2. Kjennichs 21

De Kjennichs Manasse un Amon en Juda

(2Chr 33,1-20)

1Manasse wia twalw Joa oolt aus hee Kjennich wort, un hee wia fa 55 Joa Kjennich en Jerusalem. Siene Mutta heet Hefzi Bah. 2Manasse deed waut däm Harn schlajcht jefoll. Hee eewd de oppscheiselje Sitten, dee de Velkja hauden, woone de Har von ver Israel utjerot haud. 3Hee bud wada de huage Opfastäden opp, dee sien Voda Hiskia doljeräten haud. Hee stald Aultoaren opp fa Baal un muak een Ascherabilt, soo aus Ahab, de Kjennich von Israel, jedonen haud. Hee bäd aul dee aun, dee em Himmel Macht eewen, un deend dee. #1Kjen 16,33 4Hee bud Aultoaren fa aundre Jetta en däm Harn sien Hus, wan de Har doch jesajcht haud, daut en Jerusalem woa ekj mienen Nomen eene Woninj jäwen toom mie aunbäden. 5Hee bud en beid Häw von däm Harn sien Hus Aultoaren fa dee, dee em Himmel Macht eewen, #2Kjen 23,12 6un muak een Brauntopfa von sienen Sän. Hee jleewd aun Diedungen un Tieekjen un jeef sikj auf met soone, waut met Vestorwne räden un butajeweeneljen Rot hauden. Hee deed välet waut däm Harn schlajcht jefoll un am reizten. #3Mo 18,21; 2Kjen 16,3 7Hee stald daut Ascherabilt en däm Harn sienen Tempel opp, wan de Har doch to David un sienen Sän Salomo jesajcht haud, daut hee dit Hus un Jerusalem von mank aul de Stam en Israel jewält haud, daut hee sienen Nomen doa opp emma haben wull. #1Kjen 8,29; 9,3 8Un hee haud jesajcht, daut hee wudd daut nich tooloten daut de Israeliten ut dit Launt, waut hee an jejäft haud, rutjejoacht woaren wudden, soo lang aus see aules soo deeden un biebehilden, aus hee an daut oppjelajcht haud, un daut Jesaz hilden waut Moses, dee am deend, an jejäft haud. 9Oba see jehorchten nich. Manasse veleid an, daut see schlemre Dinja deeden aus dee Velkja, dee de Har ver an utrod.

10Un de Har säd to de Profeeten dee am deenden: 11Wiels Manasse, de Kjennich en Juda, soone oppscheiselje Dinja deed, dee oaja wieren aus de oppscheiselje Dinja, dee de Amorita deeden, dee doa ver am wieren, un wiels hee uk Juda haft met siene Jetta toom sindjen veleit, 12doawäajen sajcht de Har, Israel äa Gott: Horcht emol, ekj woa Schoden opp Jerusalem un Juda komen loten, soo daut dee, dee doavon hieren, de Uaren zinjren woaren. #Jer 19,3 13Un ekj woa dän Motbaunt äwa Jerusalem trakjen soo aus ekj äwa Samaria deed, un daut Bliejewicht biehenjen, soo aus ekj daut äwa Ahab siene Nokomen deed. Un ekj woa Jerusalem utweschen, soo aus eena eene Schiew utwescht, un woa an omstelpen. 14Un wäa dan noch äwablift von mien Volkj, dee woa ekj wajchschmieten un en äare Fiend äare Macht jäwen. See woaren beplindat un bestolen woaren von aul äare Fiend, 15wiels see daut jedonen haben, waut mie nich jefelt. See haben mie von däm Dach aun jereizt aus ekj äare Vodasch ut Ägipten rut brocht. Un see doonen bat däm vondoagschen Dach noch soo.

16Un dan noch, buta daut Manasse Juda toom sindjen veleid, soo daut see deeden waut däm Harn schlajcht jefoll, brocht hee väl oschuldje Menschen om. Doa wia Bloot en Jerusalem von een Enj bat daut aundre. #2Kjen 24,4; Psa 106,38 17Daut äwaje waut von Manasse to sajen es un waut hee jedonen haft, un de Sinden, dee hee deed, dee sent aula en daut Buak von de Jeschicht von de Kjennichs en Juda oppjeschräwen. 18Un Manasse storf un hee wort en sien Husgoaden begroft. Daut heet Usa sien Goaden. Un sien Sän Amon wort Kjennich no am.

19Amon wia 22 Joa oolt aus hee Kjennich wort. Hee wia fa twee Joa Kjennich en Jerusalem. Siene Mutta heet Meschullemet, un wia Haruz von Jotba siene Dochta. 20Un Amon deed waut däm Harn schlajcht jefoll, soo aus sien Voda Manasse jedonen haud. 21Hee läwd gaunz soo aus sien Voda jeläft haud, un deend de Jetta, dee sien Voda jedeent haud, un bäd dee aun. 22Hee jeef nuscht rom om däm Harn, siene Vodasch äa Gott. Hee läwd nich soo aus de Har daut haben wull. 23Un siene aunjestalde Mana muaken eenen Plon am omtobrinjen, un see schluagen däm Kjennich en sien Hus doot. 24Oba de Lied en daut Launt brochten aul dee om, dee en dän Plon jewast wieren, dän Kjennich omtobrinjen. Un de Lied en daut Launt muaken Amon sien Sän Josia toom Kjennich. 25Daut äwaje, waut Amon deed, es en daut Buak von de Jeschicht von de Kjennichs en Juda jeschräwen. 26Aus hee storf, begrowden see am en Usa sienen Goaden. Un sien Sän Josia wort Kjennich no am.

Currently Selected:

2. Kjennichs 21: PB

Highlight

Compare

Copy