Daniel 3
3
See kjneeen sikj nich fa eene Jestault
1Daut neem sikj emol soo rom, daut Nebukadnezar eenen goldnen Aufgott leet moaken. Daut wia eene Jestault dee 30 Meeta huach un 3 Meeta breet wia, un wort en de Prowins Babel opp de Dura Stapen oppjestalt. 2Dan leet de Kjennich de Prinsen, de Volkjsleida von de Prowinsen, de Vewaulta, de Kaussenfiera, de Rechta un de Frädens Rechta, un de veschiedne aunjestalde en de Prowinsen aula toopkroagen, daut dee sullen doabie sennen wan de Jestault enjeweit wort. 3Aus aul dise Beaumte dan toop kjeemen, stunden see ver de Jestault. 4Dan wort lud bekaunt jejäft: Aul jie Veträda von de veschiedne Velkja, Lenda un veschiedne Sproaken, horcht emol häa. 5Soo schwind aus jie de Musikj hieren von de Trompeeten, Fleeten, Hoapen, Zitta un veschiedne aundre Instrumenten, sell jie aula hanfaulen un dän goldnen Aufgott, dän Nebukadnezar oppjestalt haft, aunbäden. 6Wan irjent wäa nich hanfelt däm auntobäden, dämjanjen woat fuaz en eenen jlieejent heeten Hettowen nenjeschmäten woaren. 7Un aus de Menschen von aul de veschiedne Velkja, Lenda, un Sproaken de Musikj opp aul de veschiedne Instrumenten spälen hieeden, follen see han un bäden de goldne Jestault aun, dee Kjennich Nebukadnezar haud oppstalen loten.
8Eenje von de babelonische Menschen sagen daut aus eene Jeläajenheit de Juden to vekloagen. 9See säden to Kjennich Nebukadnezar: Ons Kjennich, mucht dien Rikj kjeen Enj haben. 10Du hast doch een Jesaz jemoakt, daut een jiedra dee de Musikj von de Instrumenten hieet, saul sikj deep kjneeen un de goldne Jestault aunbäden, #Dan 6,13 11un wan irjentwäa daut nich deit, saul dee en eenen jlieejent heeten Hettowen nenn jeschmäten woaren. 12Doa sent oba waut Juden, Schadrach, Meschach un Abed Nego, dee du en de Prowins Babel aunjestalt hast, dee nich no dien Befäl horchen. Dee deenen dienen Aufgott nich un dee kjneeen sikj nich ver de goldne Jestault, dee du hast loten oppstalen. #Dan 2,49 13Aus Nebukadnezar daut hieed, wort hee sea doll un leet dee dree komen, daut hee met an räden kunn. 14Hee säd to an: Es daut soo, Schadrach, Meschach un Abed Nego, daut jie mienen Aufgott nich deenen, un daut jie junt nich ver de goldne Jestault kjneeen? 15Wan jie dan, wan jie de Trompeet un de Fleeten un de Hoapen un Zitta spälen hieren, hanfaulen un dän Aufgott aunbäden, dan es aules goot. Oba wan jie daut nich doonen woaren, schmiet wie junt fuaz en eenen jlieejent heeten Hettowen nenn. Dan woa wie seenen auf doa een Gott es dee junt raden kaun ut miene Macht. #2Mo 5,2; 2Kjen 18,35 16Un Schadrach, Meschach un Abed Nego säden: Wie brucken die en dise Sach nich jehorchen. 17Wan du deist waut du jesajcht hast, dan kaun ons Gott, däm wie deenen, ons von däm heeten Hettowen un von diene Macht raden, un hee woat daut uk. #5Mo 4,20; Psa 66,12 18Un wan hee daut nich deit, doawäajen saust du, ons Kjennich, weeten, daut wie nich woaren dienen Aufgott deenen ooda de goldne Jestault aunbäden. #2Mo 20,3-5
19Dan stieech Nebukadnezar siene Wutt ut un hee wort gaunz root em Jesecht. Oppe Städ säd hee, daut de Hettowen sull säwenmol soo heet aus jeweenlich aunjehett. 20Hee leet de stoakjste Soldoten ut siene Armee komen, daut dee Schadrach, Meschach un Abed Nego sullen de Henj un Feet toop binjen un dan soo en dän jlieejent heeten Hettowen nenn schmieten. 21De dree Mana worden dan met Kjleeda toop, en äare Mauntel, Rakj un Koppbinjen, faustjebungen un soo en dän jlieejenden Hettowen nenn jeschmäten. 22Wiels de Owen opp däm Kjennich sien Befäl soo utnoms heet aunjehett wia, wieren de Flaumen soo heet, daut de Soldoten dee Schadrach, Meschach un Abed Nego nopp neemen, doavon storwen. 23Un dise dree Mana, Schadrach, Meschach un Abed Nego follen en dän jlieejent heeten Hettowen nenn, noch emma jebungen.
24Oba met eemol hupst Nebukadnezar ut Vewundrunk opp un säd to siene Rotjäwa: Bung wie nich dree Mana un schmeeten dee en daut Fia? Dee säden: Jo wie deeden, mien Kjennich. 25Oba doa sent nu vea, säd hee. Ekj kaun dee seenen. Dee gonen doa em Fia rom un an es nuscht jeworden. Äare Strenj sent wajch un dee gonen doa jrodsoo rom! Dän vieeden lat äwahaupt no eenen Gott sien Sän. #Jes 43,2 26Dan jinkj Nebukadnezar no de Däa opptoo von däm jlieejent heeten Hettowen un roopt: Schadrach, Meschach un Abed Nego, dee jie dän hechsten Gott deenen, komt rut, un komt häa. Un Schadrach, Meschach un Abed Nego kjeemen ut daut Fia rut. 27Doamet kjeemen dee veschiedne Rejierungs Beaumte dicht bie un sagen selfst, daut daut Fia an nuscht jedonen haud. Äare Hoa wieren nich vesenjt, äare Kjleeda wieren nich veschrieecht un dee rikjten nich emol heet ooda ruakich. #Heb 11,33-34 28Un Nebukadnezar säd: Ekj preis dän Gott dän Schadrach, Meschach un Abed Nego deenen. Dee haft sienen Enjel jeschekjt un an jerat. See jleewden am un horchten nich no mie, äaren Kjennich, un saden äa ieejnet Läwen opp Spell en däm daut see kjeenen aundren Gott aunbäden aus äaren ieejnen. #Dan 6,23 29Un nu horcht: Wan irjentwäa von irjent een Volkj, ooda Launt ooda Sproak, irjentwaut sajcht wuamet dee Schadrach, Meschach un Abed Nego äaren Gott siene Iea wajchnemt, dämjanjen woat en Stekja jehakt woaren un sien Hus woat doljeräten woaren. Doa es sest noanich een Gott dee soo raden kaun. #Dan 2,47 30Dan jeef de Kjennich Schadrach, Meschach un Abed Nego noch een hechret Aumt en Babel.
31De Kjennich Nebukadnezar schekjt eenen Breef aun de Menschen von de veschiedne Velkja un Lenda un Sproaken oppe gaunze Ieed un säd: Mucht junt daut sea goot gonen. 32Ekj well dise Jeläajenheit nämen junt to berechten von de Tieekjens un Wunda, dee de hechsta Gott mie jewäsen haft. 33Siene Tieekjens sent groosoatich. Siene Wunda sent toom staunen. Sien Rikj es een eewjet Rikj. Siene Harschoft es äwa Kjinja un Grootkjinja un haft kjeen Enj. #Dan 2,44; 4,31; 6,27; 7,14.27; Psa 145,13
Currently Selected:
Daniel 3: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.