Aposteljeschicht 6
6
Säwen Helpa fa de Apostel jewält
1En dee Doag, aus de Jinja mea worden, worden de griechische Juden ontofräd äwa de hebräische, wiels äare Wätfrues worden bie de däachliche Toodeelunk äwaseenen. #Apost 4,35 2Dan roopten de Twalw de Jinja aula toop un säden: Daut es nich rajcht, daut wie unjaloten daut Wuat to prädjen om aun de Deschen to deenen. 3Doarom, Breeda, sieekjt mank junt säwen opprechtje Mana, dee voll Jeist un Weisheit sent, dee wie veauntwuatlich moaken kjennen, disen Deenst to doonen. #1Tim 3,8-10 4Wie oba woaren aunhoolen to bäden un daut Wuat to prädjen. 5Äa Väaschlach jefoll an aula. Un see wälden Stefanus, eena dee voll Gloowen un Heiljen Jeist wia, un Filippus un Prochorus un Nikanor un Timon un Parmenas un Nikolaus von Antiochia, dee dän Judengloowen aunjenomen haud. #Apost 8,5 6Dise stalden see de Apostel väa. Dee bäden äwa an un läden an de Henj opp. #Apost 1,24; 13,3; 14,23 7Un daut Gotteswuat vebreed sikj, un de Zol von Jinja wort en Jerusalem emma jrata. Un doa kjeemen uk väl Priesta toom Gloowen. #Apost 2,47; 19,20
Stefanus woat faustjenomen
8Un Stefanus, voll Gloowen un Krauft, deed groote Wunda un Tieekjens mank de Menschen. 9Dan stunden eenje von de Libertina School opp, un de Kiereena, de Alexandra un dee, dee von Zilizien un Asien wieren, un fungen aun sikj met Stefanus to strieden. 10Oba see kunnen jäajen de Weisheit un dän Jeist, en däm hee räd, nich stonen. #Luk 21,15
11Dan bekoften see eenje Mana, to sajen: Wie haben am jehieet Lastawieed jäajen Gott un jäajen Moses räden. #Mat 26,60-66 12Un see räajden daut Volkj un de Eltestasch un de Schreftjelieede opp, un dee kjeemen un neemen am faust un brochten am ver däm Rot. 13See stalden uk faulsche Zeichnisjäwa aun, dee doa säden: Dis Maun hieet nich opp, Lastawieed jäajen dise heilje Städ un daut Jesaz to räden, #Jer 26,9.11 14wiels wie haben am sajen hieet, daut Jesus von Nazaret dise Städ dolbräakjen woat, un dee Väaschreften endren dee Moses ons jeloten haft. #Joh 2,19 15Un dee, dee em Rot sauten, kjikjten am aula aun, un sien Jesecht sach daut aus een Enjeljesecht.
Currently Selected:
Aposteljeschicht 6: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.