Jesaja 34
34
Woo Edom daut gonen woat
1Komt häa, jie Velkja un horcht,
paust opp, jie Lenda, no waut ekj saj;
lot aule Menschen oppe Welt dit hieren,
un lot de Ieed un waut doabennen es fa dit zeijen.
2De Har es veläajen met aule Velkja,
un gaunz foadich äwa äare Armeeen;
hee woat dee venichten un ombrinjen.
3Daut Bloot von äare Doodes woat von de Boaj ranen,
un dee waut stoawen, woaren oppe Stap ligjenbliewen,
bat see wiet un breet stinkjen.
4Dee, dee bowa de Ieed jebeeden, woaren vefaulen,
un waut wie bowa ons seenen,
woat toopjerolt woaren aus eene Buakroll;
dee äare Krauft woat aula vegonen,
soo aus een vewalkjtet Blaut aun de Wienrank,
ooda een drieejet Blaut am Fiejenboom. #Opb 6,13-14
5Wan mien Schwieet ieescht gaunz saut es
von dee, dee bowa de Ieed sent,
dan woat daut opp Edom rauf komen,
daut Volkj woont ekj em Jerecht em Baun jesat hab. #5Mo 32,41-42; Jer 49,7-22
6De Har haft een Schwieet;
un daut rant met Bloot un es met Fat beschmäat;
Bloot von Schop un Kosen un Fat von Nieren von Bakj;
De Har moakt een Opfa en de Staut Bozra,
met eene groote Schlacht en daut Launt Edom.
7De wille Ossen woaren doljeschloagen woaren,
un de junge Stoakjen un stoakje Bolles uk.
Äa Launt woat voll Bloot jetrocken sennen,
un äare Ieed met Fat beschmäat woaren.
8Doa kjemt een Dach, wua de Har bestrofen woat,
un wua hee fa Zion enstonen un trigjtolen woat. #Jes 63,4
9De Riefasch en Edom woaren Täa sennen,
un de Ieed woat Schwäwel sennen;
de Ieed woat brennenda Täa sennen. #1Mo 19,24
10Daut woat Dach un Nacht brennen,
un woat en eent wajch rieekjren.
Daut woat fa aule Tieden drieejet Ollaunt bliewen,
un doa woat niemols wada wäa derch gonen. #Mal 1,4
11Ulen un Boschhunj woaren daut ennämen,
un Hofkjes un Oshakasch woaren doa läwen.
De Har woat doa een Motbaunt äwatrakjen,
daut aules woat vedorwen woaren,
un een Blie Jewicht doa naunhenjen,
daut et to nuscht to brucken es.
12Daut woat nich mea aus een Rikj aunjeseenen woaren,
un doa woaren kjeene sennen toom daut rejieren.
13De Mieren woaren met Distlen bewaussen,
un de Paulausts met Brennartel un Onkrut;
de Wilw un de Ulen woaren sikj doa Tus moaken. #(13 un 14) Jes 13,21-22
14Veschiedne wille Kauten woaren sikj doa trafen,
wille Kosen woaren soo aus beese Jeista eena toom aundren schrieen,
un daut Nacht Jespanst woat sikj doa utreiwen.
15De Feil Schlang woat doa äa Nast moaken
un doa em Schauten äare Eia utbrooden;
un Oshakasch woaren doa
eena met dän aundren rom flieejen.
16Kjikjt junt daut no em Harn sien Buak;
nich eena von dise woat utbliewen,
kjeena woat onen dän aundren sennen.
De Har haft sien Wuat fa dit jejäft,
un sien Jeist brinjt daut aula to Staund. #2Mo 32,32
17Hee haft daut Loss äwa an jeschmäten,
un hee jeft an daut ut siene Haunt;
hee haft daut met däm Motbaunt toojemäten
daut see daut opp emma haben sellen,
un opp aule Tieden doa wonen.
Currently Selected:
Jesaja 34: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
