Jesaja 65
65
De sienje woaren aunjenomen, dee waut jäajenaun sent woaren bestroft woaren
1Ekj wull mie befroagen loten,
von dee waut nuscht fruagen;
ekj wull mie finjen loten,
von dee waut nich no mie sochten.
Ekj säd: Hia sie ekj, hia sie ekj,
to een Volkj, dee mien Nomen nich roopten. #Reema 10,20
2Ekj rieekjt een onjehuarsomet Volkj
dän dachäwa miene Haunt,
dee waut äaren ieejnen Wajch jinjen
un nich opp dän gooden Wajch jinjen. #Reema 10,21
3Daut Volkj trozt mie emma wada
un kjand kjeene Schaund;
see muaken Opfa enne Goades,
un Ruakopfa opp Tieejlen.
4Dee setten en Jräwa,
un bliewen äwa Nacht en Heelen;
see äten Schwiensfleesch,
un vebodnet Fleesch en äare Supp. #3Mo 11,7; Jes 66,17
5See sajen: Bliew wieda auf.
Schia mie nich aun; ekj sie heilja aus du.
Dise Menschen sent mie
aus Ruak enne Näs,
aus een Fia daut dän gaunzen Dach brent.
6Horcht emol, daut steit ver mie jeschräwen:
Ekj woa veräakjnen un nich stell sennen.
Ekj woa an enne Schoot jäwen, waut see vedeent haben
7fa äare Sinden un äare Vodasch äa Vegonen,
sajcht de Har.
See haben oppe Boaj Weiruak jeopfat
un mie doamet beleidicht un jelastat;
ekj woa an enne Schoot jäwen, waut see vedeent haben.
8De Har sajcht:
Soo aus wan de Wiendruwen em Pungel aul jegoaren sent,
un see dan sajen: Vedoaw dee nich, doa es een scheena Säajen bennen,
soo woa ekj nich aules vedoawen,
om dee äat haulwen, dee mie deenen. #Jes 6,13; 1Mo 18,26-32
9Ekj woa Jakob siene Nokomen toonämen loten,
un von Juda, dee waut en miene Boaj wonen.
Dee, woone ekj mie jewält hab, woaren daut kjrieen,
un dee, dee mie deenen, woaren doa aunsiedlen.
10Un dee waut mie sieekjen,
woaren en Scharon äare Häaden weiden
un em Achor Tol äa Vee loagren. #Jos 7,26; Jes 33,9
11Oba jie, dee jie dän Harn dän Rigjen dreien
un von mienen heiljen Boajch vejäten,
dee jie dän Desch oppsaten fa dän Aufgott Gad
un fa Meni toopjegotnen Wien hanstalen,
12junt woa ekj vom Schwieet loten omkomen.
Jie woaren en de Schlacht oppe Kjneeen faulen,
wiels aus ekj roopt, auntwuad jie nich,
un aus ekj räd, horcht jie nich.
Jie deeden, waut ver mie schlajcht es,
un wälden, waut mie nich Freid jeef. #Jes 66,4; Jer 7,13
13Un doawäajen sajcht Gott de Har:
Horcht emol, dee waut mie deenen, woaren äten,
oba jie woaren hungren;
dee waut mie deenen, woaren to drinkjen haben,
oba junt woat darschten.
Dee waut mie deenen, woaren schaftich sennen,
oba jie woaren junt schämen motten. #Jes 55,1
14Dee waut mie deenen, woaren sikj von Hoaten freien,
oba jie woaren ut Vetwiewlunk schrieen
un jaumalich aungonen.
15Miene jewälde woaren junen Nomen brucken,
fa soont, waut eena sikj vewenscht,
un Gott de Har woat junt doot moaken.
Oba dee waut mie deenen, woa ekj eenen aundren Nomen jäwen. #Jes 62,2
16Wäa om eenen Säajen bäden woat,
woat däm truhoatjen Gott doano bäden;
un wäa een Vespräakjen opp eenen Eit jeft,
woat dän bie däm truhoatjen Gott moaken.
De Trubbels, waut an emol enjsten deeden, sent vejäten;
dee sent von ver mie veschwungen. #Jes 19,18; Jer 4,2
Een niea Himmel un eene niee Ieed
17Horcht emol,
ekj moak niee Himmel un eene niee Ieed.
Waut verhäa wia, woat nich mea aun jedocht woaren,
un woat nich mea em Jeräd komen. #Jes 66,22; 2Pet 3,13; Opb 21,1
18Freit junt un siet en eent wajch schaftich,
äwa daut waut ekj moak.
Daut niee Jerusalem, woont ekj moak,
woat väle eene Freid sennen,
un de Lied woaren aundre schaftich moaken. #(18 un 19) Jes 35,10; 25,8; Opb 21,4
19Ekj woa mie to Jerusalem freien
un froo sennen äwa de Lied.
Doa woat kjeen hielen to hieren sennen,
un kjeena woat fa Angst schrieen.
20Daut woat nich mea passieren,
daut een Kjint mau een poa Doag läft;
un de elre woaren kjennen äare Joaren utläwen.
Wäa bie 100 Joa stoaft woat aus een junga talen,
un wäa nich bat 100 läft woat talen
aus bestroft fa siene Sinden. #Sach 8,4
21Dee woaren Hiesa buen un en dee wonen;
see woaren Wiengoades aunplaunten
un von de Frucht äten. #Jes 62,8
22Dee woaren nich buen un een aundra doabennen wonen;
dee woaren nich aunplaunten un een aundra daut äten.
En mien Volkj woaren de Lied soo oolt woaren aus de Beem,
un waut miene jewälde buen, woaren see lang goot brucken kjennen. #5Mo 28,30; Hiob 14,7
23Äare Oabeit woat nich vejäfs sennen
un äare Kjinja woaren nich Schoden lieden.
See woaren unja mienen Säajen sennen
un äare Kjinja woaren bie an bliewen.
24Ea see bäden, woa ekj an auntwuaten;
ea see utjerät haben, woa ekj an jäwen. #Jes 30,19; 58,9
25De Wulf un daut Laum woaren eena biem aundren fräten;
de Leiw woat Stroo fräten soo aus de Oss;
un de Schlangen woaren Ieed fräten.
Opp mienen heiljen Boaj,
woat kjeen schlajchtet sennen
un nuscht vedorwen woaren,
sajcht de Har. #1Mo 3,14; Jes 11,6-9
Currently Selected:
Jesaja 65: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.