Hebräa 8
8
Oola un niea Priestadeenst
1De Hauptsach, dee wie to sajen haben, es dit: Wie haben eenen Huagenpriesta, dee em Himmel bie däm Aulmajchtjen sien Troon aun de rajchte Sied sett. #Heb 4,14 2Hee deent doa aus Huagapriesta em Aulaheilichsten, em woaren Aunbädungszelt, daut Gott selfst oppjestalt haft, un nich een Mensch. 3Jieda Priesta woat aunjestalt, Gowen un Opfa to brinjen. Doawäajen must disa uk waut haben, daut hee opfad. 4Wan hee oppe Ieed wudd sennen, wudd hee nich Priesta sennen, wiels doa aul Priesta sent, dee doano opfren aus daut Jesaz daut velangt. 5Waut dee doonen es mau een Schauten un een nomoaken von daut himlische, soo aus Gott Moses daut befool, aus dee daut Zelt opprechten sull. Hee säd: “See doano, daut du aules jeneiw no daut Mosta moaken woascht, daut ekj die opp däm Boajch wiesen deed.” #2Mo 25,40; Kol 2,17
6Nu oba haft Jesus een Aumt jekjräajen, daut soo väl bäta es aus daut oole, wiels daut Tastament, wua hee Vemedla es, bätre Vespräakjungen aus Grunt haft. #Heb 7,22
De oola un de niea Bunt
7Wan daut ieeschte Tastament gaunz tofrädstalent jewast wia, wudd daut nich sennen needich jewast, een tweedet to moaken. 8Oba Gott wia met de Menschen nich tofräd un säd:
“Kjikjt emol, de Tiet kjemt, daut ekj met daut Volkj Israel
un met daut Volkj Juda eenen nieen Bunt moaken woa. #Jer 31,31-34; Heb 10,16-17
9Dee woat nich soo sennen aus dee Bunt, dän ekj met äare Vodasch muak,
aus ekj dee aune Haunt foot un ut Ägipten rut brocht.
Wiels, see sent nich en mienen Bunt jebläwen.
Doawäajen dreid ekj mie von an wajch, säd de Har. #2Mo 19,5-6
10Dit es de Bunt, dän ekj nohäa met daut Volkj Israel moaken woa, sajcht de Har.
Ekj woa an mien Jesaz en äaren Senn jäwen,
un woa an daut en daut Hoat nenn schriewen,
un woa äa Gott sennen,
un see sellen mien Volkj sennen.
11Un kjeena saul sienen Brooda ooda näakjsten mea belieren derwen un sajen:
Lia dän Harn kjanen!
Wiels dee woaren mie aula kjanen
vom kjlansten bat dän jratsten.
12Ekj woa mie äwa an erboarmen,
un woa äare Sinden vejäwen un nich mea doaraun denkjen.”
13Wan hee von “een nieen Bunt” rät, dan meent daut, de ieeschta es oolt jeworden. Un waut äwaellat un utjenuzt es, veschwinjt boolt. #Reema 10,4
Currently Selected:
Hebräa 8: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
