Jeremia 35
35
Een Väabilt von Jehuarsom
1En dee Tiet aus Jojakim, Josia sien Sän, Kjennich en Juda wia, kjrieech Jeremia dise Norecht vom Harn: #2Kjen 23,34 2Go emol no de Rechabita un saj an, see sellen met die nom Tempel komen. Nemm an en eene von de Stowen aun de Butawaunt vom Tempel un beed dee doa Wien aun to drinkjen. #1Chr 2,55 3Un ekj jinkj un brocht Jaasanja, un siene Breeda un äare Säns un aul de Rechabita nom Tempel. Jaasanja wia Jirmeja sien Sän, un Habazinja sien Grootsän. 4Un oppem Tempelhoff fieed ekj an no de Stow, woone Hanan siene Säns jehieed. Hanan wia Jigdalja, de Gottesmaun, sien Sän, un de Stow wia biesied de Volkjsleidasch äare Stow, un bowa Maaseja siene Stow. Maaseja wia Schalum sien Sän, un wia de Wajchta fa de Tempelpuaten. 5Un ekj stald de Rechabita waut Kuffels väa un uk Krucken voll Wien, un säd see sullen Wien drinkjen.
6Oba see neemen dän nich. See säden: Wie drinkjen kjeen Wien. Jonadab, Rechab sien Sän, haft ons jesajcht: Jie un june Nokomen sellen nienich Wien drinkjen, #2Kjen 10,15 7jie sellen junt nich Hiesa buen, jie sellen kjeen Sot seien, un jie sellen kjeenen Wiengoaden aunplaunten ooda ieejnen. Jie sellen jun gaunzet Läwen en Zelten wonen, daut jie lang en daut Launt läwen kjennen wua jie romwaundren. 8Wie hoolen ons en aules, aun daut waut ons Voda Jonadab, Rechab sien Sän jesajcht haft. Un doawäajen drinkj wie niemols en ons Läwen Wien, nich wie un uk nich onse Frues ooda Kjinja. 9Wie buen nich Hiesa toom doabennen wonen, un haben kjeene Wiengoades ooda Flekja ooda Sot. 10Wie wonen en Zelten, un doonen aules soo aus ons Staumvoda Jonadab ons daut väajesajcht haft. 11Bloos aus de babelonischa Kjennich, Nebukadnezar, met siene Armee met Mana von Chaldäa un Aram, aunfunk dit Launt entonämen, säd wie ons, wie wudden no Jerusalem trakjen. Daut es woo wie nu en Jerusalem wonen.
12Un dan kjrieech Jeremia dise Norecht vom Harn: 13Dit es waut de Har, dee aules rejieet, un Israel äa Gott es, sajcht: Go froag de Mana von Juda un dee waut en Jerusalem wonen, auf see nich wellen Lia aufnämen un daut jehorchen, waut ekj aus Har saj. 14Lang trigj säd Jonadab, Rechab sien Sän, daut en siene Famielje sull kjeena Wien drinkjen, un see hoolen sikj aun daut bat oppem vondoagschen Dach, un drinkjen kjeen Wien. Oba ekj hab junt emma wada sajen loten, un jie horchen nich no mie. #Jer 25,4 15Ekj hab junt emma wada aul dee Profeeten, dee mie deenen, jeschekjt, daut dee junt säden, jie sullen omwenjen von dän beesen Wajch, dän jie läwen. Jie sullen bäta läwen un nich de aundre Jetta hinjaraun gonen un dee deenen, soo daut jie lang en daut Launt läwen bliewen kunnen, woont ekj junt un june Vodasch jejäft hab. Oba jie wullen doa nich no horchen un haben nich jedonen waut ekj säd. #Mat 23,37 16De Rechabita haben no Jonadab, Rechab sien Sän, jehorcht un siene Jebooten jehoolen, dee hee an jeef, oba jie haben mie nich jehorcht.
17Un doawäajen, sajcht de Har, dee aules rejieet, un Israel äa Gott es: Horcht emol, ekj woa aul daut beese, von woont ekj jerät hab, äwa Juda un de Lied waut en Jerusalem wonen brinjen. Ekj räd to an, un see horchten nich, un ekj roopt an, un see wullen nich auntwuaten. #Jer 7,13-15 18Oba to de Rechabita säd Jeremia: Dit es waut de Har, dee aules rejieet, un Israel äa Gott es, sajcht: Wiels jie junen Staumvoda Jonadab sien Jeboot jehoolen haben, un aules jedonen haben waut hee velangd, 19doawäajen vesprakjt de Har, dee aules rejieet, un Israel äa Gott es: Daut saul nich väakomen daut nich een Maun von Jonadab, Rechab sien Sän, siene Nokomen woat ver mie stonen.
Currently Selected:
Jeremia 35: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
