1. Mose 23
23
Sara woat en Kanaan begroft
1Sara läwd aules toop 127 Joa. 2Sara storf bie Kirjat Arba, daut es Hebron, en Kanaan. Un Abraham hield aus see storf un truad ne Tietlank äwa ar.
3Dan jinkj Abraham en sienen Trua no de Hetita, un säd: 4Ekj won mank junt, un sie oba nich eena von junt jeworden. Lot mie een Stekj Launt kjeepen om mienen Dooden to begrowen. #1Mo 17,8 5De Hetita säden to Abraham: 6Mien Har, horch emol. Gott haft die aus een Leida mank ons hanjestalt. Nu begrow dienen Dooden en irjent eent von onse baste Jräwa. Kjeena von ons woat die aufschuwen ooda hoolen von dienen Dooden opp sien Launt begrowen.
7Un Abraham stunt opp un kjneed sikj ver de Hetita, dee doa em Launt wonden. 8Un hee säd: Wan jie doamet envestonen sent, dan wudd jie een goodet Wuat fa mie enlajen bie Efron, Zohar sien Sän, 9daut hee mie wudd de Heel en Machpela vekjeepen, dee hee ieejent. Daut es je doa oppem Enj von sien Flekj. Lot mie daut hia ver junt foadich moaken, daut ekj am dän vollen Pries doafäa jäw, daut et dan mient es toom mienen Dooden han lajen. 10Efron saut doa mank de Hetita, un hee säd doa to Abraham, soo daut aul dee, dee doa biem Stautspuat sauten, daut hieeden: 11Nä, mien Har. Horch emol. Ekj jäw die daut Flekj, un ekj jäw die de Heel. Hia ver miene Lied jäw ekj die daut. Begrow dienen Dooden doa.
12Dan kjneed Abraham sikj ver de Hetita, 13un säd to Efron, soo daut aule daut hieren kunnen: Horch doch uk no mie. Ekj jäw waut daut Flekj wieet es. Nemm daut von mie, un ekj woa mienen Dooden doa begrowen. 14Un Efron säd: 15Mien Har, lot mie waut sajen. Daut Flekj es 400 Selwastekja wieet. Waut es daut tweschen mie un die? Go un begrow dienen Dooden. 16Abraham wia dän Pries goot, un hee wuach doa ver de Hetita 400 Selwastekja ut, soo aus de Haundelsmana daut doa hauden.
17Soo kjrieech Abraham daut Flekj bie Machpela von Efron. Daut Flekj es oosten von Mamre un haft de Heel un aul de Beem doabowen. 18De Haundel fa daut Launt wort doa ver aul de Hetita jemoakt, dee doa bie äa Stautspuat kjeemen. 19No daut, begrowd Abraham siene Sara en de Heel opp daut Flekj bie Machpela, oosten von Mamre, waut nu Hebron es, en Kanaan. 20Daut Flekj un de Heel doabowen jinkj dan von de Hetita no Abraham, daut et sient wia, toom Doodes begrowen. #1Mo 25,9-10; 47,30; 49,29-32; 50,13
Currently Selected:
1. Mose 23: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.