Jeremia 40
40
Jeremia blift en Juda
1Dit es de Norecht, dee Jeremia vom Harn kjrieech, aus Nebusaradan, de väaschta von de Wajchta, am en Rama funk. Jeremia wia uk faustjenomen un en een Spaunsel jehoolen un wajchjefieet, met dee waut en Jerusalem un Juda faustjenomen worden un no Babel jenomen sullen. #Jer 39,11-14 2De väaschta von de Wajchta leet Jeremia no sikj holen un säd to am: De Har, dee dien Gott es, leet em verut sajen, daut hee disen Schoden opp dise Staut brinjen wudd. 3Un nu haft hee daut loten soo utkomen aus hee säd. Dit es opp junt jekomen, wiels jie jäajen däm Harn jesindicht haben, un haben nich no daut jehorcht, waut hee säd. 4Un nu lot ekj die hia vondoag frie von daut Spaunsel, waut om diene Henj wia. Wan du west, dan kaust du met mie no Babel trakjen. Wan du kjemst, dan woa ekj fa die oppkomen. Wan du nich west met mie no Babel komen, dan lot ekj daut toch. Du kaust irjent wua en daut gaunze Launt bliewen, un doahan gonen, wua die daut jankat un jefelt. #Jer 39,12 5Wan du hia bie dit Volkj blifst, dan kaust du no Gedalja gonen, dän de babelonischa Kjennich äwa de Städa von Juda jesat haft, ooda krakjt doahan wua du west. Un de väaschta von de Wajchta jeef am waut Väarot, daut hee to äten haud, un leet am gonen. #(5 un 6) Jer 39,14 6Un soo kjeem Jeremia no Mizpa no Gedalja, Ahikam sien Sän, un bleef bie am met daut Volkj, waut em Launt äwajebläwen wia.
De niea Leida steit en Jefoa
7Doa wieren noch waut Soldoten un äare Leidasch em Launt en Juda. Aus dee hieeden daut de babelonischa Kjennich haud Gedalja, Ahikam sien Sän, äwa daut Launt un de Enwona un de oame em Launt jesat, äwa aul dee, dee nich no Babel wajchjenomen wieren, #2Kjen 25,22-24 8kjeemen see no Mizpa no Gedalja. Doa wieren Jischmael, Netanja sien Sän, Johanan un Jonatan, Kareach siene Säns, Seraja, Tanhumet sien Sän, Efai von Netofa siene Säns, un Jaasanja von Maacha, un äare Mana. #Jer 41,1.11 9Un Gedalja, dee Ahikam sien Sän un Schafan sien Grootsän wia, vespruak an opp eenen Eit, daut see sikj nich enjsten brukten, wan see unja de Chaldäa läwen wudden. Hee säd, see sullen em Launt bliewen, un daut an daut wudd goot gonen, wan see deeden waut de babelonischa Kjennich velangd. 10Jie kjennen seenen, daut ekj hia en Mizpa bliew un woa met de Chaldäa äare aunjestalde räden, dee häa komen. Un jie kjennen Wiendruwen un Fiejen un Eelj arnten un en june Dinja hoolen, un jie kjennen en june Städa, woone jie enjenomen haben, bliewen. 11Dan hieeden de Menschen von Juda, waut no Moab, Amon un Edom un aule aundre Lenda jetrocken wieren, daut de Kjennich von Babel eenje Menschen en Juda äwajeloten haud, un daut Gedalja, Ahikam sien Sän, un Schafan sien Grootsän, äwa dee aunjestalt wia. 12Un dan kjeemen dee von aul de Städa wua see vestreit wieren, trigj no Juda un no Gedalja en Mizpa. Un see kjrieejen eene goode Arnt von Wiendruwen un Frucht von de Beem.
13Dan om een stoot, kjeemen Johanan, Kareach sien Sän, un de aundre, waut Leidasch enne Armee oppem Launt jewast wieren, no Gedalja en Mizpa, 14un säden to am: Weetst du uk, daut Baalis, de Amonita Kjennich haft Jischmael, Netanja sien Sän, berät daut hee die ombrinjen saul? Oba Gedalja, Ahikam sien Sän, jleewd an daut nich. 15Dan jinkj Johanan, Kareach sien Sän, em stellen no Gedalja en Mizpa, un säd hee wull Jischmael, Netanja sien Sän, aufschaufen, soo daut kjeena daut enwort. Hee wull nich haben daut Gedalja omkomen sull, un aul dee waut met am em Launt wieren vestreit worden, un de Menschen von Juda waut noch äwajebläwen wieren, omkjeemen. 16Oba Gedalja, Ahikam sien Sän, leet Johanan daut nich. Hee säd, daut wia nich soo waut Johanan von Jischmael säd.
Currently Selected:
Jeremia 40: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
