1. Tessalonicha 4

Een Läwen, daut Gott jefelt

1Wieda, Breeda, jie haben von ons jelieet, woo jie Gott to jefaulen läwen sellen, soo aus jie daut uk aul doonen. Nu froag wie junt un moaken junt en däm Harn Jesus Moot, daut jie doarenn noch emma toonämen. 2Jie weeten, waut wie junt derch däm Harn Jesus aunjeordent haben. 3Gott sien Wellen es dit, daut jie heilich läwen, daut jie junt von aule Huararie friehoolen. 4Jieda Maun saul lieren, sikj selfst to kontrollen, un saul vesieekjen met reine Jedanken un met Respakjt siene ieejne Fru to jewennen. 5Kjeena saul siene Fru brucken, om siene onbandje Lost to befrädjen, soo aus de Menschen daut doonen, dee nuscht von Gott weeten. 6Kjeena saul äwa de Jrenslienjes stieen un sienen Brooda en dise Sach utnutzen un schoden; de Har Gott es een Rechta äwa aul soone Sachen un woat daut bestrofen, soo aus wie junt daut verhäa jelieet haben. #3Mo 19,11 7Gott haft ons nich jewält, orrein to sennen, oba heilich. 8Wäa dit veachten deit, veacht nich Menschen, oba Gott, dee ons sienen Heiljen Jeist jejäft haft. #Luk 10,16

9Waut de Leew eena toom aundren aunbelangt, doaräwa bruck wie junt nich schriewen, wiels Gott selfst junt jelieet haft, eenaunda goot to sennen. #3Mo 19,18; Joh 13,34 10Un jie sent aule Glowensjeschwista en Mazedonien goot. Oba wie wullen junt Moot moaken, doarenn noch tootonämen. 11Lot daut eene Ierensach fa junt woaren, daut jie stell un ruich läwen, daut een jiedra sikj om siene Sach kjemmat un soo oabeit, aus wie junt daut jeliet haben. #Efs 4,28; 1Tess 2,9; 2Tess 3,8.12 12De Welt saul jun opprechtjet läwen seenen, un daut jie von kjeenem aufhenjich sent. #Kol 4,5

Stoawen, ea Jesus wadakjemt

13Breeda, wie wellen junt nich em onkloaren loten äwa dee, dee aul jestorwen sent, daut jie nich truaren brucken, soo aus dee, dee kjeene Hopninj haben. #1Kor 15,20; Efs 2,12 14Wiels wan wie jleewen, daut Jesus jestorwen un vom Doot oppjestonen es, woat Gott derch dän Harn Jesus un met am toop uk dee no sikj nämen, dee aul enjeschlopen sent. #Reema 14,9; 1Kor 15,3-4.12

15Dit saj wie junt met Jesus siene ieejne Wieed, daut wie, dee doa läwen un bliewen bat de Har wadakjemt, woaren dee nich veropp komen, dee aul enjeschlopen sent. #(15-17) Mat 16,28; 24,30-31; 1Kor 15,51-52; Joh 17,24 16De Har woat selfst vom Himmel raufkomen un lud sajen, waut passieren saul. De hechsta Enjel woat roopen un Gott siene Posaun woat jeblost woaren. Dan woaren dee, dee em Gloowen aun Christus seelich jestorwen sent, toieescht oppstonen. 17Dan woa wie, dee wie läwen un jebläwen sent, tojlikj met an opp de Wolkjen metjenomen woaren, un onsen Harn bejäajnen; un dan woa wie emma bie am sennen. #Joh 12,26 18Met dise Wieed treest junt unjarenaunda.

Currently Selected:

1. Tessalonicha 4: PB

Highlight

Copy

Compare