Esra 5

Hindanisen biem freschen Aunfank vom Tempelbu

1De Profeeten Hagai un Sacharja, Ido sien Sän, profezeiden de Juden waut en Juda un Jerusalem wonden em Nomen von däm Gott en Israel, dee äwa an wia. #Hag 1,1; Sach 1,1 2Dan muaken Serubabel, Schealtiel sien Sän, un Jeschua, Jozadak sien Sän, sikj opp un fungen aun, daut Gotteshus en Jerusalem opptobuen, un Gott siene Profeeten stunden an bie un unjastetten an.

3Boolt doaropp kjeemen Tatenai, de persischa Vewaulta von de Prowins aun de wastne Sied Eufrat, un Schetar Bosnai un äare Metoabeida un fruagen: Wäa haft junt väajesajcht, dit Hus wada opptobuen un de Mieren opptorechten? 4Un see fruagen an uk: Woo heeten de Mana, waut fa disen Bu veauntwuatlich sent? 5Oba Gott haud siene Uagen op äwa de Juden äare Leida, soo daut an nich jehindat wort, bat een Berecht no Darius kjeem un von doa een Breef trigjkjeem. #5Mo 11,12; 1Kjen 8,29

6Dit es de Aufschreft von däm Breef von Tatenai, däm persischen Vewaulta von de Prowins aun de wastne Sied Eufrat, un Schetar Bosnai un äare Metoabeida, de Aumtslied, waut aun de wastne Sied Eufrat wieren, aun dän Kjennich Darius. 7De Berecht, dän see am schekjten, lud soo: Däm Kjennich Darius aulen Fräd! 8Wie haben die to berechten, daut wie en de Jäajent von Juda wieren. Wie sagen daut dort däm grooten Gott sien Hus wada oppjebut wort. De Lied buden met behakte Steena un läden Baulkjes en de Wenj, un de Oabeit waut see deeden jinkj bosich väarewajch. 9Wie oba fruagen de Leida un säden to an: Wäa haft junt väajesajcht, dit Hus to buen un dise Mieren opptorechten? 10Un wie fruagen an uk, woo dee äare Nomes wieren, waut doa veauntwuatlich fa wieren, om dee opptoschriewen un die de Mana äare Nomes to schekjen. 11See oba jeewen ons dit to Auntwuat: Wie sent däm Gott siene Deena, dee Himmel un Ieed jemoakt haft. Un wie buen daut Gotteshus wada opp, waut emol ver väle Joaren hia jestonen haft; waut een groota israelitischa Kjennich oppjebut un foadich jemoakt haud. 12Oba aus onse Vodasch dän Gott em Himmel oajaden, jeef hee an en Nebukadnezar, däm Chaldäa Kjennich von Babel, siene Jewault. Un dee vestieed dit Hus un veschlapt daut Volkj no Babel. #2Kjen 24,10-14; 25,9 13Oba en daut ieeschte Rejierungsjoa von Kierus, dän Kjennich von Babel, jeef de Kjennich Kierus de Aunordnunk, dit Hus wada opptobuen. #Esra 1,1-2 14Hee leet uk daut goldne un selwane Jereetschoft vom Gotteshus, waut Nebukadnezar ut däm Tempel von Jerusalem jenomen un en dän Tempel von Babel jebrocht haud, trigjgonen. De Kjennich Kierus neem ut däm Tempel von Babel un jeef Scheschbazar daut, däm hee aus Vewaulta äwa Juda ensad, #Esra 1,7-8 15un säd to am: Nemm dit Jereetschoft un brinj daut no dän Tempel en Jerusalem, un daut Gotteshus saul opp dän oolen Plauz wada oppjebut woaren. 16Doaropphan kjeem Scheschbazar no Jerusalem un läd daut Fundament fa dän Tempel. Von don aun woat doaraun jebut, oba daut Hus es noch nich foadich. 17Wan däm Kjennich daut jefelt, kaun hee en daut kjennichliche Schauz Hus doano sieekjen loten, auf daut von däm Kjennich Kierus es aunjeordnet worden, dit Gotteshus en Jerusalem wada opptobuen, un ons siene Meeninj doaräwa, tooschekjen. #Esra 8,36

Currently Selected:

Esra 5: PB

Highlight

Compare

Copy