Hesekiel 16

Gott es de Israeliten goot,

1Dan wort mie noch emol kloa waut de Har to sajen haud. Hee säd: 2Menschensän, saj Jerusalem waut fa oppscheiselje Dinja see jedonen haft. 3Saj ar: Dit es waut Gott de Har to Jerusalem sajcht: Von kjlien, von jeehäa, staumst du von daut Launt von de Kanaanita. Dien Voda wia een Amorita un diene Mutta eene Hetitasche. 4Aus du jebuaren wieescht, wia de Sach soo aus dit. Dien Nowelbaunt wort nich aufjeschnäden, un du worscht nich met Wota jebot un rein jewoschen. Kjeena reef die met Solt en, un kjeena bunk die eene Winjel om. 5Doa wia kjeena, wäm daut äwa die jaumad, ooda wäa die sooväl goot wia, daut see daut fa die deeden. Du worscht oppe Stap jeschmäten aus du kjlien wieescht, wiels daut soo oppscheislich met die leet. 6Dan kjeem ekj doa vebie un sach die en dien Bloot ligjen, un aus du noch en dien Bloot lachst, säd ekj: Du saust läwen. Daut es krakjt waut ekj säd: Du saust läwen, un du lachst dan noch en dien Bloot. 7Ekj fläajd die, un du wost enne Hecht aus eene Stud oppe Stap. Du wost, un worscht groot. Du wieescht eene utjewosne Mejal un die leet daut schmock. Du hautst eene feine Brost un diene Hoa wieren lank jewossen, oba du wieescht wada noaktich un kol. 8Un ekj kjeem bie die vebie un sach, daut dit de Tiet wia daut see no die froagen wudden. Un ekj spreed mien Rock äwa daut, waut kol wia, un ekj vespruak die en eenen Bunt, daut du sust miene sennen, un soo worscht du dee waut mie jehieed. Dit es waut Gott de Har sajcht. #2Mo 19,5; Rut 3,9 9Ekj wosch die met Wota dien Bloot auf, un ekj schmäad diene Hut met Eelj en. 10Ekj jeef die een utjeneidet Kjleet un feine ladane Schoo. Ekj bunk die een feinet lienzeichnet Duak om, un jeef die siedne Kjleeda. 11Ekj jeef die Straums, soont aus Oarmbenja un Haulskjäden, 12un jeef die een Rinkj enne Näs, Uarinj aun de Uaren, un eenen sea feinen Kraunz oppem Kopp. 13Soo kust du die utstraumen met Golt un Selwa, un du hautst lienzeichne, siedne un utjeneide Kjleeda. Toom äten hautst du Jebaknis von daut baste Mäl, un Honnich un Eelj. Die leet daut butajeweenlich schmock un de Lied dochten die leet daut aus eene Kjennichsche. 14Un daut wort bekaunt mank de Velkja, woo schmock du leetst, un daut du soo besonda leetst, wäajen waut ekj die jejäft haud, sajcht Gott de Har.

Oba see hoolen sikj nich aun Gott

15Oba du veleetst die opp woo schmock die daut leet, un wiels soo väl von die jerät wia, worscht du ontru, un bootst die jieda eenem aun dee vebie kjeem un jeefst die han fa dee. #Jer 2,20 16Du brukst waut von diene Kjleeda un muakst straume huage Opfastäden met dee. Doa wieescht du soo ontru aus noch nienich wäa jewast wia ooda sennen woat. 17Du neemst de goldne un selwane Sachen, dee ekj die jejäft haud, un muakst die goldne Jetta. Met daut wieescht du mie ontru. #Hos 8,4 18Du neemst diene schmocke utjeneide Kjleeda un bedakjst dee doamet, un sadsd dee miene Eelj un Weiruak väa. 19Du lädsd daut goode Äten, waut ekj die toom äten jeef, daut baste Mäl un Eelj un Honnich, aus een scheenet Jeroch ver de Jetta. Soo wort daut, sajcht Gott de Har. 20Un du neemst de Kjinja, dee du mie jebrocht hautst, un muakst een Opfa von dee, daut de Jetta dee to äten kjrieejen. Un aus wan daut nich jenuach wia, daut du mie ontru wieescht, #(20 un 21) Hes 20,26; 23,37; 5Mo 12,31; 2Kjen 16,3; Jer 7,31 21jeefst du miene Kjinja han, daut dee jeschlacht worden un fa de Jetta vebrent worden. 22Un bie aul daut oppscheiselje met waut du mie ontru wieescht, hast du nienich doaraun jedocht, von wua du kjeemst, un woo du, aus du kjlien wieescht, kol un noaktich en dien Bloot romwrunschen deetst.

23Un dan no däm, ach, oba woo saul daut nu bloos, sajcht Gott de Har. No däm daut du aul daut beese jedonen hautst, 24muakst du die een rundet Huskje un eene huage Opfastäd opp jieda opnen Plauz. #Jer 11,13 25Opp jieda Akj muakst du die eene huage Opfastäd un waut ieescht schmock leet aun die, wort an nu jäajenaun. Du spreedsd diene Been ut fa aule waut vebie jinjen un jeefst die met väle schaundhauft auf. 26Ieescht kroopst du met Ägipten, dee soone besondre Jestault haud, em Bad nenn, un jeefst die met väle aundre auf, om mie entooajren. 27Ekj bestroft die aus ekj de Filista leet äare Lost aun junt uteewen, un die daut wajchnämen, waut ekj die toojedeelt haud. Soogoa de Filista dochten, daut wia eene Schaund, waut du deetst. 28Aus die dan noch mea jankad, vejinjst du die uk met de Assiera. Du jeefst die gaunz met an auf, oba wieescht doch noch nich tofräd. #Hes 23,12 29Dan jeefst die met de Haundelsmana, de Chaldäa auf, un kjrieechst doa uk noch nich jenuach. 30Woo worscht du bloos soo iewrich, sajcht Gott de Har. Du hilst die uk von de oajchste Schaunden nich trigj, 31un muakst daut runde Huskje opp jieda Akj, un eene huage Opfastäd, opp jieda opna Plauz. Oba du best nich soo aus aundre waut soo romdriewen; du leetst die nich betolen. 32Du best soo aus de Fru, dee sikj leewa met framde Mana aufjeft aus met äaren ieejnen Maun. 33Aule aundre velangen Jelt, oba du jefst dee Jelt met woone du spazieren deist, un bekjafst dee, daut see komen. Von aule Rechtungen komen see un driewen Schaund met die. 34Daut es bie die jrod aundasch aus bie aundre Frues. Die brucken see nich sieekjen ooda betolen. Du jefst an Jelt. Dit es werkjlich waut aundret.

See woaren bestroft woaren

35Un nu, du romdriefsche, horch waut de Har to die sajcht: 36Dit es waut Gott de Har sajcht: Du hast en dien romdriewen aule Schaund jewäsen, un hast dien Kjarpa aufjedakjt fa dee, dee met die spazieeden. Du hast de oppscheiselje Jetta jedeent, un hast diene Kjinja em Jetta Opfa doot jemoakt. 37Un wäajen dit, woa ekj aul dee met dee du von aulawäajen spazieet hast, beides dee dee die jefollen, un dee dee die nich jefollen, rom die saten. Un ekj woa die daut Kjleet opphäwen, daut see diene Schaund woaren seenen kjennen. #Jer 13,22 38Ekj woa die rechten, soo aus eena eene Fru recht dee romjeschwient un Läwes jenomen haft. Un wiels du mien Oaja jehoakt hast un ekj daut nich vedroagen kaun, wan du die no aundre Jetta rechst, woa ekj die met de Doodesstrof veuadeelen. #3Mo 20,10 39Ekj woa die aun dee äwajäwen met dee du romdreefst un dien rundet Huskje dolrieten un diene huage Opfastäden vestieren. Dee woaren die diene Kjleeda un dien schmocket Straums wajchnämen, soo daut du kol un noaktich to ligjen komen woascht. 40Dee woaren eene Baund jäajen die brinjen un die met Steena kjlietren un met Spiessen kjwälen. #5Mo 22,23-24 41Dee woaren june Hiesa dolbrennen un daut Jerecht ver väle Frues äwa junt utfieren. Opp dän Wajch woa ekj een Enj moaken met dien romdriewen un aundre bekjeepen. #2Kjen 25,9 42Ieescht mau dan, woat mien Oaja sikj utjespält haben, daut ekj nich mea doll un aufjenstich woa sennen. Dan woa ekj ruich woaren. 43Wiels du vejäten hast von wua du kjemst, un soo mien Oaja jereizt hast met aules waut du deist, woa ekj aul daut, waut du jedonen hast, die loten oppem Kopp faulen, sajcht Gott de Har. Best du nich uk noch ut Raunt un Baunt jestäajen buta dit oppscheiselje?

44Dan woat von die jesajcht woaren, soo aus foaken jesajcht woat: “De Dochta likjend äare Mutta.” 45Du best eene Dochta to diene Mutta, dee äaren Maun un Kjinja von sikj juach, un eene Sesta to de Mejales, dee äare Mana un Kjinja von sikj juagen. Diene Mutta wia eene Hetita un dien Voda een Amorita. #Hes 16,3 46Diene groote Sesta es Samaria, dee met äare Darpa nuaden von die wont, un diene kjlandre Sesta es Sodom, dee met äare Darpa sieden von die es. 47Daut rieekjt die nich too, daut du soo läwsd aus dee, un äare oppscheiselje Wäaj nojinjst. Du hast daut en eene sea korte Tiet opp jieda Wajch noch oaja jemoakt aus see. 48Nu saj ekj aus Gott de Har die gaunz kloa, daut diene Sesta Sodom haft met äare Darpa toop daut nich soo groff jedräwen aus du un june Darpa. #Mat 10,15 49Denkj doaraun, de Schult von Sodom wia daut see stolt wieren un von aules jenuach hauden. See läwd sikj eenen gooden Dach un wia en kjeene Jefoa. Enne Städ daut see de oame un dee waut de Help fäld metholpen, 50wia see stolt opp sikj selfst un deed oppscheiselje Dinja. Daut es wuarom ekj ar venichten deed, soo aus du sachst. #1Mo 19,24 51Un Samaria haft nich haulf soo väl Sinden begonen aus du. Du hast noch mea oppscheiseljet jedonen aus dee. Diene Sesta Samaria lat daut goot jäajen aul daut oppscheiselje waut du jedonen hast. #Jer 3,11 52Nu es daut aun die, daut du unja diene Schaund lieden motst, wiels du hast diene Sesta äare Städ jenomen un noch oppscheiseljere Dinja jedonen aus see. Du hast ar moakt goot loten. Nu es daut aun die, daut du die schämen motst un veacht woascht sennen, un diene Sesta nich soo schlajcht lat jäajen daut, waut du jedonen hast.

53Ekj woa an wada opp äare Been stalen, beides Sodom un äare Darpa, un uk Samaria un äare Darpa. Un ekj woa die tweschen dee beid oppe Been stalen, #5Mo 30,3 54soo daut du woascht veacht sennen un die schämen woascht fa aules waut du jedonen hast. Un an woat daut een Troost sennen. 55Un diene Sesta Sodom un äare Darpa woaren wada soo oppe Been komen aus see ieeschtemma wieren, un diene Sesta Samaria un äare Darpa woaren wada soo sennen aus daut emol wia. Un die un diene Darpa woat daut uk wada soo gonen aus daut emol wia. 56Waut hautst du doch emma äwa Sodom to sajen, aus du die stoakj feelsd, 57un aus diene Schaund noch nich opjedakjt wia? Oba nu motst du beschämt woaren von Edom un äare Darpa, un von de Filista un äare Darpa, dee die von runtom veachten. 58Nu motst du doafäa lieden, daut du ut Raunt un Baunt jestäajen best, un de oppscheiselje Dinja jedonen hast, sajcht de Har.

59Dit es waut Gott de Har sajcht: Ekj woa met die veräakjnen fa waut du jedonen hast, wiels du daut Vespräakjen, waut du jemoakt hautst, veachten deetst un dän Bunt nich hilst. 60Oba ekj woa mienen Bunt, dän ekj met die muak aus du junk wieescht, denkjen, un woa eenen eewjen Bunt met die moaken. #3Mo 26,45; Jer 31,31-34; Hes 37,26; Hos 2,17 61Wan ekj die woa diene groote Sesta un diene kjlandre Sesta trigjäwen, waut doch nich en dienen Bunt steit, woat die daut groot woaren, waut du jedonen hast, un woascht die schämen. #Hes 20,43 62Ekj woa mienen Bunt met die schluten, un du woascht enseenen, daut ekj de Har sie. 63Ekj woa die aules vejäwen waut du jedonen hast, oba du woascht doaraun denkjen un woascht die soo schämen, daut du nuscht to sajen woascht haben toom die selfst to rajchtfoadjen, sajcht Gott de Har. #Hes 36,31-32

Currently Selected:

Hesekiel 16: PB

Highlight

Copy

Compare