1. Samuel 4
4
De Bundeskjist woat wajchjenomen
1Waut Samuel säd, wort aulawäajen en Israel bekaunt. #Jos 15,53
Dan jinjen de Israeliten, daut see jäajen de Filista kjriejen wudden. De Israeliten hauden äa Loaga bie Eben Eser, un de Filista hauden äat bie Afek. 2Aus de Filista jäajen an kjeemen, kunnen de Israeliten an nich opphoolen. Daut jeef een grausoma Kaumf, wua bie 4.000 Israeliten storwen. 3Aus daut Kjrichsvolkj trigj no daut Loaga kjeem, säden de israelitische Leidasch: Wuarom haft de Har ons loten flichten von ver de Filista? Well wie emol däm Harn siene Bundeskjist von Silo holen, soo daut de Har medden mank ons komen woat un ons jäajen onse Fiend halpen woat. #2Mo 25,10; Jos 3,6.11 4Un see schekjten wäm no Silo, wua Hofni un Pinhas wieren, un see brochten däm Harn, dee aules rejieet, siene Bundeskjist. Dee haft sienen Troon tweschen de Cheruben opp daut Dakjsel von Gott siene Kjist. #2Mo 25,22; 2Sam 6,2 5Aus däm Harn siene Bundeskjist dan en daut Loaga kjeem, schrieejen de Israeliten aula opp, daut de Ieed scheddad. 6Aus de Filista daut Jeschrech hieeden, säden see sikj: Waut bediet dit Jeschrech von mank de Israeliten? Aus see hieeden, daut däm Harn siene Kjist en daut Loaga jekomen wia, 7ferchten see sikj un see säden: Een Gott es en daut Loaga jekomen! Dit kunn schlemm sennen. Wie haben noch nienich ea soont jehaut. 8Dit es schlemm. Wäa kaun ons von de Krauft von dise stoakje Jetta raden? Dit sent deeselwje Jetta dee emol de Ägipta met aul de Ploagen en de Wiltnis schluagen! 9Nu komt, jie Filista. Nu well wie an wiesen waut wie kjennen. Aundasch woa wie äare Deena sennen, soo aus see fa ons jewast sent. Nu well wie an wiesen waut fa Mana wie sent, un an dolschlonen. #Rech 13,1 10Un de Filista fieeden de Schlacht wieda un schluagen de Israeliten. De Israeliten veluaren sea un see randen aula wajch, een jieda no sien Tus. Doa wieren väl Doodes. Doa storwen 30.000 Kjrieja aun dän Dach. 11Un Gott siene Kjist wort faustjenomen un Eli siene twee Säns, Hofni un Pinhas, worden doot jeschloagen. #1Sam 2,34
Eli, de Priesta, stoaft
12Een Maun von däm Staum Benjamin rand von de Schlacht gaunz bat Silo dän selwjen Dach. Hee haud siene Kjleeda veräten un Ieed opp sien Kopp jestreit. 13Aus hee aunkjeem, saut Eli aun de Kaunt vom Wajch un wia beduat om Gott siene Kjist. Aus de Maun bat de Staut kjeem un siene Norecht jeef, schrieejen de Lied opp. 14Un aus Eli daut schrieen hieed, fruach hee: Waut meent dit Jeschrech? Dan kjeem de Maun schwind un vetald Eli waut jeworden wia. 15Eli wia don aul 98 Joa oolt un siene Uagen wieren bewossen, daut hee aul nuscht seenen kunn. #1Sam 3,2 16Un de Maun säd to Eli: Ekj sie von de Schlacht jekomen. Ekj sie doa mau vondoag wajchjerant. Un Eli fruach: Woo jinkj daut doa, mien Jung? 17Un jana met de Norecht säd: Israel es vondoag ver de Filista wajchjerant. Doa sent sea väl Doodes mank onse Menschen un diene twee Säns, Hofni un Pinhas, sent beid jestorwen. Un Gott siene Kjist haben see faustjenomen. 18Aus hee daut säd von Gott siene Kjist, foll Eli äwarigj von wua hee saut, dicht bie daut Stautspuat. Aus Eli foll bruak hee sien Jenekj un storf. Hee wia oolt un schwoafalich. Hee wia 40 Joa Rechta en Israel jewast.
19Eli siene Schwieedochta, Pinhas siene Fru, wia schwanga. Aus see hieed daut Gott siene Kjist jenomen worden wia, un daut äa Schwieevoda un äa Maun jestorwen wieren, kjrieech see äare Weedoag un haud een kjlienet. 20Un aus de Frues, waut ar bedeenden, sagen daut see storf, säden see: Enjst die nich! Du hast een Junkje. Oba see muak doa aul nuscht von sikj un säd aul nuscht. #1Mo 35,17 21See nand dän Jung Ikabod un säd: Israel es nich mea soo harlich. See säd daut, wiels Gott siene Kjist faustjenomen wia un wiels äa Schwieevoda un äa Maun jestorwen wieren. #1Sam 14,3; Psa 78,61 22See säd: Israel es nich mea soo harlich, wiels Gott siene Kjist faustjenomen es.
Currently Selected:
1. Samuel 4: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
