2. Chronik 34
34
De Kjennich Josia riemt dän Deenst aun framde Jetta opp
(2Kjen 22,1-2; 23,4-20)
1Josia wia acht Joa oolt, aus hee Kjennich wort; un hee rejieed 31 Joa en Jerusalem 2un läwd no daut Väabilt von sienen Staumvoda David, un deed waut däm Harn jefoll; hee recht sikj strenj no däm siene Jebooten un Aunwiesungen. #2Chr 29,2
3En sien achtet Rejierungsjoa, aus hee noch sea junk wia, funk hee aun, no däm Harn, sienen Staumvoda David sienen Gott to sieekjen. Un en sien twalftet Rejierungsjoa funk hee aun, en Juda un Jerusalem de huage Opfastäden, de Ascherabilda un de utjehakte un jegotne Jettabilda opptoriemen. #(3 un 4) 3Mo 26,30 4Unja siene Oppsecht worden de Aultoaren von däm Aufgott Baal doljeräten. De Ruakopfa Aultoaren, dee doabowen stunden, leet hee entwei schlonen. De Aschera äare jeweide Pols un de utjehakte un jegotne Jettabilda vebruak hee un muak dee to Pulwa un streid daut opp dee äare Jräwa, waut dit selfstjemoakte Opfa jebrocht hauden. 5De Knoakes von de framde Jetta äare Priesta leet hee opp de Aultoaren vebrennen, wua see bowen jeopfat hauden. Soo deed hee Juda un Jerusalem von dise Sachen reinjen. #1Kjen 13,2 6Uk en de Städa von Manasse, Efraim, Simeon un bat Naftali, runtom mank daut vetrimmade, #2Chr 31,1 7reet hee de Aultoaren dol. Un de Ascherabilda un Jettabilda schluach hee entwei un vekjield dee to Grus; un aule Ruakopfa Aultoaren hakt hee en daut gaunze Launt Israel om. Un dan jinkj hee trigj no Jerusalem.
De Tempel woat utjebätat un daut Jesazbuak woat jefungen
(2Kjen 22,3-7)
8En sien 18. Rejierungsjoa, aus hee daut Launt un dän Tempel jereinicht haud, schekjt hee Schafan, Azalja sienen Sän, dän Stautskommandaunt Maaseja un dän Beroda Joach, Joahas sienen Sän, däm Harn sienen Tempel derchtooabeiden. 9Un see kjeemen no däm Huagenpriesta Hilkija, wua an daut Jelt jejäft wort, waut fa däm Tempel toopjebrocht wia. De Leviten, dee aun jieda Engank woakten, hauden daut von de Stam Manasse, Efraim un von aul dee waut en Israel äwajebläwen wieren, un uk von Juda un Benjamin un von dee, dee en Jerusalem wonden, jesaumelt. 10See äwajeewen daut Jelt de Bumeistasch, waut to däm Tempel derchoabeiden aunjestalt wieren; un dise jeewen daut aun dee waut aun dän Tempel oabeiden deeden, om daut Hus to vebätren un bruckboa to moaken. 11See tolden doavon Loon aun de Hauntoabeida un Buoabeida, un koften behakte Steena un Buholt to Klaumasch un Baulkjes fa de Jebieda, waut de Kjennichs von Juda hauden vefaulen loten. 12De Buoabeida oabeiden sea jewessenhauft. De Oppsecht äwa an hauden de Leviten Jahat un Obadja von Merari siene Nokomen, un Secharja un Meschullam von Kehat siene Nokomen. Un aundre Leviten, waut met Musikj Instrumenten omtogonen vestunden, 13wieren äwa de Toodroagasch aunjestalt un hauden uk de Oppsecht äwa aule aundre Oabeida. Un eenje Leviten wieren Schriewasch, Vewaultasch un Puatenwajchta.
Een Jesazbuak woat jefungen
(2Kjen 22,8-10)
14Oba aus see daut Jelt rutholden, waut de Lied nom Tempel jebrocht hauden, funk de Priesta Hilkija daut Buak met däm Harn sien Jesaz, waut de Har derch Moses jejäft haud. 15Dan säd Hilkija to däm Schriewa Schafan: Ekj hab en däm Harn sien Hus dit Jesazbuak jefungen. Un hee jeef Schafan de Buakroll. 16Schafan oba brocht dee nom Kjennich un berecht am un säd: See haben aules derchjefieet, waut du väajesajcht hast. 17See haben daut Opfajelt, waut em Tempel wia, rutjeholt un dee doafäa veauntwuatliche Mana un de Buoabeida jejäft. 18Un dan berecht hee däm Kjennich uk, daut de Priesta Hilkija am eene Buakroll jejäft haud, un laus däm Kjennich ut de Roll väa.
Däm Kjennich Josia jinkj een groota Schrakj derch
(2Kjen 22,11-20a)
19Aus de Kjennich de Wieed hieed, waut en daut Jesazbuak stunden, vereet hee siene Kjleeda. 20Un de Kjennich roopt Hilkija un Ahikam, Schafan sienen Sän, un Achbor, Michaja sienen Sän, Schafan, däm Schriewa, un Asaja, däm Kjennich sienen Deena, un säd: 21Got un froacht däm Harn om Rot wäajen de Wieed, waut en dit Buak stonen, waut jefungen es! Froacht am fa mie un fa aul dee, dee von Israel un Juda äwajebläwen sent. Wie haben däm Harn sienen grooten Oaja äwa ons jebrocht, wiels onse Vodasch däm Harn sien Wuat nich jehorcht haben un nich aules jedonen haben, waut en dit Buak jeschräwen steit.
22Dan jinjen Hilkija un de aundre Mana, waut de Kjennich jeschekjt haud, no de Profeetin Hulda un säden ar, wuawäajen see jekomen wieren. De Profeetin wond en daut niee Deel von Jerusalem; äa Maun Schalum, dee Tokhat sien Sän un Harha sien Grootsän wia, wia Oppsechta äwa de Kjleedastowen. 23Un see säd to an: Soo sajcht de Har, Israel äa Gott: Sajcht däm Maun, waut junt no mie jeschekjt haft: 24Soo sajcht de Har: Ekj woa Ojjlekj äwa dise Städ un äare Enwona brinjen. Jieda utjesproakna Fluch, waut en daut Buak jeschräwen steit, waut ver däm Kjennich en Juda es jeläst worden, lot ekj en Erfellunk gonen, #5Mo 28,15-68 25wiels see mie veloten un aundre Jetta jeopfat haben, om mie met äare selfstjemoakte Jettabilda ruttofodren. Un mien Oaja saul äwa dise Städ oppbrennen un nich utjelascht woaren. 26Oba to däm Kjennich von Juda, dee junt häajeschekjt haft, om dän Harn to froagen, sell jie soo sajen: Soo sajcht de Har, Israel äa Gott: Du hast de Wieed jehieet, 27waut ekj jäajen dise Staut un äare Enwona utjesproaken hab. Du hast die daut iernstlich aunjenomen un die doa unja jedeemooticht, un hast diene Kjleeda veräten un ver mie jehielt. Doawäajen hab ekj dien Jebäd erhieet, sajcht de Har. #2Chr 33,12-13 28Du woascht daut Ojjlekj, waut ekj äwa dise Städ un äare Enwona brinjen woa, nich met ieejne Uagen seenen. Du woascht en Fräd stoawen un en diene Vodasch äare Jräwa begroft woaren. Un see brochten däm Kjennich de Auntwuat.
De Kjennich Josia deit daut Volkj veflichten daut niee Jesaz to jehorchen
(2Kjen 22,20; 23,3)
29Un de Kjennich schekjt un leet aule Leida von Juda un Jerusalem no sikj roopen. 30Un de Kjennich jinkj nopp no däm Harn sienen Tempel, un aule Mana von Juda un de Enwona von Jerusalem, de Priesta, de Leviten un aulet Volkj, de aunjeseene uk de eefache Lied, jinjen nom Tempel. Un see leeten ver äare Uaren daut gaunze Jesazbuak väaläsen, waut em Tempel wia jefungen worden. 31Dan stieech de Kjennich opp sienen Plauz ver daut Tempelhus un muak eenen Bunt met däm Harn, daut see däm Harn jehorchen un siene Jebooten, Aunwiesungen un Rajchten iernstlich foljen wullen. Aule Wieed, waut en daut jefungne Jesazbuak jeschräwen stonen, sellen jeneiw befolcht woaren. #2Chr 15,12 32De Kjennich foddad aul dee waut tojäajen wieren von Jerusalem un ut däm Staum Benjamin opp, en disen Bunt nentoträden. Un daut gaunze Volkj von Jerusalem veflicht sikj däm Harn, äare Vodasch äaren Gott, to jehorchen. 33Josia leet uk en aul de aundre Jäajenden von Israel de oppscheiselje Jetta wajchriemen un brocht daut doahan, daut aule Enwona von Israel däm Harn, äaren Gott, deenden. Un soolang aus Josia läwd, bleewen see däm Harn, äare Vodasch äaren Gott, tru.
Currently Selected:
2. Chronik 34: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
