2. Kjennichs 5

De aramäischa Kommandaunt woat jesunt

1Naaman wia de Kommandaunt von de Armee fa däm Kjennich von Aram. Hee fieed eene wichtje Roll un wia huach aunjeseenen von däm Kjennich. De Har haud de Aramäa siejen loten derch am. Oba wan hee uk een butajeweenelja Soldot en däm Kjrich wia, haud hee doch eene schlemme Hutkrankheit. 2De Aramäa äare Soldoten wieren emol jäajen Israel jegonen un hauden eene junge Mejal met trigj jeschlapt. Dise Mejal wia eene Deenstmejal fa Naaman siene Fru. 3Een Dach säd see to äare Wieetsche: Wan dien Maun doch kunn no dän Profeet en Samaria gonen. Dee wudd am kjennen von siene Hutkrankheit frie moaken. 4Dan jinkj Naaman no sienen Kjennich un vetald am waut de Mejal jesajcht haud. Hee säd: Soo un soo haft de Mejal, dee von Israel es, jesajcht. 5Un de Kjennich von Aram säd: Go emol doahan. Ekj woa eenen Breef schriewen fa dän israelitischen Kjennich. Un Naaman fua doahan un neem 500 Kilo Selwa un 70 Kilo Golt un tieen sindoagsche Kjleeda met. 6Hee brocht däm Breef no däm Kjennich en Israel. De Breef säd: Wan du disen Breef kjrichst, dan weetst, daut ekj mienen Kommandaunt Naaman no die jeschekjt hab, om daut du am frie moakst von siene Hutkrankheit. 7Oba aus de Kjennich von Israel dän Breef laus, reet hee siene Kjleeda twei un säd: Sie ekj dan Gott, daut ekj kunn Läwen nämen un wada häastalen? Wuarom schekjt hee disen Maun no mie, daut ekj am saul von siene Krankheit frie moaken. Well wie oppaussen, daut hee nich eene Sach sieekjt, daut hee sikj met mie strieden kaun.

8Aus Elisa, de Gottesmaun, hieed, daut de Kjennich von Israel siene Kjleeda twei jeräten haud, schekjt hee eenen Deena un leet am sajen: Wuarom hast du diene Kjleeda twei jeräten? Lot däm Maun no mie komen, soo daut hee woat enwoaren, daut doa een Profeet en Israel es. 9Un soo kjeem daut, daut Naaman met Pieed un Woages no Elisa fua un doa ver siene Däa stell hilt. 10Un Elisa schekjt eenem no Naaman un leet am sajen: Go un wausch die säwenmol em Jordan. Dan woat dien Fleesch wada jesunt woaren un du woascht rein sennen. 11Dan wort Naaman vedrislich un fua wajch. Hee säd: Ekj docht hee wudd selfst no mie rutkomen un ver mie dän Nomen von däm Harn, sienen Gott aunroopen un siene Haunt soo un soo bewäajen un mie soo von miene Krankheit frie moaken. 12Sent nich de Abana un de Parpar, onse Riefasch en Damaskus, bäta aus aulet Wota en Israel? Wuarom kunn ekj mie nich en dee wauschen un rein woaren? Un hee dreid sikj wajch un fua sea vestemt wieda. 13Dan bemieejden sikj siene Deena om am un säden to am: Gooda Voda, wan de Profeet waut grootet von die velangt haud, hautst daut dan nich jedonen? Wooväl leewa sust du nich doonen, waut hee jesajcht haft, wan du bloos wauschen un rein woaren brukst. 14Dan jinkj hee rauf, un dukt sikj säwenmol unja em Jordan, soo aus de Gottesmaun jesajcht haud. Un sien Fleesch wort wada soo jesunt aus daut Fleesch von eenen jungen Jung, un hee wia gaunz jeheelt. #3Mo 14,7-9; Luk 4,27 15Dan fuaren hee un aul siene Lied trigj no däm Gottesmaun, un hee kjeem ver am stonen. Un hee säd: Kjikj emol, nu weet ekj daut oppe gaunze Ieed nich een Gott es, buta en Israel. Ekj bedd die, nemm de Jeschenkja, dee ekj fa die jebrocht hab. Ekj sie die daut schuldich. #2Kjen 5,5 16Oba Elisa säd: Soo secha aus de Har läft, däm ekj deen, ekj woa daut nich nämen. Un jana prachad am, daut hee dee nämen sull, oba hee deed daut nich. 17Dan säd Naaman: Wan du mien Jeschenkj nich nemst, dan lot mie, dien Deena, doch soo väl Ieed metnämen aus twee Mulasch droagen kjennen. Ekj well nich mea aundre Jetta aunbäden ooda fa an Brauntopfa moaken, buta bloos fa dän Harn. 18Bloos mucht de Har mie Jnod wiesen, wan mien Kjennich en dän Rimmon Tempel jeit om doa auntobäden, un hee sikj opp mienen Oarm länt un ekj uk en dän Tempel aunbäden doo. Mucht de Har mie doawäajen vejäwen.

19Un hee säd to am: Go en Fräd. Aus Naaman aul een enjskje oppem Wajch wia, 20säd Gehasi, Elisa sien Deena, to sikj selfst: Horch emol. Mien Har haft disen Aramäa, Naaman, met aul siene Jeschenkja loten wieda foaren. Hee haft nuscht jenomen von daut, waut hee am jebrocht haud. Soo secha aus de Har läft, ran ekj am noch hinjaraun un lot mie waut von am jäwen. 21Un soo spood Gehasi sikj Naaman entoholen. Aus Naaman sach daut hee am hinjaraun kjeem, hilt hee aun un stieech vom Woagen rauf. Hee jinkj am entjäajen un säd: Es aules goot? 22Un hee säd: Jo, oba mien Har schekjt mie daut ekj die sajen sull, daut doa sent twee Mana von de Efraim Boaj no am jekomen. Daut sent Jinja von de Profeeten. Kaust du bitscheen 50 Kilo Selwa un twee sindoagsche Kjleeda fa an jäwen. 23Naaman säd: Nemm 100 Kilo Selwa. Un hee dwunk am un bunk 100 Kilo Selwa en twee Sakj un neem twee heljedoagsche Kjleeda un jeef twee von siene Deena dee. Dee druagen dee dan ver Gehasi. 24Aus see dan bat däm Boajch kjeemen, neem hee de Sachen von de Deena un läd dee en daut Hus nenn, un leet de Mana gonen. 25Aus dee wajchjegonen wieren, jinkj hee no sienen Harn. Un Elisa säd to am: Von wua kjemst, Gehasi? Un hee säd: Ekj sie nich hia uk nich dort han jegonen. 26Un Elisa säd: Wia ekj nich em Jeist met die, aus de Maun die entjäajen kjeem von sien Woagen? Es dit eene Tiet toom Jelt, Kjleeda, Oliewengoades, Wiengoades, Schop, Vee, un Oabeida un Kjäakjsches nämen? 27Oba de Hutkrankheit woone Naaman haud, woaren du un diene Nokomen opp emma haben. Un aus Gehasi von am wajchjinkj, wia hee Schnee witt von de Hutkrankheit.

Currently Selected:

2. Kjennichs 5: PB

Highlight

Compare

Copy