Aposteljeschicht 1
1
Lukas foat wieda met de Jeschicht
1En mien ieeschtet Buak, Leewa Teofilus, schreef ekj die aules, waut Jesus aunfunk to doonen un to lieren, #Luk 1,3 2bat aun dän Dach, aus hee nom Himmel jenomen wort, aus hee siene Apostel, dee hee sikj jewält haud, derch dän Heiljen Jeist befolen haud waut to doonen. #Mat 28,19-20 3Aus siene lieden äwa wieren, stald hee sikj dise Mana väa, daut hee onen Twiewel wada läwd. Hee leet sikj 40 Doag von an seenen un räd to an von Dinja dee toom Gottesrikj jehieeden.
Jesus nemt Aufscheet von siene Jinja
(Luk 24,47-52)
4Un aus hee met an toop wia, befool hee an, nich von Jerusalem wajch to gonen, oba to wachten, bat see daut kjrieen wudden waut de Voda vesproaken haud, wuavon, säd hee, jie mie haben räden hieet; #Luk 24,49; Joh 15,26 5wiels Johanes deept met Wota, jie oba sellen om een poa Doag met dän Heiljen Jeist jedeept woaren. #Luk 24,49; Joh 15,26
6Un aus see sikj soo tooptroffen, fruagen see am: Har, woascht du Israel nu wada äa Kjennichrikj häastalen? #Luk 19,11.21 7Hee säd to an: Daut es nich fa junt, de Tieden un Doag to weeten, dee de Voda sikj en siene Macht bestemt haft; #Mat 24,36 8oba wan de Heilja Jeist äwa junt komen woat, woa jie Krauft kjrieen, un jie woaren miene Zeijen sennen, en Jerusalem, en gaunz Judäa, en Samaria, un äwa de gaunze Welt. #Luk 24,48; Apost 8,1
9Un aus hee dit jesajcht haud, sagen see daut hee ver an oppjehowen wort, un eene Wolkj neem am wajch, daut see am nich mea seenen kunnen. #Mrk 16,19; Luk 24,51 10Un aus see am hinjaraun kjikjten, wäarent hee nom Himmel fua, stunden bie an met eemol twee Mana en witte Kjleeda, #Luk 24,4 11dee to an säden: Jie Mana von Galiläa, wuarom sto jie hia un kjikjen nom Himmel? Dis Jesus, dee von junt em Himmel nenn jenomen wort, woat krakjt soo trigjkomen, aus jie am haben seenen nom Himmel foaren. #Luk 21,27
De Apostelzol woat wada voll jemoakt
12Dan jinjen see trigj no Jerusalem vom Oliewen Boajch. Daut wia soo wiet aus see aum Sabat gonen durwen. 13Un aus see trigjkjeemen, jinjen see opp dän Bän en äare Stow nenn, wua see sikj opphilden. Doa wieren Petrus, Johanes, Jakobus un Andreas, Filippus, un Tomas, Bartolomäus un Matäus, Jakobus, waut Alfäus sien Sän wia, un Simon de Zelot un Judas, waut Jakobus sien Sän wia. #Luk 6,13-16 14Dise wieren sikj aula eenich em Jebäd. Daut schloot uk en de Frues un Maria, Jesus siene Mutta, un siene Breeda. #Joh 7,3
15Un eenen Dach, aus see ojjefäa 120 Menschen toopwieren, stunt Petrus medden mank an opp un säd: #Joh 21,15-19 16Mana un Breeda, daut must soo romkomen aus jeschräwen stunt, soo aus de Heilja Jeist derch David von Judas haud sajen loten, dee een Wajchwiesa wort fa dee, dee Jesus faustneemen; #Psa 41,10 17wiels hee wort aus eena von ons jetalt un haud sien Poat met ons toop aun disen Deenst jekjräajen. 18Dis Maun koft met sienen ojjerajchten Loon een Aka opp däm hee eenen Dach väarenäwa dolfoll, daut hee väaren opplauzt daut am de Doarm rutkjwalden. #Mat 27,3-10 19Dit kjrieech aulemaun to hieren, dee en Jerusalem wonden, soo daut see dän Aka en äare Sproak Hakeldamach nanden, daut meent Blootaka. 20Wiels daut steit em Psalmbuak jeschräwen:
“Siene Behusunk saul vewillat woaren, daut doa kjeena bennen wonen woat”, un:
“Sien Aumt saul een aundra nämen.” #Psa 69,26; 109,8
21Doawäajen mott eena von dise Mana, dee de tietäwa bie ons jewast es, wäarent de Har Jesus bie ons rut un nenn jegonen es, #Joh 15,27 22von don aus Johanes aunfunk to deepen, bat Jesus von ons jenomen wort, met ons toop een Zeij doavon woaren, daut hee vom Doot oppjestonen es. 23Un see stalden twee väa: Josef, jenant Barsabas, dän see uk Justus nanden, un Matias. 24Dan bäden see un säden: Oo Har, dee du aulemauns Hoaten kjanst, wies ons, wäm du von dise twee jewält hast, #Apost 6,6 25dän Deenst un daut Apostelaumt to nämen, daut Judas oppjeef, om hantogonen wua hee hanjehieed. 26Dan trocken see Lessa, un daut Loss foll opp Matias. Dan wort hee met de alw Apostel metjetalt. #Spr 16,33; Rech 21,17
Currently Selected:
Aposteljeschicht 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.