Rechta 14
14
Simson well sikj eene Filista Mejal frieen
1Aus Simson emol no daut Filista Darp Timna jinkj, sach hee doa eene Mejal mank de Filista äare Frulied. #Jos 19,43 2Un aus hee trigjkjeem, säd hee to sienen Voda un siene Mutta: Ekj hab en Timna mank de Frulied von de Filista eene Mejal jeseenen; nämt mie dee doch to Fru! 3Sien Voda un siene Mutta oba säden to am: Jeft daut dan mank de Frulied von onse Staumbreeda un en ons gaunzet Volkj kjeene Fru, daut du hangonen motst un die eene Fru von de onbeschnädne Filista nämen? Oba Simson säd to sienen Voda: Nemm mie dise, wiels mie lat dee schmock! #1Mo 34,14; 2Mo 34,16 4Oba sien Voda un siene Mutta wisten daut nich, daut dit vom Harn kjeem; hee socht eene Uasoak jäajen de Filista, waut to dee Tiet de Macht äwa Israel hauden.
5Dan muak Simson sikj met sienen Voda un siene Mutta toop opp dän Wajch no Timna. Un aus see bat aun de Wiengoades von Timna kjeemen, buach Simson vom Wajch auf. Un dan kjeem am plazlich een junga Leiw brellent entjäajen. 6Un däm Harn sien Jeist kjeem äwa am, un hee vereet däm Leiw met kole Henj, soo aus eena een jebrodnet Kosenbockje biem äten en Stekja rieten deit. Hee säd siene Elren daut oba nich, waut hee jedonen haud. 7Un aus hee no Timna kjeem, räd hee met de Mejal, un Simson haud jefaulen aun ar. 8Un no eene wesse Tiet kjeem hee wada, om sikj dee to frieen. Un hinjawäajes buach hee vom Wajch auf, om no däm doodjen Leiw to kjikjen. Un dan wia en daut Knoakenjerest von däm Leiw een Bieennast met Honnich. 9Un hee neem dän Honnich doarut un eet hinjawäajes doavon un jinkj no sienen Voda un siene Mutta un jeef an doavon, un see eeten daut uk; hee säd an oba nich, daut hee däm Honnich ut daut Knoakenjerest von däm Leiw jenomen haud.
Simson sien ieeschtet Probleem met de Filista
10Simson sien Voda jinkj no Timna, om dän Bunt met de Ehe auftoschluten. Un Simson deed doa een Fast aunstalen, soo aus de junge Mana daut to dee Tiet fläajden. 11Un aus de Enwona von Timna am komen sagen, wälden see 30 Bejleitasch, waut bie am sennen sullen. 12Simson oba säd to an: Ekj well junt een Rotsel oppjäwen. Wan jie daut en dise säwen Fastdoag rajcht roden woaren, dan well ekj junt 30 Hamden un 30 Fastkjleeda jäwen. 13Wan jie daut oba nich roden kjennen, sell jie mie 30 Hamden un 30 Fastkjleeda jäwen. Un see säden to am: Jeff ons dien Rotsel opp, wie wellen daut hieren! 14Dan säd Simson to an:
Vom Fräta kjeem Fräten,
vom Stoakjen kjeem seetet.
Un en dree Doag kunnen see am nich de Auntwuat jäwen. 15Aum vieeden Dach säden see to Simson siene Fru: Äwaräd dienen Maun doch, daut hee ons de Leesunk von daut Rotsel sajcht, sest woa wie die un dien Voda sien gaunzet Hus vebrennen. Jie haben ons woll enjelot, om ons oam to moaken? 16Dan hield Simson siene Fru ver am un säd: Die es daut met mie enoolent un best mie goanich mea goot! Du hast de Mana ut mien Volkj een Rotsel oppjejäft un hast mie daut nich jesajcht, waut daut bediet. Hee oba säd to ar: Horch, ekj hab mienen Voda un miene Mutta daut uk nich jesajcht, wuarom sull ekj die daut dan sajen? 17Un see hield jieda Dach soolang aus daut Fast wia, waut see fieeden. Un aum säwenden Dach säd hee ar daut, wiels see soo sea doano oppdrenjen deed. See oba säd de junge Mana ut äa Volkj de Leesunk von daut Rotsel. #Rech 16,16-17 18Doa aum säwenden Dach, ea de Sonn unjajinkj, säden de Mana ut de Staut to am:
Waut es seeta aus Honnich?
Waut es stoakja aus een Leiw?
Hee oba säd to an: Wan jie nich met mien Kaulf jeplieecht hauden, dan haud jie mien Rotsel niemols jerot. 19Un däm Harn sien Jeist kjeem äwa am, un hee jinkj rauf no Aschkelon un schluach 30 Mana von an doot un trock an daut ut, waut see aunhauden. Hee jeef de junge Mana, waut daut Rotsel jerot hauden, dee Kjleeda, un jinkj von doa wuttich trigj no sien Voda sien Hus. 20Simson siene Fru oba wort von äaren Voda däm Brutfiera, eenem von de 30 Bejleitasch jejäft. #Rech 15,2
Currently Selected:
Rechta 14: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.