Jeremia 8
8
Jräwa woaren vestieet woaren
1Un dan, sajcht de Har, woaren de Knoakes von de Kjennichs von Juda, un de Knoakes von siene Leidasch, de Knoakes von de Priesta un Profeeten, un de Knoakes von dee, dee en Jerusalem wonen, ut äare Jräwa rutjeschmäten woaren. 2Dee woaren unja de Sonn un de Mon un daut himlische Häa, daut see jleichten un daut see aunjebät haben, vestreit sennen. See randen dee hinjaraun un fruagen dee no Help un veieeden dee. De Knoakes woaren nich wada toopjeläst ooda begroft woaren; dee woaren aus Mest oppe Stap ligjen bliewen. #5Mo 4,19
3Un dee, dee dan noch opp de veschiedne Städen äwajebläwen sent, wua ekj dise schlajchte Menschen han vestat hab, woaren sikj aula dän Doot wenschen leewa aus daut Läwen, sajcht de Har, dee aules rejieet.
Sind woat bestroft
4Saj an, dit es waut de Har sajcht:
Wan eena dolfelt, steit dee nich wada opp?
Wan eena sikj vebiestat, finjt dee sikj nich wada trigj?
5Wuarom sent de Lied en Jerusalem oba,
en eent wajch opp däm Errwajch?
See bliewen bie daut, waut nuscht es,
un wäaren sikj fa trigj komen.
6Ekj hab jehorcht, un ekj hieed,
daut see nich de Woarheit räden.
Kjeena steit siene Sinden too,
un sajcht: Waut hab ekj bloos jedonen!
Aula ranen see äaren Wajch,
aus een Hinjst em Kjrich, dee nich opptohoolen es.
7De Storch enne Loft nemt sikj Tiet toom brooden;
un de Duw, de Kronkje, un daut Schwaulemkje,
komen pinkjlich jieda Joa trigj,
oba mien Volkj recht sikj nich,
no waut de Har enjefieet haft. #Jes 1,3
8Woo kjenn jie sajen: “Wie haben Weisheit,
Wie haben däm Harn siene Väaschreften”?
wan de Schriewa, met äare Utlaj,
daut gaunz vedreit haben.
9June jelieede woaren sikj schämen motten;
dee woaren stutzen, un woaren faustjenomen woaren.
Woo kjennen see Vestentnis wieda jäwen,
wan see däm Harn sien Wuat veschmäten haben?
10Doawäajen woa ekj äare Frues aundre äwajäwen,
un woa äare Flekja dee jäwen, waut an vejoagen,
wiels de oame un de rikje sent bloos aula hinjaraun,
no waut see nich vedeent haben,
un Profeeten un de Priesta
räden aula, waut nich soo es. #Jes 56,11; Jer 6,13-15
11Dee sent jlikjeltich met de Wunden en mien Volkj
un haben an beschwicht met:
“Dit es nich waut schlemmet”,
wan daut doch schlemm es.
12Daut es eene Schaund, waut dee jedonen haben;
daut es oppscheislich, woo dee läwden.
Doch see schämden sikj nich,
un vestunden nich emol root to woaren;
nu woaren see faulen, met dee waut faulen.
Wan ekj an strofen woa,
woaren see enne Grunt komen,
sajcht de Har.
13Ekj woa an derchdraschen, sajcht de Har,
bat kjeene Wiendruwen aun de Rank bliewen,
un kjeene Fiejen aun de Fiejenbeem sent,
un aule Bläda vedrieejen.
Aules waut ekj an jeef, woat wajchjenomen woaren.
14Wuarom sett wie noch emma?
Well wie aula en de Städa met Mieren gonen,
un doa ons Enj aufluaren.
De Har ons Gott lat ons omkomen;
hee haft ons waut jeftjet to drinkjen jejäft,
wiels wie ons ver am vesindicht haben. #Jer 9,14
15Wie wenschten ons waut goodet,
oba nuscht goodet es jekomen;
wie wenschten, daut sull bäta gonen,
oba nu mott wie ons grulen. #Jer 14,19
16En Dan schnuwen äare Pieed aul;
wan dee äare Hinjsten schrieen,
scheddat daut gaunze Launt.
Dee pieekjen derch daut Launt,
un nämen de Städa un de Menschen en,
bat nuscht jebläwen es. #Jer 4,15
17Horcht emol, ekj woa Schlangen mank junt schekjen,
soone waut jie nich bezeibren woaren;
dee woaren junt bieten,
sajcht de Har.
Woo schwoa daut fa Jeremia es
18Enne Städ Freid, hab ekj Trua;
mie es de Moot veschort. #Jer 4,19
19Horcht emol, von wiet un breet em Launt
schricht mien Volkj un frajcht:
“Es de Har nich mea en Zion?
Es de Kjennich nich mea doa?”
Un ekj saj: Wuarom trotz jie mie met Aufjetta,
un met framde Jetta, dee nuscht sent.
20Jie sajen: “De Arnt es vebie,
un de Somma es derch,
un wie haben kjeene Help jekjräajen.”
21Ekj sie jebroaken,
wiels mien Volkj vebroaken es;
ekj trua un weet mie nich Rot.
22Es en Gilead nuscht toom enschmäaren?
Es doa kjeen Dokta to haben?
Ooda wuarom es mien scheenet Volkj
nich jeheelt worden? #Jer 46,11
23Ekj wensch mien Kopp wia eene Wotakjwal,
un miene Uagen jeewen een Stroom Tronen,
daut ekj Dach un Nacht hielen kunn,
äwa dee waut von mien Volkj omjebrocht sent. #Jer 13,17; Luk 19,41
Currently Selected:
Jeremia 8: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
