1. Mose 4
4
De Breeda sent sikj oneenich
1Adam un Eva wieren Maun un Fru, un see kjrieejen dän Jung Kain. Eva säd: Ekj hab een Junkje jekjräajen. De Har haft mie doatoo jeholpen. 2Met de Tiet haud see noch een Junkje, un dee heet Abel. Abel wia een Hoad, un Kain deed Launt beoabeiden. 3Dan kjeem doa een Dach, wua Kain däm Harn eene Gow en een Opfa brocht. Hee brocht waut von daut, waut hee opp daut Launt jetrocken haud. #2Mo 23,19 4Abel brocht uk eene Gow fa däm Harn aus een Opfa. Hee brocht, daut baste Stekj von een ieeschtjebuarnet Laum von siene Häad. De Har jleicht Abel, un am jefoll daut Opfa, waut hee jeef, #2Mo 34,19; 3Mo 3,16 5oba Kain un sien Opfa jefoll am nich. Dan stieech Kain de Oaja aun, un am bedrekjt de gaunze Sach. #2Mo 33,19; Heb 11,4 6Dan säd de Har to Kain:
Wuarom sticht die soo de Oaja aun,
un wuarom best du soo bedrekjt?
7Wan du waut goodet väahast,
woascht du doch aunjenomen sennen,
oba wan du nich goodet väahast,
dan luat de Sind no eene Jeläajenheit bie die,
un haft een velangen no die.
Nu motst du doano seenen,
daut du nich von dee metjeräten woascht. #Reema 6,12; Gal 5,17
8Un Kain säd to sienen Brooda, Abel: Komm emol met mie oppe Stap. Un wiels see doa wieren, neem Kain un schluach sienen Brooda doot. #1Joh 3,12.15
9Dan säd de Har to Kain: Wua es dien Brooda Abel? Un Kain säd: Ekj weet nich. Saul ekj no am oppaussen? #1Mo 3,9 10Un de Har säd: Waut hast du jedonen? Du weetst doch, daut dien Brooda sien Bloot von oppe Ieed no mie schricht, daut ekj halpen saul. #Psa 9,13; Mat 23,35; Heb 12,24 11De Ieedboddem, dee dien Brooda sien Bloot oppneem aus du am doot schluachst, haft een Fluch fa die, un woat die Trubbel jäwen. #4Mo 35,33 12Dee woat die nich wada soone Arnt jäwen, wan du dee beakren woascht. Du woascht oppe Ieed romwaundren un schwoa een Tus finjen. 13Un Kain säd: Dise Strof es too groot. 14Du hast mie nich bloos von mien Launt wajch jejoacht, oba uk von die. Ekj woa oppe Ieed romwaundren un schwoa een Tus finjen, un irjentwäa, wäa mie sitt, kunn mie ombrinjen. #Hiob 15,20-24 15Un de Har säd to am: Nä, wan irjentwäa Kain sien Läwen nemt, dee woat säwenmol äwa doafäa bestroft. Un de Har muak een Tieekjen aun Kain, soo daut am nich jrodsoo wäa wudd ombrinjen. #Hes 9,6; Opb 7,3-4 16Un Kain jinkj wieda vom Harn, un wond oosten von Eden en daut Launt Nod.
17Kain neem un befried sikj, un see kjrieejen een Junkje, Henoch. Un Kain bud eene Staut un veneemd dee no sienen Sän, Henoch. 18Un Henoch haud eenen Sän, Irad; un Irad wia de Voda to Mehujael, un Mehujael wia de Voda to Metuschael, un Metuschael wia de Voda to Lamech. 19Lamech haud twee Frues, de eene heet Ada, un de aundre Zilla. 20Ada haud eenen Jung, dee Jabal heet. Dee wia de Voda to aul dee, dee en Zelten wonen un Vee heeden. 21Jabal haud eenen Brooda, dee heet Jubal. Dee wia de Voda to aul dee, dee Zitta un Fleeten spälen. 22Zilla haud eenen Sän Tubal Kain. Dee muak veschiednet von Brons un Iesa. Tubal Kain haud eene Sesta, Naama.
23Lamech säd to siene Frues,
Ada un Zilla: Horcht emol no mie;
miene Frues, paust opp no waut ekj saj.
Ekj hab eenen Maun omjebrocht,
doafäa daut hee mie eene Wund jeef.
Ekj hab eenen jungen Maun omjebrocht,
doafäa daut hee mie schluach.
24Wan fa Kain sien Doot säwenmol wudd trigjetolt sennen,
dan wudd fa Lamech sienen 77 mol. #1Mo 4,15; 3Mo 19,18; 5Mo 32,35; Mat 18,22
25Un Adam un Eva hauden noch eenen Sän un see nanden däm Sett. Eva säd: Gott haft mie eenen Sän en Abel siene Städ jesat, däm Kain doot schluach. 26Un Sett haud eenen Sän un hee nand däm Enosch. Un en dee Tiet fungen Menschen aun däm Harn auntobäden. #1Mo 12,8
Currently Selected:
1. Mose 4: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.