15Daut ieeschte haud Moses de Volkjsgruppen ut däm Staum Ruben äa Launt toojedeelt. #(15-32) 4Mo 32,33-42; 1Mo 49,3 16Un daut rieekjt von Aroer aum Raunt von daut Arnon Tol, un de Staut medden em Tol nom Nuaden äwa daut gaunze huage Launtstekj bat Medeba 17un wieda bat Heschbon. Opp dit Launtstekj ligjen de Städa Dibon, Bamot Baal, Bet Baal Meon, 18Jahaz, Kedemot, Mefaat, 19Kirjatajim, Sibma, Zeret Schahar opp däm Boajch aun de oostne Sied vom Jordan, 20Bet Peor, un wua daut boajopp jeit no Pisga un Bet Jeschimot 21un aul de Städa opp daut huage Launt. Daut rieekjt äwa daut gaunze Launt waut de Amorita Kjennich Sihon, dee en Heschbon rejieed, verhäa enne Macht haud, un däm Moses met de midianische Volkjsleida Ewi, Rekem, Zur, Hur un Reba, waut en däm Kjennich Sihon sien Launt wonden, un am biestunden, toop besiejd. 22Buta de aundre dootjeschloagne, hauden de Israeliten uk noch dän Woasaja Bieleam, Beor sienen Sän, met däm Schwieet dootjemoakt. #4Mo 22,5; 31,8 23De Wastjrens von däm Staum Ruben wia de Jordan. Aul dise Städa met äare Darpa jehieeden däm Staum Ruben met siene Volkjsgruppen aus Oafgoot.

Däm Staum Gad sien Oafgoot

24Däm Staum Gad met siene Volkjsgruppen jeef Moses daut Launt nom Nuaden han: 25Jaser un aule Städa opp daut Launtstekj Gilead un daut haulwe Launt von de Amonita bat Aroer, waut nom Oosten von Raba licht. 26Un von Heschbon bat Ramat Mizpe un Betonim un von Mahanajim bat de Jäajent von Lo Dabar. 27Un en de läaje Launtschoft Bet Haram, Bet Nimra, Sukkot un Zafon, daut äwajebläwne von däm Kjennich Sihon von Heschbon sien Rikj, de Jordan un daut Launt bat aun daut Enj von däm See Kinneret, aun de oostne Sied Jordan. 28Aul dise Städa met äare Darpa jehieeden däm Staum Gad met siene Volkjsgruppen aus Oafgoot.

Däm haulwen Staum Manasse em Oosten, sien Oafgoot

29De Volkjsgruppen von dän haulwen Staum Manasse jeef Moses aus äa Oafgoot: 30Daut gaunze Baschan, von Mahanajim, daut gaunze Rikj von däm Kjennich Og, von Baschan, un doatoo de 60 Siedlungen waut Machir sien Sän Jair enjenomen haud. #Jos 17,1; Rech 10,3-4 31De haulwe Volkjsgrupp von Manasse sienen Sän Machir, siene Nokomen, wort daut haulwe Launtstekj Gilead met de Städa Aschtarot un Edrei, de Kjennichstäda von däm Kjennich Og von Baschan, toojedeelt.

32Aul dise Lendarieen von de Moabita äare Stapen en daut Jordantol aun de oostne Sied von Jericho, haud Moses de tweeunhaulf Stam aus Oafgoot toojedeelt. 33Oba däm Staum Levi jeef Moses kjeen Launt aus Oafgoot, wiels de Har, Israel äa Gott, es selfst äa Oafgoot, soo aus hee an daut toojesajcht haft. #Jos 13,14

Currently Selected:

Josua 13: PB

Highlight

Copy

Compare