2. Mose 18

Gooda Rot en eene Spazia

1Nu neem sikj daut soo rom, daut Jitro, de Priesta en Midian, dee Moses sien Schwieevoda wia, to hieren kjrieech waut Gott fa Moses un fa sien Volkj, de Israeliten, jedonen haud. Hee hieed, woo de Har Israel ut Ägipten rut jebrocht haud. #2Mo 3,1 2Un Jitro, Moses sien Schwieevoda, neem Zippora un äare Säns opp, aus Moses an schekjt. #2Mo 4,20 3De een Sän heet Gerschom: Wäajen, haud Moses jesajcht, ekj een framda sie en een framdet Launt. #2Mo 2,22 4De aundra heet Elieser. Moses haud jesajcht: Mien Voda sien Gott holp mie, un rad mie vom Kjennich sien Schwieet. #1Chr 23,15.17 5Un Jitro, Moses sien Schwieevoda, kjeem met Moses siene Säns un Fru no am enne Wiltnis, doa wua see bie däm Gottesboajch jeloagat wieren. 6Hee leet Moses sajen: Ekj sie dien Schwieevoda, Jitro, un kom nu no die met diene Fru un diene twee Säns. 7Moses jinkj dan rut no sienen Schwieevoda, un kjneed sikj ver am un kust am. No däm, daut see sikj fresch bekaunt jemoakt hauden, jinjen see em Zelt nenn. 8Moses vetald sienen Schwieevoda aules waut de Har däm Kjennich un de Ägipta jedonen haud, om Israel rut to brinjen. Dan vetald hee am uk, waut see hinjawäajes fa schwoaret beläft hauden, un woo de Har an jerat haud. 9Jitro freid sikj to aul daut goode, daut de Har fa Israel jedonen haud, un an von de Ägipta äare Macht loos jemoakt haud. 10Jitro säd: Preist däm Harn, dee junt soo von de Ägipta un däm Kjennich jerat haft, un dee jun Volkj von unja de ägiptische Macht rut brocht. 11Nu weet ekj daut de Har jrata es aus aule Jetta, wäajen daut waut hee fa junt deed, aus jane soo huachnäsich to junt wieren. #Neh 9,10; Jer 50,29 12Dan reed Jitro, Moses sien Schwieevoda, een Brauntopfa ut, un muak aundre Opfa fa Gott. Dan kjeemen Aaron un de Leidasch von Israel un eeten daut Broot ver Gott, met Moses sienen Schwieevoda. #1Mo 31,54

Rechta woaren aunjestalt

(5Mo 1,9-18)

13Dän näakjsten Dach saut Moses aus Rechta fa daut Volkj, un doa kjeemen Menschen ver am von zemorjes bat em Owent nenn. 14Aus Moses sien Schwieevoda daut sach, woo Moses sikj fa daut Volkj hanjeef, säd hee: Wuarom deist du daut soo met daut Volkj? Wuarom blifst du auleen met dit, un daut gaunze Volkj helt sikj vom Morjen bat däm Owent doawäajen opp? 15Moses säd to sien Schwieevoda: Daut es, wiels de Menschen aula no mie komen, om Gott sienen Wellen to hieren. 16Wan doa een Faul mank daut Volkj väakjemt, dan komen see no mie. Ekj recht dan tweschen an, un saj an waut Gott siene Ordnungen un Jesazen sent. 17Moses sien Schwieevoda säd to am: Dit es nich goot, daut du daut soo deist. 18Dit helst du goanich ut, nich du, un uk nich dien Volkj. Dit es too väl, daut eena daut auleen sull kjennen. #4Mo 11,14; 5Mo 1,9 19Horch emol no waut ekj die sajen woa, un mucht Gott die met dit halpen. Du sust fa daut Volkj ver Gott komen, met de veschiedne Falen. 20Dan lieescht du an de Ordnungen un de Jesazen. Du wiests an dän Wajch, woo see läwen sellen, un waut see schuldich sent to doonen. 21Las die fäje Mana ut von em Volkj, Mana dee Gott ferchten, dee to vetruen sent, dee nich to bekjeepen sent, un stal dee aun aus Beaumte äwa 1.000, un Beaumte äwa 100, un äwa 50, un äwa 10. 22Lot dee daut Volkj rechten, emma wan daut doaraun fält. Wan oba een schwoara Faul oppkjemt, dan lot see dän no die brinjen. Een Faul dee kjlien es, sellen see selfst rechten, soo daut et leichta fa die woat. Soo woaren see die daut droagen halpen. 23Wan du daut soo doonen woascht, un Gott die leiden woat, dan woascht du daut uthoolen kjennen, un daut Volkj woat en Fräd wieda gonen. 24Moses horcht no aul dit waut sien Schwieevoda säd, un deed daut soo. 25Hee laus fäje Mana ut von daut gaunze Volkj, un stald dee aun aus Beaumte äwa 1.000, Beaumte äwa 100, äwa 50, un äwa 10. 26Dise Beaumte wieren emma doa, daut Volkj to rechten, un wan een schwoara Faul oppkjeem, jinjen see met dän no Moses. Aul de kjlandre Falen schlichten see unja sikj selfst. 27Un Moses neem Aufscheet von sienen Schwieevoda, un Jitro jinkj no siene ieejne Jäajent.

Currently Selected:

2. Mose 18: PB

Highlight

Copy