2. Kjennichs 10

Jehu brinjt Ahab siene Nokomen om

1Ahab siene 70 Säns wieren en Samaria. Un Jehu schreef eenen Breef un schekjt dän no Samaria. De Breef wia aun de Stautsbeaumte, de Leidasch, un dee waut äwa Ahab siene Nokomen jestalt wieren, jeschräwen. En däm Breef haud hee soo jeschräwen: 2Jie haben doa en Samaria aul de Nokomen von junen Kjennich, un jie haben doa siene Pieed un Woages un uk Jereetschoft en june Städa met Mieren toom junt secha hoolen. Doawäajen saj ekj, daut soo boolt aus jie disen Breef kjrieen, 3sell jie dän basten Maun von däm Kjennich siene Säns opp sienen Voda sien Troon aus Kjennich aunstalen. Un kjamft fa junen Kjennich. 4Oba dee hauden groote Angst un säden: Horcht emol, dee twee Kjennichs kunnen nich jäajen am stonen. Woo kjenn wie dan jäajen am stonen? 5Un de Oppsechta fa dän Paulaust un de Vewaulta von de Staut un de Leidasch un dee waut äwa Ahab siene Nokomen jestalt wieren, schekjten eene Norecht trigj no Jehu un säden: Wie sent diene Deena. Wie wellen aules doonen, waut du von ons velangst. Wie wellen hia kjeenen toom Kjennich aunstalen. Doo waut du west. 6Un Jehu schreef an trigj un säd: Wan jie mie unjastetten un daut doonen wellen waut ekj haben well, dan nämt de Kjap von de Nokomen von junen Kjennich un brinjt mie dee morjen zemorjes om dise Tiet no Jesreel. Nu wieren doa 70 Säns vom Kjennich; un de Leidasch von de Staut wieren äwa dee jestalt. 7Aus see dan dän tweeden Breef kjrieejen, neemen see däm Kjennich siene Säns un muaken dee doot. See läden dee äare Kjap en Kjarw un schekjten dee no Jehu en Jesreel. 8Un Jehu sien Deena kjeem no am un säd: See haben de Kjap von däm Kjennich siene Säns jebrocht. Un Jehu säd: Moakt twee Hupes von dee, butarem Puat, un lot dee doa bat morjen. 9Zemorjes jinkj hee rut un stunt biem Puat. Un hee säd to daut gaunze Volkj: Sent jie onen Schult? Ekj wia deejanja dee eenen Plon jäajen däm Kjennich muak un am ombrocht. Oba wäa haft dise doot jemoakt? 10Moakjt junt daut nuscht waut de Har jäajen Ahab jesajcht haft, woat wajchfaulen. De Har haft daut jedonen, waut hee derch sienen Deena Elia säd. #1Kjen 21,21 11Un dan brocht Jehu aul de äwaje von Ahab siene Nokomen en Jesreel om. Aul de Leidasch, un sien Frintschoft, un siene Priesta worden aula doot jemoakt, bat nich eena äwableef. #Hos 1,4

12Dan muak Jehu sikj opp däm Wajch no Samaria. Hinjawäajes bie Bet Eked, de Hoads Städ, 13bejäajend hee de Breeda von Ahasja, däm Kjennich von Juda. Un hee säd to an: Wäa sent jie? Un dee säden: Wie sent Ahasja siene Breeda, un wie wellen de Nokomen von däm Kjennich un de Kjennichsche besieekjen. #(13 un 14) 2Chr 22,8 14Un hee säd to siene Mana: Lot dee nich aum Läwen. Un see neemen dee aula faust un brochten dee bat opp däm latsten om. Daut wieren 42 Mana, un dit wort bie däm Borm bie Bet Eked.

15Un aus see von doa wieda fuaren, troff hee Jonadab, Rechab sien Sän. Dee kjeem am entjäajen. Un Jehu bejreest am un säd: Kaun ekj mie opp die veloten, soo aus du die opp mie veloten kaust? Un Jonadab säd: Jo. Un Jehu säd: Wan du daut soo meest, dan jeff mie diene Haunt. Un Jonadab jeef am siene Haunt. Un Jehu neem am opp sien Woagen nopp. #Jer 35,6 16Un Jehu säd: Komm met mie met un see woo iewrich ekj fa däm Harn oabeiden doo. Un hee leet am opp sienen Woagen metfoaren. 17Aus see dan bat Samaria kjeemen, brocht hee aul dee Menschen om, waut noch von Ahab siene Famielje wieren. Doa bleef nuscht von Ahab siene Famielje, krakjt soo aus de Har to Elia jesajcht haud. #1Kjen 21,21

Jehu brinjt de Baals Profeeten om

18Dan kroagd Jehu daut gaunze Volkj toop un säd to an: Ahab haft Baal een kjlien bät jedeent; Jehu woat am väl dolla deenen. #1Kjen 16,31-33 19Roopt emol aul de Baals Profeeten toop, aul dee waut Baal aunbäden, un aul siene Priesta. Lot kjeenem ut, wiels ekj well een grootet Opfa fa Baal moaken. Wan doa wäa nich kjemt, dee saul doot jemoakt woaren. Jehu wia lestich aus hee dit deed. Hee wull aul dee, dee Baal deenden, ombrinjen. 20Un Jehu säd: Well wie een heiljet Fast fa Baal moaken. Un see muaken daut aulawäajen bekaunt. 21Jehu leet daut aulawäajen en Israel bekauntjäwen un wull haben daut aul dee waut Baal deenden sullen bat opp däm latsten komen. Un see jinjen en Baal sien Hus, un daut wort bat aule Akjen voll. 22Un hee säd to däm dee äwa de Kjleedastow wia: Brinjt de Baals Kjleeda rut fa aul dee waut Baal deenen. Un see brochten dee Kjleeda. 23Dan jinkj Jehu en daut Baalshus nenn, un Jonadab, Rechab sien Sän jinkj met am. Un hee säd to dee waut Baal deenden: Moakt junt secha daut hia kjeena es, dee dän Harn deent. Hia sellen bloos soone sennen waut Baal deenen. 24Un Jehu un Jonadab jinjen nenn om de Opfa un Brauntopfa to brinjen. Oba hee haud 80 Mana buta daut Hus aunjestalt un dee jesajcht: Wan jie hia een Mensch loten wajch komen, dan woat daut jun Läwen kosten. 25Aus Jehu dan daut Brauntopfa foadich jemoakt haud, säd hee to siene Wajchta un aunjestalde: Got nenn un schlot jiedrem doot. Lot nich eenen wajchkomen. Un see jinjen un brochten dee aula met daut Schwieet om, un schlapten de Doodes rut. Un de Wajchta un aunjestalde jinjen en de Bennastowen nenn, #1Kjen 18,40 26un brochten de Past rut, dee fa de Jetta oppjestalt wieren un vebrenden dee. #2Kjen 11,18 27Un see bruaken daut steenane Denkjmol von Baal un daut gaunze Hus dol. Un de Lied brukten de Städ fa Aufgank, soo aus see vondoag noch doonen.

28Soo rod Jehu dän Baal ut en Israel. 29Oba hee leet nich no met de Sinden dee Jerobeam, Nebat sien Sän, enjefieet haud un Israel toom sindjen veleid. Hee behilt de goldne Kjalwa en Betel un Dan. #1Kjen 12,26-33

30Un de Har säd to Jehu: Wiels du daut rajchte jedonen hast, doarenn daut du deetst waut ekj haben wull, un hast met Ahab siene Nokomen jedonen waut ekj em Senn haud, woaren vea Jennerazionen von diene Kjinja opp däm Troon setten. 31Oba Jehu wia nich väasechtich, daut hee von sien gaunzet Hoat de Väaschreften von däm Harn, Israel äaren Gott, hilt. Hee hieed nich opp met Jerobeam siene Sinden, met woone hee Israel toom sindjen veleit haud.

32To dee Tiet, funk de Har aun Stekja von Israel wajch to nämen. Hasael neem de gaunze Jäajent en, #2Kjen 8,12 33waut oosten vom Jordan licht, daut Launt von Gilead, von de Staut Aroer, dee aum Arnon es, bat Gilead un Baschan, de Jäajent wua de Stam Gad, Ruben un Manasse wonden.

34Waut noch von Jehu to sajen es, äwa aules waut hee jedonen haft un waut vonne Macht hee haud, daut es aula en daut Buak von de Jeschicht von de Kjennichs en Israel jeschräwen. 35Un aus Jehu storf, begrowden see am en Samaria. Jehu sien Sän Joahas wort Kjennich no am. #2Kjen 13,1 36Jehu wia fa 28 Joa de Kjennich äwa Israel en Samaria.

Currently Selected:

2. Kjennichs 10: PB

Highlight

Compare

Copy