Efeesa 2
2
Vom Doot toom Läwen
1Jie wieren en june Sinden jeistlich doot, aus jie noch soo läwden aus dise Welt daut velangd, #Luk 15,24.32; Kol 2,13 2un de onsechtboare Macht, dee äwa dise Welt harscht, unjadon wieren, dän Jeist, dee en dee wirkjt, dee Gott nich jehorchen. #Joh 12,31; Efs 6,12; Tit 3,3 3Wie läwden to eene Tiet uk aula soo aus ons Fleesch daut velangd un wuatoo onse Lost ons dreef, un wieren von Natua ut Kjinja unja Gott sienen Oaja, soo aus aule aundre. #Kol 3,6; 1Pet 4,3 4Oba Gott es soo rikj aun Jnod, un hee es ons soo goot en siene Leew, 5daut hee ons met Christus toop wada toom Läwen brocht, wan wie uk doot en onse Sinden wieren. Derch Jnod woa wie seelich. 6Gott haft ons met Christus Jesus toop oppjewakjt un met am toop eenen Plauz em Himmel jejäft, #Flp 3,20 7daut hee en de tookjinftje Tieden ons en Christus Jesus bewiesen kunn, woo vetraflich rikj hee aun Jnod es, un woo sea goot hee ons es. #Efs 1,7 8Jie sent derch Gott siene Jnod jerat, wiels jie jleewen. Daut es nich derch june Woakjen. Daut es een Jeschenkj von Gott. #Reema 3,23-24; Gal 2,16 9Daut es nich ut Woakjen, soo daut kjeena Uasoak haft sikj selfst to lowen. #Reema 3,28; 1Kor 1,29 10Doaderch, daut wie met Christus Jesus vebungen sent, haft Gott ons niejeschaufen un en eenen Staunt vesat, daut wie goodet doonen kjennen. Nu sell wie uk doano läwen. #Tit 2,14
Aula eent en Christus
11Vejät nich, jie wieren von Natua ut aus Nichjuden jebuaren. Un jie worden von dee, dee derch Menschenhaunt beschnäden sent, de onbeschnädne jenant. #Efs 5,8 12Jie wieren don onen Christus, un aun Gott sien Volkj wia jie framd. Un waut Gott aun Israel vemoakt un toojesajcht haud, jinkj junt nuscht aun. Jie hauden nuscht to hopen un wieren onen Gott en dise Welt. #Reema 9,4; 1Tess 4,13 13Oba nu es daut aundasch; nu sent jie Christen. Jie wieren wiet auf, oba nu sent jie derch Christus Jesus sien Bloot gaunz noaun jebrocht.
14Christus es ons Fräd. Hee haft von dee beid Gruppen eene jemoakt un de Waunt doljebroaken, dee ons tranen deed. #Jes 9,5; Gal 3,28 15Christus haft en sienem Fleesch daut Jesaz un de Väaschreften ut däm Wajch jebrocht, daut hee en sikj selfst kunn von dee twee eenen nieen Mensch schaufen, un doaderch Fräd schaufen, #Kol 2,14 16daut hee ons beid derch daut Kjriez en eenem Kjarpa met Gott toopbrocht, un doaderch met de Fientschoft een Enj muak. 17Un hee kjeem un prädijd de Fräd to beid, to junt, dee wiet auf wieren un uk to dee, dee dicht bie wieren. #Jes 57,19 18Derch Jesus hab wie aule beid derch eenen Jeist dän Wajch no däm Voda. #Efs 3,12
19Dan sent jie nu nich mea framde Waundra, oba Metbirja met de Heilje un Jlieda en Gott siene Famielje, #Efs 3,6; Heb 12,22-23 20dee opp de Apostel un Profeeten äaren Grunt jebut es wuaraun Jesus Christus selfst de rajchta Akjsteen es, #Jes 28,16; Mat 16,18; 1Pet 2,4-6 21derch dän de gaunza Bu toophelt un waust, soo daut et fa onsen Harn eenen heiljen Tempel jeft. 22En däm sent uk jie nenjebut, soo daut Gott em Jeist eene Woninj haft.
Currently Selected:
Efeesa 2: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.