5. Mose 34
34
Moses sien Doot
1Un Moses jinkj von de Stapen en Moab, nopp en de Nebo Boaj, bat oppe Spetz von däm Pisga Boajch, oosten von Jericho. Un von doa wees de Har Moses Gilead bat soo wiet aus Dan, #5Mo 3,27 2de gaunze Naftali Jäajent, de Jäajent von Efraim un Manasse, de gaunze Juda Jäajent bat aum Mäa em Wasten, 3daut Launt em Sieden Kanaan, un de Stapen dee von Jericho, de Staut met de Paulmbeem, bat Zoar strakjen. #2Chr 28,15 4Un de Har säd to Moses: Dit es daut Launt woont ekj Abraham, Isaak, un Jakob met een Eit vespruak, daut äare Nokomen daut oawen wudden. Ekj hab die daut nu met diene Uagen seenen loten, oba du woascht doa nich nengonen. #1Mo 12,7 5Un soo storf Moses, däm Harn sien Deena, doa en Moab. Dit wia krakjt soo aus de Har daut jesajcht haud. #5Mo 32,50 6Un de Har begrowd Moses en een Tol en Moab, jäajenäwa von Bet Peor. Kjeena weet, bat aum vondoagschen Dach, krakjt wua hee begroft es worden. 7Moses wia 120 Joa oolt aus hee storf. Hee wia noch krakjt soo stoakj aus eemol, un hee kunn noch goot seenen. #5Mo 31,2 8Un doa opp de Moabstapen, truad daut Volkj fa 30 Doag äwa Moses, bat de Truatiet äwa wia. #4Mo 20,29
9Un Moses läd siene Henj opp Josua, Nun sien Sän, un Josua wort voll Weisheit derch däm Jeist. Un de Israeliten horchten no am un hilden de Jesazen, dee de Har Moses jejäft haud. #4Mo 27,18-23; 1Tim 4,14; 2Tim 1,6
10Doa es no Moses, nich noch een Profeet en Israel oppjekomen, dee soo aus Moses wia. De Har räd met am aus unja vea Uagen. #2Mo 33,11; 4Mo 12,6-8; 1Kor 13,12 11Kjeen aundra Profeet haft soone Wunda un Tieekjens jedonen, aus dee waut de Har derch Moses en Ägipten deed jäajen däm Kjennich un aul siene Deena un daut gaunze Launt. 12Kjeen aundra Profeet haft soone groote Macht jeeeft, un soone Forcht jewoakt, aus waut Moses deed aus Leida en Israel.
Currently Selected:
5. Mose 34: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.