Jeremia 13
13
Daut Stekj toom romnämen
1Dit es waut de Har to mie säd: Go emol un kjeep een Stekj Lienzeich, waut du die romnämen kaust, un nemm die daut om. Oba duck daut nich en Wota en. 2Un ekj jinkj, opp daut waut de Har jesajcht haud, un koft mie een Stekj toom romnämen, un neem mie daut om.
3Un de Har säd een tweedet mol to mie: 4Nemm daut Stekj toom romnämen, woont du die jekoft hast, un daut du drajchst, un go no däm Eufrat Riefa un vestäakj daut doa en eenen jespoolden Steen. 5Un ekj jinkj no däm Eufrat Riefa un vestuak daut Stekj toom romnämen, krakjt soo aus de Har mie jesajcht haud. 6Dan no eene lenjre Tiet, säd de Har to mie: Nu go no däm Eufrat Riefa, un hol die daut Stekj toom romnämen, daut ekj die säd, daut du daut doa vestäakjen sust. 7Un ekj jinkj no däm Eufrat Riefa un groof dee Städ no, un neem daut Stekj toom romnämen wada opp, von wua ekj mie daut vestoaken haud. Oba soo aus du die denkjen kaust, wia daut Stekj toom romnämen vedorwen un nich mea to brucken.
8Dan wort mie kloa waut de Har sajen wull, un ekj säd: 9Dit es waut de Har sajcht: Krakjt soo, woa ekj aul daut vekomen loten, met woont Juda un Jerusalem sikj soo väl meenen. 10Dit es een beeset Volkj, un horcht nich no waut ekj saj. Dee läwen no äa ieejenkopjet Väanämen, un gonen no framde Jetta, un kjneeen sikj ver dee, un deenen dee. Nu woaren see soo sennen, aus dit Stekj toom romnämen, daut to nuscht to brucken es. #Jer 11,8 11Krakjt soo aus daut Stekj, waut eena sikj omnemt, sikj aun dän Mensch helt, soo hab ekj, sajcht de Har, aule Israeliten un aul de Lied von Juda, aun mie naun jehoolen. Ekj deed dit soo daut see mien Volkj sennen sullen, un daut ekj sull aunerkjant sennen, un jeloft un jeieet woaren.
De Wienbudlen
12Un dan saj an dit: Dit es waut de Har, dee Israel äa Gott es, sajcht: Jieda Wienbuddel sull voll Wien jefelt sennen. Un dan woaren see to die sajen: Wäa weet daut nich, daut aule Wienbudlen sullen voll Wien jefelt sennen? 13Un dan saj an: Dit es waut de Har sajcht: Horcht emol, ekj woa aul dee, dee en dit Launt wonen, de Kjennichs, dee opp dän Davidstroon setten, de Priesta un de Profeeten, un aule Menschen en Jerusalem, voll un bedrunken moaken. #Jes 51,17; Jer 25,15-28 14Un ekj woa dee eenen jäajen däm aundren schmieten, auf daut Elren ooda Kjinja sent, sajcht de Har, un ekj woa an kjeen Metlieden bewiesen. Mie woat daut nich schod sennen om an, un ekj woa nich nojäwen an to vedoawen.
Eene Woarnunk fa huachmootje
15Horcht emol häa. Doot junt nich too groot,
wiels de Har haft sien Wuat jejäft.
16Ieet däm Harn junen Gott,
ea hee daut lat diesta äwa junt woaren,
un jie em tweediesta oppe Boaj,
junt vestaupen un hanfaulen.
Jie luaren, daut saul dach woaren,
un hee moakt daut diesta fa junt,
un soo daut nuscht to seenen es.
17Wan jie nich horchen woaren,
woa ekj en mie hielen, wiels jie soo prauzich sent.
Miene Uagen woaren dikj woaren,
un miene Tronen sea ranen,
wiels däm Harn siene Häad wajchjefieet woat woaren. #Jer 8,23; 14,17; Luk 19,41
18Saj däm Kjennich un siene Mutta:
Sat junt gaunz läach han,
wiels june straume Kroonen
sent junt von de Kjap jekomen. #2Kjen 24,10-16; Jes 62,3; Kloag 5,16
19De Städa em Sieden sent beloagat;
doa es kjeena, wäa dee raden kaun.
Daut gaunze Juda es wajchjeschlapt;
doa es nuscht jebläwen.
20Kjikjt emol opp. Seet doch
wäa vom Nuaden kjemt.
Waut es met june scheene Lied jeworden,
dee jie leiden sullen?
21Waut woa jie sajen,
wan dee woone jie junt kroagden,
de Macht äwa junt nämen?
Woa jie daut nich beduaren,
aus eene Fru, dee en äare Weeen benomen es?
22Un wan jie junt froagen sullen:
Wuarom es ons dit jeworden?
dan es de Auntwuat: Wiels jie soo väl Sind haben.
Jun Kjleet woat oppjehowen woaren,
un jie woaren en Schaund jebrukt woaren. #Jes 47,2-3; Hes 16,37
23Kaun eena, dee von Kusch kjemt,
siene Hut aundasch moaken,
ooda een Leopard siene Plaken wajchnämen?
Daut wudd junt krakjt soo schwoa sennen
goodet doonen, dee jie en Sind jeeeft sent.
24Ekj woa junt vestreien,
soo aus de Wint vonne Wiltnis
daut Stroo vepitscht.
25Dit es waut jie doafäa kjrieen;
soo woa ekj junt daut toomäten,
sajcht de Har.
Wiels jie mie vejäten haben,
un junt opp Läajes jestett haben,
26woa ekj junt dän Rock opphäwen,
un june Schaund seenen loten,
27woo jie romjeschwient haben,
un aulem hanjekroacht haben,
un woo onveschämt un ontru jie jewast sent,
un soo oppscheislich oppe Humpels un Stapen jewast sent.
Woo saul daut noch met die, Jerusalem,
wan du daut nich oppriemst?
Woo lang saul daut noch dieren?
Currently Selected:
Jeremia 13: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
