Kolossa 2
2
Paulus sorcht om de Jemeent
1Ekj mucht junt weeten loten, woo sea ekj kjamf un mie aunstrenj fa junt un fa dee en Laodizea un fa aul dee, dee mie noch nich jeseenen haben. 2Mie es daut doarom to doonen, daut jie von Hoaten mootich woaren un en Leew vebungen sent. Ekj mucht uk, daut jie en june Erkjantnis waussen un faust woaren, un Gott sien Jeheemnis, daut es Christus, emma bäta vestonen lieren. 3Gott sien gaunza Schauz von Weisheit un Erkjantnis licht en Christus. #1Kor 1,24.30
4Dit saj ekj junt, daut jie junt nich derch aunschienent veninftje Räden veleiden loten. #Reema 16,18 5Wan ekj perseenlich uk nich doa sie, em Jeist sie ekj doch doa un frei mie to june Ordnunk un daut jie faust stonen em Gloowen aun Christus. #1Kor 14,40 6Soo aus jie dän Harn Christus Jesus aunjenomen haben, doano läft nu uk en am. 7Siet en am faustjewartelt un oppjebut un faust em Gloowen, soo aus jie jelieet sent. Un siet sea dankboa. #Efs 3,17
Christus mott de Medd bliewen
8Seet doano, daut jie junt nich veleiden loten derch huage Rädensoaten wua nuscht doarhinja es, dee bloos von Menschen staumen ooda von de Jeistawelt, dee oba nich von Christus komen. 9Daut es soo, en Christus wont aules waut Gott es gaunz werkjlich. #Joh 1,14.16
10Derch Christus hab jie daut volle Läwen, un hee steit äwa aule Jewaulten un Harschoften. #Efs 1,21 11En am sent jie uk beschnäden, doch nich von Menschenhaunt, oba derch Christus siene Beschniedunk, aus jie june fleeschelje Natua aufläden. #Reema 2,29; 6,5; 1Pet 3,21 12Aus jie jedeept worden, word jie met Christus toop begroft. Met Christus sent jie uk vom Doot oppjestonen derch dän Gloowen aun Gott siene Krauft, dee Jesus vom Doot oppwakjen deed. #Reema 6,4; Kol 3,1 13Jie wieren to eene Tiet jeistlich doot en june Sinden un en june fleeschelje Natua. Oba Gott haft junt derch Christus toom Läwen jebrocht. Hee haft ons aule Sinden vejäft. #Efs 2,1.5 14Hee haft dän Schultschien, dee met siene Fodrungen vom Jesaz häa jäajen ons stunt, derchjestrikjt un äwatsied jebrocht. Hee haft dän Schultschien aun daut Kjriez jenoagelt. #Efs 2,15 15Hee haft de Jewaulten un Jeistaharschoften äare Krauft wajchjenomen. Hee muak an to een oppseenen ver aule Menschen, un leid an wajch aus faustjenomne. #Efs 4,8; Kol 1,13
Wie brucken Christus mea aus irjent waut aundret
16Lot junt nu von kjeenem daut Jewessen schwoa moaken doaräwa waut jie äten un drinkjen sellen, ooda woone Heljedoag jie hoolen sellen, ooda äwa Niemon un Sabat. #(16-19) Reema 14,1-12 17Dit wieren aules mau Schautenbilda von daut waut noch komen sull. De Werkjlichkjeit es Christus selfst. #Heb 8,5; 10,1 18Lot junt nich von Menschen veleiden, dee doa sajen, jie motten junt kjneeen un Enjel aunbäden. Uk nich von dee, dee doa sajen, see haben Visionen jeseenen, un haben sest kjeenen Grunt toom groot räden aus bloos äaren ieejnen oppjepuften Vestaunt. 19Daut sent Menschen, dee sikj nich aun Christus, dän Kopp, hoolen, von däm de gaunza Kjarpa toopjehoolen woat un derch Jelenkja un Sänen vebungen es un waust, soo aus Gott daut jefelt. #Efs 4,15-16
20Wan jie met Christus von de Jeista von dise Welt jestorwen sent, wuarom lot jie junt dan wada Jesazen opplajen, aus wan jie noch to dise Welt jehieren? #Gal 4,9-10 21See sajen, du saust dit nich aunfoten, du saust daut nich schmakjen, du saust daut nich aunschieren. 22Daut woat doch aula unja de Henj vetäat, un es sest nuscht aus Menschen Räajlen un Menschen Lieren. #Mat 15,9 23Daut sitt woll soo aus wan daut, sikj selfst oppjelajde fromm sennen un dise faulsche Deemoot, no Weisheit likjent, wiels see dän Kjarpa schoonungsloos behaundlen. Oba de fleeschelje Liedenschoften woaren doaderch opp kjeenen Wajch unja Kontroll jebrocht. #Reema 13,14; 1Tim 4,3
Currently Selected:
Kolossa 2: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.