2. Petrus 3
3
Jesus woat wadakomen
1Leewe Frind, dit es nu aul de tweeda Breef, dän ekj no junt schriew, un mie es daut beid mol doarom to doonen jewast, reine Jedanken en junt to wakjen, daut jie doaraun denkjen, #2Pet 1,13 2waut jie von de Profeeten von oole Tieden jehieet haben, un aun waut wie Apostel junt von onsen Harn Jesus Christus siene Wieed jebrocht haben. 3Ieeschtens mott jie dit vestonen, daut en de latste Tiet Spetta komen woaren, dee soo läwen woaren aus äare ieejne Lost an drift, #1Tim 4,1; Jud 1,18 4un sajen: Wua blift hee met sien Vespräakjen, wadatokomen? Onse Vodasch sent aul jestorwen, un daut blift aula krakjt soo, aus don aus de Welt äaren Aunfank haud. #Jes 5,19; Hes 12,22; Mat 24,48 5-6Waut dee bloos nich seenen wellen, es dit: daut Gott de Welt, dee hee derch sien Krauftwuat jemoakt haud, aul eemol derch Wota venicht haft, un daut hee daut Wota om de Welt jebrukt haud, dee wada häatostalen. 7Oba de Himmel un de Ieed dee vondoag dän Dach bestonen, woaren wada derch daut selwje Wuat bewoat, om dan derch däm Fia to gonen, wan de gottloose woaren jerecht un vedaumt woaren.
8Oba vejät dit eene nich, leewe Frind, daut een Dach bie onsen Harn nuscht aundasch es aus 1.000 Joa, un 1.000 Joa nuscht aundasch aus een Dach. #Psa 90,4 9De Har vetrakjt sien Vespräakjen nich too lang, soo aus eenje meenen. Hee haft bloos Jedult met junt, #3,9 Eenje oole Schreften sajen haft Jedult om junt haulwen. wiels hee well, daut aulemaun sikj oppmoaken saul, un daut kjeena veloaren jeit. #Hab 2,3; 1Tim 2,4
10Oba dän Harn sien Dach woat soo komen aus een Stäla en de Nacht. Dan woat et schrakjlich krachen, un de Himmel woaren oppjeleest woaren. Un doa woat soone Hett sennen, daut daut wuarut de Welt jemoakt es, veschmelten woat. Un de Ieed un waut doabowen es, woat en Flaumen oppgonen. #Jes 24,19; Mat 24,29; 1Tess 5,2-3; Opb 20,11
11Wan dit om ons nu aula vegonen un oppjeleest woaren saul, sull jie junt dan nich bemieejen heilich un fromm to läwen, 12un doano luaren, daut Gott sien Dach komen mucht, un methalpen #3,12 Eenje oole Schreften sajen werkjlich wenschen. daut et boolt passieren kaun? Daut es de Dach wan Gott de Himmel woat en Braunt saten, un daut wuarut de Welt jemoakt es derch Hett veschmelten woat! 13Wie oba hoolen ons aun Gott sien Vespräakjen, daut hee eenen nieen Himmel un eene niee Ieed schaufen woat, wua aules woat jerajcht sennen. #Jes 65,17; Opb 21,1.27
Blieft staunthauft un habt Moot
14Doawäajen, leewe Breeda, wiels jie doano luaren, sträft doano, daut jie woaren Fräd haben, un rein un fälaloos sennen, wan hee kjemt. #1Kor 1,7-8 15Un denkjt doaraun, daut junt Gott siene Jedult to june Radunk deent. Soo haft ons leewa Brooda Paulus uk jeschräwen, derch de Weisheit, dee hee jekjräajen haud. #Reema 2,4 16Dit es waut, wuavon hee en aul siene Breew rät. Välet doavon es schwoa to vestonen, un de ojjelieede un leichtfoadje vedreien daut to äa ieejnet vedoawen, jrod soo aus see de Schreft uk opp aundre Städen vedreien.
17Oba wiels jie, leewe Frind, dit em verut weeten, siet väasechtich, daut jie nich derch de ruchloose un onjehuarsome äaren Errtum met an toop veleit woaren, un junen ieejnen Grunt velieren. 18Oba waust en Jnod un aun Erkjantnis aun onsen Harn un Heilant Jesus Christus. Hee saul de Iea en aule Eewichkjeit haben! Amen.
Currently Selected:
2. Petrus 3: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.