2. Kjennichs 18

De Kjennich Hiskia en Juda

(2Chr 29,1-2; 31,1)

1Aus Hoschea, Ela sien Sän en sien dreddet Joa aus Kjennich von Israel wia, wort Hiskia, Ahas sien Sän, Kjennich äwa Juda. #2Kjen 16,20 2Hiskia wia 25 Joa oolt aus hee Kjennich wort un wia fa 29 Joa de Kjennich en Jerusalem. Siene Mutta wia Abi, Secharja siene Dochta. 3Hiskia deed waut ver däm Harn rajcht wia, soo aus sien Staumvoda David jedonen haud. #2Kjen 20,3 4Hee venicht de huage Opfastäden un bruak de Steenmol dol un hakt de Bilda von de Aschera dol. Hee schluach de bronsne Schlang twei, woone Moses jemoakt haud. Bat don hauden de Israeliten Ruakopfa fa dee jemoakt. See nanden dee Nehuschtan. #4Mo 21,8-9; 2Kjen 15,35 5Hee veleet sikj opp däm Harn, Israel äaren Gott. Doa wia kjeen aundra Kjennich von Juda no siene Tiet soo aus hee, un wia uk kjeena soo ver am jewast. #2Kjen 23,25 6Hee hilt sikj gaunz aun däm Harn, un wonk nich von am wajch. Hee hilt de Jebooten, dee de Har Moses jejäft haud. 7Un de Har jinkj met am; un en aules waut hee deed, haud hee Jlekj. Hee stald sikj jäajen däm assierischen Kjennich un deend däm nich mea. 8Hee schluach de Filista un beplindad de Städa, wua see aunjesiedelt wieren, von daut kjlanste Darp bat de Städa dee Mieren un Jewäa hauden, soogoa Gaza un de Jäajent rom Gaza.

9Un en Hiskia sien vieedet Joa aus Kjennich von Juda, daut wia daut säwende Joa daut Hoschea, Ela sien Sän, Kjennich von Israel wia, kjeem Salmanasar, de Kjennich von Assierien met siene Armee jäajen Israel un loagad sikj rom Samaria. #(9-12) 2Kjen 17,3-6 10No dree Joa kunn hee de Staut ennämen. Daut wia daut saste Joa daut Hiskia Kjennich wia, un daut näajende Joa daut Hoschea Kjennich von Israel wia aus Samaria enjenomen wort. 11De assierischa Kjennich veschlapt de Israeliten no Assierien un siedeld dee en Halach aun, un delenjd dän Habor Riefa en Gosan, un en de Meeda äare Städa. 12Dit wort wiels de Israeliten nich dän Harn äaren Gott jehorchten. See hilden nich dän Bunt ooda aul daut waut Moses an jeboden haud. See pausten doa nich no opp un jehorchten daut nich.

13Aus Hiskia en sien 14. Joa Kjennich wia, kjeem Sanherib, de Kjennich von Assierien met siene Armee jäajen Juda. Hee neem aul de Städa en, waut eene Mia un Jewäa hauden. 14Dan schekjt de Kjennich Hiskia von Juda eene Norecht no dän assierischen Kjennich en Lachisch un säd: Ekj hab orrajcht jedonen. Wan du mie woascht tochloten, dan woa ekj die krakjt daut jäwen waut du haben west. Un de Kjennich von Assierien velangd 300 Talenten Selwa un 30 Talenten Golt von Hiskia, dän Kjennich von Juda. 15Hee jeef am aul daut Selwa waut en däm Harn sien Hus un uk daut waut en däm Kjennich sien Hus wia. #2Kjen 16,8 16Un Hiskia neem daut Golt, met woont hee de Däaren un daut Däarejerecht aun däm Harn sien Tempel belajcht haud, un jeef däm assierischen Kjennich daut.

17Un de assierischa Kjennich schekjt dän Tartan, dän Rabsaris un dän Rabschake met eene groote Armee von Lachisch no Jerusalem no däm Kjennich Hiskia. Aus see doahan kjeemen, stalden see sikj bie de Wotaleitinj von daut huage Wotaloch han. Daut es opp däm Wajch no de Städ wua see Woll wauschen. #Jes 7,3 18Un de Assiera roopten däm Kjennich von doa. Un Eljakim, Hilkija sien Sän, dee de Oppsechta fa däm Paulaust wia, Schebna, dee de Schriewa wia, un Joach, Asaf sien Sän, dee de Bieekja von de Jeschicht von daut Kjennichrikj oppbewoad, jinjen no an. 19Un de Rabschake säd to an: Sajcht däm Kjennich Hiskia: Dit es waut de groota Kjennich, de Kjennich von Assierien sajcht: Woo best du die soo secha? Opp waut velatst du die? 20Kjennen een poa Wieed jäajen dän Plon von eenen Kommandaunt ooda jäajen de Jewault von eenen Kjrich stonen? Opp wäm velatst du die, nu daut du die jäajen mie jestalt hast? 21Velatst du die opp Ägipten? Dee sent aus een vespellada Stock, soo daut wan sikj doa wäa bowen länt, spekjt am dee derch de Haunt. Daut es waut de ägiptischa Kjennich to aul dee deit dee sikj opp am veloten. #Hes 29,6-7 22Ooda proow jie to sajen, daut jie junt opp däm Harn, junen Gott veloten. Haft Hiskia nich krakjt däm siene huage Opfastäden oppjeriemt, un to Juda un Jerusalem jesajcht, daut jie sellen bloos bie däm Aultoa en Jerusalem aunbäden? #5Mo 12,14 23Mien Har, de assierischa Kjennich vesprakjt die 2.000 Pieed, wan du opp jieda eent von de Pieed eenen Ritta stalen kaust. 24Woo jleefst du daut du de Macht von däm Kapitän von onsen Kjennich siene schwakste Aufdeelunk trigj hoolen woascht, wan du die opp de Woages un Pieed von Ägipten veloten deist. 25Un dan uk noch, jleefst du daut wie sent onen däm Harn häa jekomen om junt to venichten. De Har säd to mie: Go emol no daut Launt un venicht daut.

26Dan säden Eljakim, Hilkija sien Sän, Schebna un Joach to däm Rabschake: Räd doch to ons opp aramäisch. Daut vesto wie goot. Räd nich ver onse Lied dee hia opp de Mia sent, opp Hebräisch. 27Oba de Rabschake säd to an: Haft mien Har mie no dienen Harn un no junt jeschekjt, daut ekj nich uk saul dise Norecht to dee sajen, dee opp de Mia sent. Dee woaren krakjt soo met junt toop äa ieejnet Mest fräten un äaren ieejnen Pisch drinkjen. 28Dan stunt de Rabschake opp un roopt lud opp Hebräisch: Horcht waut de groota Kjennich, de Kjennich von Assierien sajen lat. 29Dit es waut de Kjennich sajcht: Lot junt nich hinjat Licht fieren von Hiskia. Dee kaun junt nich ut miene Macht raden. 30Un lot junt nich von Hiskia beräden, daut jie junt opp däm Harn veloten sellen, wan hee uk sajcht daut de Har junt raden woat, un daut dise Staut nich woat von däm Kjennich von Assierien enjenomen woaren. 31Horcht nich no Hiskia. De assierischa Kjennich sajcht: Moakt een Äwareenkomen met mie un jäft junt han fa mie. Dan woat een jiedra von siene Wienrank un von sienen Fiejenboom äten un von sienen Borm drinkjen, #1Kjen 5,5 32bat ekj kom un junt no een Launt näm, daut soo es aus jun Launt. Doa es Jeträajd, Wien, Broot, un Honnich, un doa sent Wiengoades un Oliewenbeem. Dan woa jie aum Läwen bliewen un nich stoawen. Horcht nich no Hiskia. Dee veleit junt wan hee sajcht daut de Har junt raden woat. 33Haben de Jetta von de aundre Lenda an jerat von de Macht von däm assierischen Kjennich? #Jes 10,10-11 34Wua sent de Jetta von Hamat un Arpad nu? Wua sent de Jetta von Sefarwajim, Hena un Awa opp woone de Lied von Samaria sikj veleeten? Haben dee Samaria jerat jäajen miene Macht? 35Es doa wua een Gott mank de Jetta von aule Lenda, dee sien Launt haft ut miene Jewault jerat? Wuarom jleew jie, de Har woat Jerusalem ver miene Macht bewoaren? #Dan 3,15 36Oba daut Volkj säd nuscht un wia stell, wiels de Kjennich haud jesajcht, daut see nuscht to am sajen sullen. 37Un Eljakim, Hilkija sien Sän, dee de Oppsechta fa däm Paulaust wia, un Schebna, dee de Schriewa wia, un Joach, Asaf sien Sän, dee de Bieekja von de Jeschicht von daut Kjennichrikj oppbewoad, jinjen no Hiskia. See hauden sikj de Kjleeda twei jeräten, un vetalden am waut de Rabschake jesajcht haud.

Currently Selected:

2. Kjennichs 18: PB

Highlight

Compare

Copy