2. Samuel 19

David vesieekjt aules to räajlen

1Un de Kjennich wia sea jeschloagen, un jinkj no de Bowastow äwa daut Puat un hield. Aus hee nopp jinkj, schrieech hee: Absalom, mien Sän! Mien Sän Absalom, wan ekj doch haud kunt en diene Städ stoawen. Absalom, mien Sän, mien Sän!

2Un daut wort Joab jesajcht, daut de Kjennich fa Absalom hielen un truaren deed. 3Soo kjeem daut, daut de Siech aun disem Dach to een truaren fa de Mana wort. De Lied wort jesajcht, daut de Kjennich fa sienen Sän truad. 4Dän Dach schlikjten de Mana sikj en de Staut nenn aus Mana dee sikj schämden un vom Kaumf wajchranden. 5De Kjennich bedakjt sien Jesecht, un hee hield lud: Mien Sän Absalom; Absalom, mien Sän, mien Sän! 6Dan jinkj Joab en däm Kjennich sien Hus un säd am: Du hast vondoag eene Schaund opp diene Mana jebrocht. See haben vondoag dien Läwen jerat, un daut Läwen von diene Säns un Dajchta, un diene Frues un Näbenfrues, 7un best goot jewast to dee waut jäajen die wieren, un hast jäajen dee jehaundelt, waut die goot wieren. Du hast ons jewäsen, daut diene Kommandaunten un Deena kjeenen Wieet bie die haben. Vondoag kjenn wie seenen daut wan Absalom noch läwd un wie aula doot wieren, dan wurscht du die freien. 8Nu sto opp, un sprakj diene Mana waut Moot too. Ekj saj die met een Eit ver däm Harn, daut wan du daut nich deist, dan woat nich eena von dee morjen zemorjes noch met die sennen. Daut wudd de jratsta Schoden sennen, dän du en dien gaunzet Läwen jehaut hast. 9Un de Kjennich muak sikj reed un jinkj no sienen Stool biem Stautspuat. Un de Mana wort jesajcht: Horcht emol. De Kjennich sett biem Stautspuat. Un aule Mana vesaumelden sikj ver am.

De Israeliten dee Absalom unjastett hauden, flichten, een jiedra no sien Hus. 10Daut Volkj wia vetwiewelt un see säden: De Kjennich, haft ons von onse Fiend jerat, un von de Filista äare Macht, oba nu es hee utem Launt jeflicht ver sienen Sän Absalom. 11Doch Absalom, dän wie ons aus Kjennich ensaulwden, es en däm Kaumf jestorwen. Sull wie nich dän Kjennich David proowen trigj to brinjen? 12Un de Kjennich David schekjt dise Norecht no de Priesta, Zadok un Abjatar: sajcht de Leidasch en Juda: Wuarom sent jie de latste dän Kjennich trigj no sien Paulaust to brinjen, wan daut gaunze Israel doafäa es? 13Jie sent mien Frintschoft, wie sent von eene Famielje, un wuarom sent jie de latste dän Kjennich trigj to brinjen? #2Sam 17,25 14Un lot Amasa weeten: Best du nich von miene Famielje? Lot Gott mie bestrofen wan du nich von nu aun de Kommandaunt äwa miene Armee best en Joab siene Städ. 15Un met dise Wieed jewonn David daut vetruen von aul de Mana von Juda, un see schekjten eene Norecht no däm Kjennich: Komm trigj. Du un aul diene Menschen. 16Dan kjeem de Kjennich trigj no däm Jordan, un de Menschen von Juda kjeemen no Gilgal om am to bejäajnen un am trigj derch däm Jordan to brinjen.

17Un Schimi, Gera sien Sän, de Benjaminita von Bahurim, spood sikj un jinkj met de Mana von Juda nom Kjennich David. #2Sam 16,5-14; 1Kjen 2,8 18Doa wieren 1.000 Mana von Benjamin met Schimi. Un Ziba, Saul sien Deena, un siene feftieen Säns un 20 Deena spooden sikj, daut see no däm Jordan kjeemen, daut see däm Kjennich trafen kunnen. #2Sam 9,2.10; 16,1-4 19See jinjen aula derch däm Jordan om dän Kjennich siene Menschen trigj to brinjen, un toom dän Kjennich bedeenen.

Un Schimi kjneed sikj ver däm Kjennich aus de Kjennich jrod äwa däm Jordan gonen wull. 20Un Schimi säd toom Kjennich: Mucht mien Har mie nich beschuljen fa daut beese waut ekj jäajen die deed aun dän Dach aus mien Har, de Kjennich, Jerusalem veleet. Mucht de Kjennich daut nich behoolen. 21Ekj weet daut ekj jesindicht hab, un doawäajen sie ekj vondoag daut ieeschte von Josef siene Nokomen jekomen mienen Harn, dän Kjennich to bejreessen. 22Un Abischai, Zeruja äa Sän, säd: Saul Schimi nich dootjemoakt fa dit? Hee flieekjt je dän Harn sienen Jesaulwden. 23Oba David säd: Wuarom saul ekj no junt horchen, jie Säns von Zeruja? Wuarom well jie jäajen mie sennen? Vondoag sie ekj de Kjennich äwa Israel un kjeen Israelit saul vondoag doot jemoakt woaren. #2Sam 16,10 24Un de Kjennich säd to Schimi: Du saust nich stoawen. Un de Kjennich vespruak daut met een Eit. #1Kjen 2,8-9

25Un Mefi Boschet, Saul sien Grootsän kjeem däm Kjennich bejreessen. Hee haud nich siene Feet besorcht un nich sienen Boat jewoschen un uk nich emol siene Kjleeda jewoschen von dän Dach aus de Kjennich veloten haud bat hee wada jlekjlich trigj kjeem. #2Sam 9,6 26Aus hee von Jerusalem no däm Kjennich kjeem, säd de Kjennich to am: Wuarom kjeemst du nich met mie, Mefi Boschet? 27Un hee säd: Mien Har un Kjennich, mien Deena fieed mie hinjat Licht. Ekj säd to am: Moak mien Äsel reed daut ekj met däm rieden kaun un met däm Kjennich gonen, wäajen ekj sie lom. 28Hee haft uk to die, mien Har un Kjennich, äwa mie jeloagen. Oba du, Har un Kjennich, best aus Gott sien Enjel; doo waut die rajcht sitt. #2Sam 16,3; 14,17 29Aul mien Voda siene Famielje un Frintschoft wieren sikj dän Doot secha ver die, mien Har un Kjennich; oba du satst dienen Deena mank dee waut aun dienen Desch äten. Ekj hab kjeen rajcht noch no irjent waut von die mien Kjennich to froagen. #2Sam 9,7 30Un de Kjennich säd to am: Du brukst aul nuscht mea sajen. Ekj hab mie nu beschloten, daut du un Ziba junt daut Launt sellen endeelen. #2Sam 9,9-10; 16,3-4 31Un Mefi Boschet säd toom Kjennich: Lot Ziba daut aula nämen, nu daut mien Har un Kjennich jlekjlich es trigj no Hus jekomen.

32Barsillai, de Gileadita, wia von Roglim jekomen, un hee jinkj met däm Kjennich bat däm Jordan om met am doa derch to gonen. #(32 un 33) 2Sam 17,27; 1Kjen 2,7 33Barsillai wia sea oolt. Hee wia 80 Joa oolt, un hee haud dän Kjennich met Äten vesorcht aus hee bie Mahanajim bleef. Barsillai wia sea goot auf. 34Un de Kjennich säd to Barsillai: Komm met mie derch däm Jordan, un ekj woa fa die en Jerusalem sorjen. 35Oba Barsillai säd toom Kjennich: Woo väl Joa hab ekj noch en mien Läwen, daut ekj met däm Kjennich no Jerusalem sull gonen? 36Ekj sie 80 Joa oolt un finj kjeene Lost mea en daut Läwen. Ekj kaun mien Äten un mien Drinkjen nich mea schmakjen, un ekj kaun nich mea de Stemm von de Mana ooda de Frues hieren wan dee sinjen. Wuarom sull ekj mienen Harn un Kjennich dan noch to Laust ligjen? 37Wuarom sull de Kjennich mie met soont beschenkjen? Ekj, dien Deena woa bloos noch een kortet Enj derch däm Jordan met däm Kjennich gonen. 38Lot mie, dien Deena, leewa trigj gonen, soo daut ekj en miene Staut stoawen kaun, dicht bie daut Grauf von mien Voda un miene Mutta. Oba hia es mien Sän, Kimham; lot däm met mienen Harn un Kjennich gonen un die deenen, daut du fa am deist waut die rajcht schient. #Jer 41,17 39Un de Kjennich säd: Kimham saul met mie gonen, un ekj woa fa am doonen waut die rajcht schient. Aules waut die von mie jankat woa ekj doonen. 40Dan jinjen aule Lied derch däm Jordan, un de Kjennich jinkj uk äwa. Un de Kjennich kust Barsillai un hee jeef am eenen Säajen. Un Barsillai jinkj trigj no sien Hus. 41Un de Kjennich jinkj wieda, no Gilgal, un Kimham jinkj met am. De gaunza Staum Juda un de halft von de Lied von Israel jinjen met däm Kjennich delenjd däm Wajch.

42Dan kjeemen aule Mana von Israel no däm Kjennich un säden to am: Wuarom haben de Mana von Juda die jestolen un die ons Kjennich un siene Famielje un aul siene Mana derch däm Jordan jebrocht. 43Un aul de Mana von Juda auntwuaden de Mana von Israel: Daut es wiels de Kjennich von ons Frintschoft es. Wuarom sull junt dit baudren? Hee haft ons nich to äten jejäft un ons kjeen Jeschenkj jejäft. #2Sam 19,13 44Un de Mana von Israel säden to de Mana von Juda: Wie haben tieenmol soo väl rajcht aun däm Kjennich David aus jie, wan jie uk sien Frintschoft sent. Wuarom kjikj jie rauf opp ons? Wia wie nich de ieeschte waut räden von am trigjbrinjen aus Kjennich? Oba de Mana von Juda drekjten äa rajcht noch strenja ut aus dee von Israel. #2Sam 19,11

Currently Selected:

2. Samuel 19: PB

Highlight

Copy

Compare