Jakobus 4

Woarnen ver ontru sennen jäajen Gott

1Wuaderch kjemt soo väl Striet un Kjrich mank junt? Komen dee nich derch de Liedenschoften, dee sikj en junt bennen strieden? 2Jie sent bejierich un kjrieen daut nich. Jie morden un neiden un jewennen nuscht. Jie strieden un kjamfen un haben nich waut jie junt wenschen, wiels jie nich doarom bäden. #Gal 5,15 3Jie bäden un kjrieen daut nich, wiels jie met faulsche Aufsechten bäden. Jie prachren om Sachen, june ieejne Lost to befrädjen.

4Jie ontrue Menschen, weet jie nich, daut Frintschoft met dise Welt Fientschoft jäajen Gott es? Wäa doa wenscht, Frint met dise Welt to sennen, moakt sikj toom Fient met Gott. #Luk 6,26; Reema 8,7; 1Joh 2,15 5Ooda meen jie, doa es nuscht doarhinja wan de Schreft sajcht: Met Iewa woakt Gott äwa dän Jeist, dän hee en ons haft wonen loten? 6Un doabie well hee ons jratre Jnod schenkjen. Doawäajen sajcht hee: “Gott es jäajen dee waut stolt sent, oba dee waut deemootich sent jeft hee Jnod.” #Hiob 22,29; Spr 3,34; Mat 23,12; 1Pet 5,5 7Aulsoo, unjastalt junt Gott. Stalt junt jäajen dän beesen Fient, dan woat hee von junt veschwinjen. #1Pet 5,8-9 8Nodat junt no Gott, dan woat hee uk dicht no junt komen. Jie Sinda, reinicht june Henj. Un jie, dee noch opp twee Sieden stonen, moakt june Hoaten rein. #Jes 1,16; Sach 1,3 9Jie sullen Leet droagen un truaren un hielen. Jie sullen hielen enne Städ von lachen, un truaren enne Städ von junt freien. 10Deemooticht junt ver Gott, dan woat hee junt opprechten. #1Pet 5,6

Nich rechten

11Rät junt unjarenaunda nuscht schlajchtet no, miene Breeda. Wäa schlajcht von sienem Brooda rät un am rechten deit, rät jäajen daut Jesaz un recht daut Jesaz. Wan du daut Jesaz rechten deist, dan best du nich eena, dee daut Jesaz helt, oba een Rechta äwa daut Jesaz. 12Gott auleen es Jesazjäwa un Rechta. Bloos hee kaun seelich moaken un vedaumen. Oba wäa best du, daut du dienen Brooda rechten deist? #Mat 7,1; Reema 14,4

Moak die selfst nich to groot

13Horcht emol häa, jie dee doa sajen: Vondoag ooda morjen well wie en dee ooda dee Staut gonen, een Joa doa bliewen, Haundel driewen un jewennen. #Spr 27,1 14Jie weeten äwahaupt nich waut morjen sennen woat. Waut es jun Läwen? Daut es soo aus wan een Näwel oppkjemt un boolt wada veschwinjt. #Luk 12,20 15Doawäajen sell jie sajen: Wan Gott daut well, dan woa wie läwen un dit un daut doonen. #Apost 18,21; 1Kor 4,19 16Oba jie sent stolt un prauzich. Un daut es nich rajcht. 17Wäa doa weet, goodet to doonen, un deit daut nich, fa dän es daut Sind. #Luk 12,47

Currently Selected:

Jakobus 4: PB

Highlight

Copy

Compare