Hesekiel 35
35
Äwa Edom
1Un mie wort wada kloa, waut de Har to sajen haud. Hee säd: 2Menschensän, kjikj emol no de Seir Boaj un profezei äwa Edom. #Hes 25,12-14 3Saj an: Dit es waut Gott de Har sajcht: Horcht emol, ekj mott noch met junt, Seir Boaj, veräakjnen. Ekj woa miene Macht jäajen junt utstrakjen un woa jun Launt to een vewoaloosdet un ladjet Launt moaken. 4Ekj woa june Städa vedoawen, un kjeena woat en jun Launt wonen. Un jie woaren enseenen, daut ekj de Har sie. 5Wiels jie emma wajch june Fientschoft met Israel fläajden, un an met daut Schwieet ombrochten, to dee Tiet aus an aules toopbruak, un to dee Tiet aus äare latste Strof opp an kjeem, #(5 un 6) Psa 137,7 6saj ekj, Gott de Har, gaunz kloa, daut jie woaren bleeden motten. Jie woaren nich onen dän Doot doavon komen. Jie sent schuldich von Läwen nämen, un jun Läwen woat jefoddat woaren. 7Ekj woa de Seir Boaj to eene Wiltnis moaken un ladich loten. Ekj woa doa aulem utroden, wäa doa noch han un trigj trakjt. 8Ekj woa june Boaj met Doodes bedakjen; opp june läaje Boaj, en de Täla, un delenjd de Riefasch woaren aulawäajen dee ligjen, dee omjebrocht sent. 9Ekj woa daut opp emma ladich loten, un kjeena woat mea en de Städa wonen. Un jie woaren enseenen, daut ekj de Har sie.
10Wiels du sätst, daut dise beid Lenda, Israel un Juda, met äare twee Velkja sullen diene sennen, un daut du dee ennämen wurscht, wan de Har doa uk wond, 11doawäajen sajcht Gott de Har nu gaunz kloa, hee woat met krakjt soonen Oaja un soonen Iewa opp junt komen, aus jie en june Wutt opp an eewden. Un jie woaren mie kjanen lieren, wan ekj rechten woa. 12Un jie woaren weeten daut ekj, de Har, aul jun Jelasta äwa de israelitische Boaj hieed, aus jie säden daut et ut met an wia un jie junt doa nu sautfräten kunnen. 13Soo hab jie junt groot jedonen, un haben frajch äwa mie jerät. Ekj hab daut jehieet. 14Dit es waut Gott de Har sajcht: Ekj woa diene Jäajent soo vedoawen, daut aule Lenda sikj soo freien woaren, 15aus du die äwa daut Oafgoot von Israel freidsd, aus dee venicht worden. Dit es waut ekj met die doonen woa. Ekj woa aules opp de Seir Boaj un daut gaunze Edom gaunz venichten, un see woaren enseenen, daut ekj de Har sie.
Currently Selected:
Hesekiel 35: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
