2. Samuel 17

Absalom well sikj secha moaken

1Un Ahitofel säd uk noch to Absalom: Lot mie 12.000 Mana nämen un David fuaz noch dise Nacht hinjaraun joagen. 2Dan woa ekj am enholen wan hee noch meed un jeschloagen es. Dan woat hee sikj enjsten un siene Mana woaren flichten. Oba ekj woa bloos dän Kjennich ombrinjen, 3un woa aul de aundre trigj brinjen, daut see no die komen aus eene Brut no äaren Maun. Doa es bloos een Mensch däm sien Läwen du velangst; aul de äwaje woaren kjeen Schoden kjrieen. Soo woat aules frädlich bliewen. 4Un Absalom un de aundre Leidasch jefoll waut Ahitofel säd.

5Dan säd Absalom: Roop noch Huschai dän Arkita. Well wie seenen waut dee fa Rot jeft. #2Sam 16,16 6Aus Huschai no Absalom kjeem, säd Absalom to am, waut Ahitofel jerot haud, un säd: Saj emol auf wie doonen sellen, waut hee jesajcht haft. 7Un Huschai säd to Absalom: Dit mol es Ahitofel sien Rot nich goot. 8Du weetst daut David un siene Mana stoakj sent, un nu sent dee soo doll aus een Boa, waut de junge veloaren haft. Un uk, dien Voda es jewizt en däm Kjrich un woat nich äwa Nacht met siene Mana sennen. 9Daut kunn goot sennen daut hee sikj nu aul en eene Heel ooda soowaut vekropen haft. Un wan doa waut Doodes wudden sennen biem ieeschten mol aunjriepen, dan wudd fuaz daut Wuat vespreeden daut Absalom veloaren haft. 10Dan wudden soogoa diene browe Mana, dee doch soo brow aus Leiws sent, sikj ferchten. Aulemaun en Israel weet waut von gooda Leida David en däm Kjrich es, un daut de Mana bie am goode Soldoten sent. 11Mien Rot es daut du daut gaunze Israel tooproopen deist, von Dan bat Beerscheba, soo daut et een Häa jeft soo aus Saunt aum Mäa, un daut du dan selfst en däm Kaumf nenn jeist. 12Dan woa wie am secha finjen un soo opp an komen aus de Deiw äwa de Ieed. Dan woat von am un aul siene Mana kjeena äwabliewen. 13Un wan hee en eene Staut nenn jeit, dan lot daut gaunze Israel Strenj brinjen un de Staut en daut Tol nenn schlapen daut nich een Steenkje doa mea to finjen es. 14Un Absalom un aul de Israeliten säden: Huschai, däm Arkita, sien Rot es bäta aus Ahitofel siena. De Har haud daut soo jefieet daut Ahitofel sien weisa Rot wudd to nuscht komen, soo daut de Har Onheil opp Absalom brinjen kunn. #2Sam 15,31.34

15Un Huschai säd to Zadok un Abjatar, de Priesta: Ahitofel haft dit un dit jejäft aus sienen Rot fa Absalom un de Leida en Israel, un hia es waut ekj jerot hab. 16Lot schwind wäm no David gonen un am sajen: Blieft nich äwa Nacht biem Riefa en de Wiltnis, oba got onbedinjt noch no de aundre Sied. Du best en Jefoa daut du un aul diene Menschen äwafollen woaren.

David kjricht Norecht

17Jonatan un Ahimaaz hilden sikj bie de Rogel Kjwal opp, un eene Deenarin wudd an sajen gonen waut see wiedadroagen sullen. See selfst leeten sikj nich seenen en de Staut nenn ooda rut gonen. #Jos 15,7-8; 2Sam 15,36 18Oba doa wia een Jung dee Jonatan un Ahimaaz jeseenen haud, un dee säd Absalom daut. Dan jinjen Jonatan un Ahimaaz schwind wieda bat eenen Hoff bie Bahurim. Doa vekroopen see sikj en eenen Borm. 19Un de Fru jinkj un läd een Dakjsel äwa däm Borm un streid doa Jeträajd äwa, soo daut de Borm nich to seenen wia. 20Aus Absalom siene Mana no daut Hus kjeemen, säden see to de Fru: Wua sent Ahimaaz un Jonatan? Un de Fru säd: Dee sent no daut Wota jegonen. Un de Mana sochten, oba fungen nuscht, soo daut see trigj no Jerusalem jinjen. 21Aus de Mana wajch wieren, kjeemen Jonatan un Ahimaaz utem Borm rut un jinjen no David un säden waut Ahitofel fa eenen Rot jejäft haud. Un see säden: Moakt junt schwind reed un got no de aundre Sied vom Riefa. 22Un David, un aul siene Menschen, dee met am wieren, jinjen derch däm Riefa. Aus de Morjen kjeem, wia doa nich eena dee nich äwa jegonen wia.

23Aus Ahitofel sach daut see nich sienen Rot aunneemen, neem hee eenen Äsel, un reet auf no Hus, no siene Staut. Doa räajeld hee siene Sach un jinkj un honk sikj. Hee storf, un wort en daut Grauf met siene Vodasch begroft. #1Sam 31,4; 1Kjen 16,18; Mat 27,5

24David wia bat de Staut Mahanajim jekomen, aus Absalom bat däm Jordan kjeem met daut gaunze israelitische Häa. #2Sam 2,8 25Absalom haud Amasa äwa de Armee jestalt en Joab siene Städ. Amasa siene Elren wieren Jeter, een Israelit, un Abigal. Abigal wia Nahasch siene Dochta un see wia Joab siene Mutta Zeruja äare Sesta. #2Sam 19,14; 1Chr 2,16-17 26Un de Israeliten, unja Absalom, hauden äa Loaga en de Gilead Jäajent. 27Aus David bie Mahanajim wia, brochten Schobi, Nahasch sien Sän von Raba mank de Amonita, un Machir, Amiel sien Sän von Lo Dabar, un Barsillai, de Gileadita von Roglim, #2Sam 9,4; 1Kjen 2,7; 1Chr 19,1 28Baden, Wauschkommen, un Tap, un uk Weit, Joascht, Mäl, jereeschte Kjieena, Schaublen, Oaften, 29Honnich, Schmaunt, un Gloms un Schopskjees, soo daut David un siene Menschen to äten hauden. See wisten daut David un siene Menschen en de Wiltnis wudd darschten, un hungren, un daut see wudden meed woaren.

Currently Selected:

2. Samuel 17: PB

Highlight

Copy

Compare