1. Mose 29
29
Jakob un Laban
1Un Jakob reisd wieda un kjeem no de Lied, dee en daut oostne Launt läwen. 2Un hee kjikjt sikj doa rom un sach doa eenen Borm oppe Stap. Un biesied däm Borm wieren dree Häaden von Schop, dee von dän Borm jedrenkjt worden. Doa wia een groota Steen opp däm Borm. 3Un wan de Hoads ieescht kjeemen, rolden see dän Steen wieda un drenkjten äare Schop. Dan rolden see dän Steen trigj oppem Borm. 4Un Jakob säd to de Hoads: Horcht emol, von wua sent jie? Un see säden: Wie sent von Haran. 5Un hee säd: Kjan jie Laban. Sien Voda es Nahor. Un see säden: Jo, wie kjanen däm. #1Mo 24,10.24 6Un hee säd: Woo jeit daut met däm? Un see säden: Däm jeit daut goot. Kjikj doa, daut es siene Dochta Rahel, dee doa met de Schop kjemt. 7Hee säd: Na, daut es je noch lang nich Owent un Tiet toom de Schop nenjoagen. Drenkj de Schop un brinj dee oppe Weid. 8Un dee säden: Wie kjennen noch nich. Wie motten ieescht wachten bat aule Häaden hia sent un dan dän Steen wieda rollen. Dan drenkj wie de Schop.
9Ea see utjerät hauden, kjeem Rahel met äaren Voda siene Schop, dee see heeden deed. 10Aus Jakob Laban siene Dochta Rahel sach, jinkj hee un rold dän Steen vom Borm un drenkjt de Häad dee siene Mutta äa Brooda Laban jehieeden. 11Dan kust Jakob Rahel, un hee hield fa Freid. 12Un Jakob säd Rahel, daut hee Frintschoft wia met äaren Voda, un daut hee Rebecka äa Sän wia. Un Rahel rand un säd äaren Voda daut. 13Aus Laban von siene Sesta äaren Sän Jakob hieed, rand hee am to bejäajnen. Hee drekjt am un kust am, un brocht am no sien Hus. Doa vetald Jakob am aules waut am jeworden wia.
14Un Laban säd: Gaunz kloa best du miene Sesta äa Sän. Un Jakob bleef doa eene Moonat. 15Un Laban säd to Jakob: Wan du uk mien Frintschoft best, sust du doawäajen onen Vedeenst fa mie schaufen? Saj emol, waut saul ekj die doafäa jäwen? 16Laban haud twee Dajchta. De elre heet Lea un de jinjre Rahel. 17Lea haud wieekjelje Uagen. Rahel leet daut gaunz un goa sea schmock. 18Jakob wia Rahel sea goot, un hee säd: Ekj woa säwen Joa fa die schaufen fa diene Dochta Rahel. 19Un Laban säd: Ekj wudd die dee leewa loten aus irjent eenen aundren. Bliew hia bie mie.
20Dan bleef Jakob doa dee säwen Joa, daut hee kunn Rahel frieen. Am kjeem de Tiet no een poa Doag väa, wiels hee ar soo goot wia. 21Dan säd Jakob to Laban: Lot mie Rahel frieen. Ekj hab dee säwen Joa jedeent. 22Un Laban lod aul siene Nobasch en un reed een Fast ut. 23Oba dän Owent jeef hee am Lea un Jakob schleep met ar. 24Laban jeef siene Kjäakjsche Silpa no Lea toom ar bedeenen. 25Un zemorjes wort Jakob daut kloa, daut hee sikj met Lea befriet haud. Un Jakob säd to Laban: Waut hast du jedonen? Ekj schauft je dee Joaren fa Rahel. Wuarom hast du mie hinjat Licht jefieet? 26Un Laban säd: Soo hab wie daut hia nich, daut wie de jinjre ea aus de elre befrieen loten. 27Wacht bat dise Kjastinjswäakj äwa es, un dan jäw wie die de aundre, wan du vesprakjst säwen Joa fa dee to schaufen. #1Mo 31,14-15 28Jakob wia envestonen doamet, un hee luad bat de Wäakj derch wia. Dan jeef Laban am uk Rahel. Un Rahel wia uk Jakob siene Fru. 29Laban jeef siene Kjäakjsche Bilha no Rahel, daut see ar bedeend. 30Dan schleep Jakob uk met Rahel. Jakob jleicht Rahel dolla aus Lea. Un hee schauft noch eemol säwen Joa fa Laban. #3Mo 18,18
Jakob siene Kjinja
31Aus de Har sach daut Lea veacht wia, leet hee ar Kjinja haben, oba Rahel haud kjeene. 32Lea kjrieech eenen Sän. See nand am Ruben #29,32 Daut bediet hee sitt un säd: Daut es wiels de Har mien Trubbel jeseenen haft. Nu woat mien Maun mie doch goot sennen. 33See haud noch eenen Sän, dän see Simeon #29,33 Daut bediet hee hieet nand. See säd: De Har haft mie disen Sän uk jejäft, wiels hee jehieet haft daut ekj veacht wia. 34Un toom dredden mol haud see eenen Sän. See säd: Nu woat mien Maun aun mie jebungen sennen, daut ekj am dree Säns jejäft hab. Un see nanden disen Levi. #29,34 Daut bediet vebungen 35Un see haud noch eenen Sän. Un see säd: Dit mol woa ekj däm Harn preisen. Doawäajen nand see am Juda. #29,35 Daut bediet preisen Dan haud see een stoot nich mea Kjinja.
Currently Selected:
1. Mose 29: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
