Jesaja 6
6
De Har roopt Jesaja toom Profeet sennen
1Daut Joa aus de Kjennich Usija storf, sach ekj däm Harn huach erhowen un opp eenen groosoatjen Troon setten. Un daut unjaschte Enj von sien Rock bedakjt de gaunze Flua vom Tempel. #2Chr 26,22 2Rom am stunden Serafen, dee jieda sas Flichten hauden. Met twee Flichten bedakjten see sikj de Jesechta, met twee bedakjten see sikj äare Feet, un met twee fluagen see. #1Kjen 22,19 3Dee roopten eena nom aundren:
Heilich, heilich, heilich!
es de Har, dee aules rejieet!
De gaunze Welt wiest,
woo harlich hee es! #Opb 4,8
4Un wan dee soo roopten dan scheddad de Schwal, un daut Jebied wia gaunz voll Ruak. #Hes 10,4; Opb 15,8 5Un ekj säd:
Woo saul daut noch met mie!
Dit kunn mien Enj sennen.
Soo aus ekj räd, es nich rajcht,
un ekj sie eena von een Volkj,
dee nich daut rajchte sajen;
oba nu hab ekj met miene Uagen
dän Kjennich jeseenen,
dän Harn, dee aules rejieet. #2Mo 33,20
6Dan fluach eena von de Serafen no mie, un dee haud eene Tang enne Haunt, un en de Tang haud hee een jlieejendet Stekj Gloot, daut hee vom Aultoa jenomen haud. 7Un dee schieed met daut aun miene Leppen naun un säd:
Nu daut dit diene Leppen aunjeschieet haft,
veschwinjt diene Schult von die,
un diene Sinden sent vejäft.
8Un ekj hieed däm Harn waut sajen. Hee säd: Wäm saul ekj schekjen? Wäa woat fa ons gonen?
Un ekj säd: Ekj sie hia. Du kaust mie schekjen.
9Un hee säd: Go saj dise Lied:
Jie woaren daut emma wada hieren,
oba woaren daut nich vestonen;
jie woaren emma wada kjikjen,
oba nich Ensecht kjrieen. #(9 un 10) Mat 13,11-15; Joh 12,40; Apost 28,26-27
10Moak an daut Jewessen stomp
un stopp äare Uaren too un bedakj äare Uagen,
soo daut äare Uagen nich seenen kjennen
un de Uaren nich hieren kjennen
un äa Jewessen nich schauft.
Wan dee schaufen wudden,
wudden see sikj aundasch enstalen
un bäta woaren. #5Mo 29,3; Reema 11,8
11Dan fruach ekj: Opp woo lang, Har?
Un hee säd:
Bat de Städa Schuntklompes jeworden sent,
un doa kjeena mea wont;
bat de Hiesa aula ladich stonen,
un daut Launt wilt vewossen es.
12De Har woat de Menschen wajchfieren,
daut doa väl Städen em Launt onbewont bliewen.
13Un wan een Tieendel äwabliewen,
woat daut Poat uk vebrent woaren.
Oba soo aus doa een Stobben blift
wan een Ieekjenboom ooda Lindenboom doljehakt woat,
woat doa waut äwabliewen.
De Stobben es daut heilje Sot. #Jes 7,3; 10,20-21; Amos 5,3
Currently Selected:
Jesaja 6: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
