Jeremia 16
16
Woo Jeremia läwen saul
1Dit es de Norecht, dee ekj von däm Harn kjrieech: 2Du saust die kjeene Fru nämen, un saust kjeene Kjinja opp dise Städ haben. 3Dit es waut de Har to sajen haft, äwa de Kjinja dee opp dise Städ jebuaren sent, un äwa de Frues un Mana, dee en dit Launt Kjinja haben. 4Dee woaren aun schlemme Krankheiten stoawen, un kjeena woat wäajen an truaren ooda an begrowen. Dee woaren aus Mest oppe Stap ligjen bliewen. Dee woaren derch daut Schwieet omkomen un vehungren, un de Doodes woaren von de Väajel enne Loft un de wille Tieren oppe Stap jefräten woaren. #Jer 9,21
5Dit es waut de Har sajcht: Go nich en een Hus, wua see truaren. Du saust nich met an truaren, ooda an treesten. Ekj hab mienen Fräd von dit Volkj trigjenomen, sajcht de Har, un uk miene truhoatje Leew un Metleet. 6De Aunjeseene un de oame woaren beid omkomen, un dee woaren nich begroft woaren, un kjeena woat äwa an truaren. Kjeena woat sikj wäajen an Wunden moaken ooda dän Kopp kol schäaren toom sien Trua utdrekjen. #3Mo 19,27-28; 5Mo 14,1; Jer 41,5; 47,5; 48,37 7Kjeena woat gonen eene Moltiet brinjen un Troost toospräakjen, wan doa wäa jestorwen es, ooda een Glaus Wien aunbeeden, wäajen däm sienen Voda ooda Mutta wajch es. 8Go en kjeen Hus nenn wua een Fast aufjehoolen woat. Go nich bie dee setten, un doa äten un drinkjen. 9Dit es waut de Har, dee aules rejieet, un Israel äa Gott es, sajcht: Horcht emol, ekj woa opp dise Städ, en june Läwestiet un ver june Uagen, noch een Enj moaken von spossen un lachen, un von oppe Kjast sinjen. #Jer 7,34
10Un wan du aul dit to daut Volkj jesajcht hast, un see die dan froagen: “Wuarom sajcht de Har, daut hee soonen grooten Schoden brinjen woat? Waut hab wie orrajcht jedonen? Met woone Sinden hab wie ons jäajen däm Harn, ons Gott vesindicht?” #(10-13) Jer 5,19 11dan saj an: Daut es wäajen june Elren mie vestaden un no aundre Jetta jinjen. See deenden dee un bäden dee aun un veleeten mie un hilden mien Jesaz nich. 12Un jie doonen, waut noch schlemma es aus daut, waut june Elren deeden. Jie läwen een jiedra no junen ieejenkopjen un beesen Wellen, un horchen nich no mie. #Jer 7,26 13Un doawäajen woa ekj junt ut dit Launt rut joagen, no een Launt woont jie nich, un june Elren nich, jekjant haben. Doa woa jie Dach un Nacht aundre Jetta deenen, un ekj woa junt kjeene Gonst wiesen. #5Mo 28,64
Israel woat trigjkomen
14Doch, sajcht de Har, doa woat eene Tiet komen, dan woa jie nich mea en junen Eit von mie räden, aus “De Har, dee de Israeliten ut Ägipten brocht”, #(14 un 15) Jer 23,7-8 15oba jie woaren räden von “Däm Harn, dee de Israeliten von ut daut nuadne Launt brocht, wua hee an vestat haud.” Ekj saj junt, ekj woa an trigjbrinjen en daut Launt nenn, woont ekj äare Elren jejäft hab.
Woo de Velkja daut gonen woat
16Horcht emol, ekj woa väl Fescha schekjen, sajcht de Har, un dee woaren an feschen. Un no dee, woa ekj väl Jäaja rut schekjen, un dee sellen, oppe Boaj un enne Schluchten un enne Heelen, an jäajren. 17Ekj see aules waut see doonen; mie sent kjeene von an vestoaken. Un äare Sind es nich em diestren jebläwen ver miene Uagen. #Hiob 34,21 18Ekj woa an dobbelt bestrofen fa äa Vegonen un äare Sinden. See haben mien Launt orrein jemoakt met gruselje Jetta, dee soo väl Läwen haben aus de Doodes, un haben daut Launt, waut mie jehieet, met äare oppscheiselje Dinja oppjefelt. #Jes 40,2
Jeremia sien vetruen em Harn
19 Har, du best dee, wäa mie stoakj moakt un Schutz jeft;
bie die sie ekj secha, wan ekj en Trubbel jerod.
Velkja von aulawäajen oppe Ieed,
woaren no die komen un sajen:
Onse Elren hauden bloos
reine Läajes metjekjräajen;
see hauden nuzloose Jetta,
dee nich halpen kunnen.
20Kaun een Mensch daut moaken, waut sien Gott es?
Soont es nich werkjlich een Gott.
21Doawäajen woa ekj an dit mol wiesen,
un an miene Krauft un Jewault feelen loten,
soo daut see enseenen,
daut ekj werkjlich de Har sie. #2Mo 3,15
Currently Selected:
Jeremia 16: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
