Jeremia 27
27
Daut Volkj woat em Joch deenen
1Boolt no däm daut Zedekia, Josia sien Sän, en Juda wia Kjennich jeworden, kjrieech Jeremia dise Norecht vom Harn: #2Kjen 24,17-18 2Hee sull sikj een Säl un Joch moaken un daut opp siene Schulren droagen. #Jer 28,10 3Un dan sull hee eene Norecht no däm Kjennich von Edom, däm Kjennich von Moab, däm Kjennich von de Amonita, däm Kjennich von Tierus un däm Kjennich von Sidon schekjen, met de Mana waut von dee Städa no Jerusalem jekomen wieren, no Zedekia, däm Kjennich en Juda. #Jer 25,21-22 4Dise Mana sullen jieda äaren Kjennich sajen: Dit es waut de Har, dee aules rejieet, un Israel äa Gott es, sajcht: Got no june Haren un sajcht an: 5Met groote Krauft un een Oarm, dee nich meed woat, hab ekj de Ieed, un de Menschen un Tieren, dee oppe Ieed sent, jemoakt. Un ekj äwajäw dee krakjt no däm, wäm ekj well. #Jer 32,17 6En dise Tiet hab ekj aul dise Lenda däm Kjennich von Babel, Nebukadnezar, dee mie deent, enne Macht jejäft. Un ekj hab uk de Tieren von oppe Stap fa am hanjestalt. #(6 un 7) Jer 25,9; Jes 45,1-8; Hes 26,7; Dan 2,38 7Aule Velkja sellen am un sienen Sän un sienen Grootsän deenen, bat de Tiet fa äa Launt ut rant. Dan woaren see stoakje Velkja un groote Kjennichs deenen motten.
8Un wan wua een Volkj ooda Kjennichrikj sikj nich woat Nebukadnezar, däm Kjennich von Babel, hanjäwen, un nich woat daut Jenekj unja daut Joch von däm Kjennich von Babel jäwen, dan woa ekj daut Volkj met daut Schwieet un Hungaschnoot un Krankheiten besieekjen, sajcht de Har, bat ekj dee derch siene Macht omjebrocht hab. 9Jie sellen nich no june Profeeten un Woasaja, june Menschen, dee Dreem ooda aundre Tieekjen utlajen, un june Hakjsenmeistasch horchen, wan dee sajen, daut jie nich woaren von däm Kjennich von Babel enjenomen woaren. #Jer 14,13-14 10Dee profezeien waut nich soo es, un wan jie no dee horchen, woa jie wiet von jun Launt wajch jebrocht woaren. Ekj woa junt veschmieten, un jie woaren omkomen. 11Oba daut Volkj, woont sikj daut Jenekj unja daut Joch von däm babelonischen Kjennich schekjen lat, un däm äwa sikj rejieren lat, daut woa ekj en äa ieejnet Launt bliewen loten, daut see daut beoabeiden un bewonen, sajcht de Har.
12Un ekj jinkj un säd Zedekia, däm Kjennich von Juda, aul dit waut de Har jesajcht haud: Lot junt jun Jenekj to daut Joch schekjen, waut de Kjennich von Babel junt opplajcht. Lot am un sien Volkj äwa junt rejieren, un dan woa jie aum Läwen bliewen. 13Wuarom woaren du un dien Volkj von daut Schwieet un Hungaschnoot un Krankheiten stoawen? Oba daut es waut de Har jesajcht haft fa soon Volkj, woont sikj nich to dän babelonischen Kjennich schekjen deit. 14Un horcht nich no de Profeeten, dee to junt sajen: Jie woaren junt nich brucken to dän Kjennich von Babel schekjen. Waut dee sajen, es nich soo. #Jer 14,14 15Ekj hab dee nich jeschekjt, sajcht de Har, un daut es nich soo, waut see en mienen Nomen sajen. Un doawäajen woa ekj junt veschmieten un ombrinjen, beides de Profeeten, un dee waut sikj no äa Wuat rechten.
16Un ekj säd to de Priesta un daut gaunze Volkj, dit es waut de Har sajcht: Horcht nich no dee Profeeten dee junt sajen, daut de Jefässa von däm Harn sien Hus woaren boolt von Babel trigjkomen. Waut dee sajen, es nich soo, #2Chr 36,10; Jer 28,3 17un jie sullen nich no dee horchen. Jie sullen junt to däm Kjennich von Babel schekjen, un dan woa jie läwen. Dise Staut brukt nich eene Wiltnis woaren. 18Wan see werkjlich Profeeten sent un een Wuat vom Harn haben, dan lot an däm Harn, dee aules rejieet, prachren, daut de äwaje Jefässa, dee em Harn sien Hus un en däm Kjennich sien Hus un en Jerusalem sent, nich uk no Babel jenomen woaren. 19De Har, dee aules rejieet, haft noch waut to sajen äwa de groote Past un dän grooten Wotatank, dee see “Daut Mäa” nanden, äwa de Behelta un daut Jereetschoft, waut noch en dise Staut jebläwen sent. #1Kjen 7,15-39; 2Kjen 25,13-17 20Aus Nebukadnezar, de Kjennich von Babel, dän Kjennich von Juda, Jojachin, Jojakim sien Sän, von Jerusalem no Babel wajchfieed, met aul de aundre Rejierungsmana en Juda un Jerusalem, haud hee nich aul dee wieetvolle Sachen ut däm Tempel met jenomen. 21De Har, dee aules rejieet, un Israel äa Gott es, haft waut to sajen, wäajen de Sachen waut em Tempel un en daut Hus von däm Kjennich von Juda un en Jerusalem äwajebläwen sent. 22De Har sajcht, dee woaren uk noch no Babel jefieet woaren, un woaren doa bliewen, bat dän Dach, wan ekj mie om dee bekjemren woa, un dee wada lot no dise Städ trigjbrinjen. #Esra 1,1-11
Currently Selected:
Jeremia 27: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
