1. Samuel 12
12
Samuel siene latste Räd
1Un Samuel säd to de Israeliten: Ekj hab jedonen no waut jie fruagen. Ekj hab junt eenen Kjennich äwa junt jesat. #1Sam 8,7.22; 11,15 2Dee woat junt nu leiden. Un ekj, ekj sie oolt un greiwhoarich. Un miene Säns sent hia met junt. Ekj sie jun Leida jewast von don aus ekj junk wia. 3Nu sie ekj hia, ver däm Harn un ver sien enjesaulwden Kjennich un froag junt, von wäm hab ekj emol eenen Oss jenomen? Ooda von wäm hab ekj een Äsel jenomen? Hab ekj emol wäm beschummelt ooda too väl von wäm jenomen? Ooda von wäm hab ekj mie loten bekjeepen, daut ekj am entjäajen jekomen sie? Sajcht mie, wan ekj soont jedonen hab un ekj woa daut aula trigjtolen. #4Mo 16,15 4Un see säden: Du hast kjeenem beschummelt un von kjeenem too väl jenomen un du hast die von kjeenem loten bekjeepen. 5Un Samuel säd: De Har un sien enjesaulwda Kjennich sent vondoag Zeijen daut jie mie oschuldich jefungen haben. Un see säden: Jo, de Har es ons Zeij.
6Un Samuel säd to daut Volkj: De Har saul daut sennen, dee Moses un Aaron aunstald un dee ons Volkj ut Ägipten rutbrocht. 7Dan stot nu wua jie sent, wäajen ekj hool junt daut väa, waut de Har jedonen haft om junt un june Elren to raden. 8Aus Jakob no Ägipten trock, wort daut Volkj unjadrekjt von de Ägipta, oba june Vodasch roopten dän Harn aun, un de Har jeef an Moses un Aaron, daut see daut Volkj ut Ägipten rut brochten, un daut see en dit Launt aunsiedlen kunnen. #2Mo 3,7 9Oba see vegauten dän Harn, äaren Gott, un hee leet de Filista un dän Kjennich von Moab un dän Kjennich Jabin von Hazor, wua Sisera, de Kommandaunt von de Armee wia, jäajen an komen un an ennämen. #Rech 3,12; 4,2; 10,7; 13,1 10Un see roopten dän Harn aun, daut hee halpen sull, un säden: Wie haben jesindicht un ons von die, Har, wajchjedreit. Wie haben de Bilda von Baal un Astarte jedeent. Halp ons nu von onse Fiend äare Macht, un dan woa wie die deenen. #4Mo 21,7; Jos 7,20; Rech 10,10; Dan 9,9-19 11Un de Har schekjt Jerubaal un lota Barak un uk Jefta un dan mie, daut wie junt von june Fiend raden deeden un jie kunnen en Fräd läwen. #Rech 6,14.32; 4,6; 11,29; 1Sam 7,3 12Un aus jie dän Kjennich Nahasch von Amon sagen jäajen junt komen, veschmeet jie dän Harn aus jun Kjennich un säden: Wie wellen eenen Kjennich haben dee ons rejieren woat. #1Sam 8,19; 11,1-2 13Nu hab jie dän Kjennich, dän jie junt jewält haben. Jie fruagen no däm, un nu haft de Har junt däm jejäft. 14Wan jie woaren dän Harn ieren un am deenen un no am horchen un siene Jebooten hoolen, un jie un jun Kjennich junt no däm Harn junen Gott rechten woaren, woat daut goot met junt gonen. 15Oba wan jie nich no däm Harn horchen woaren un woaren onjehuarsom sennen, dan woat däm Harn siene Macht jäajen junt un junen Kjennich sennen. #Rech 2,15
16Nu stot un kjikjt. Jie woaren seenen daut de Har een grootet Wunda doonen woat. 17Nu es doch de Tiet toom Weit arnten. Oba ekj woa dän Harn bäden daut hee saul een Jewittastorm schekjen. Wan jie daut seenen woaren, dan woa jie weeten daut jie sea orrajcht jedonen haben en dit, daut jie däm Harn no een Kjennich jefroacht haben. 18Un Samuel bäd däm Harn fa däm Storm, un de Har schekjt dän Dach Jewitta un Räajen. Un daut gaunze Volkj haud Forcht fa Samuel un fa däm Harn. 19Un aule Menschen säden to Samuel: Bäd doch to däm Harn dienen Gott fa ons daut wie nich omkomen. Nu weet wie daut wie noch eene Sind bie onse aundre Sinden biejedroacht haben, doaderch daut wie no eenen Kjennich jefroacht haben. 20Un Samuel säd to daut Volkj: Enjst junt nich. Jie haben orrajcht jedonen, oba hieet nich opp däm Harn to deenen. Deent däm Harn met jun gaunzet Hoat. 21Jäft junt nich auf met de nuzloose Jetta. Dee kjennen junt nich halpen ooda raden. Dee haben kjeene Krauft. #5Mo 32,37-38; Jes 41,29 22No däm daut hee sikj emol eenich wort junt aus sien ieejnet Volkj to nämen, woat de Har junt nich aus sien Volkj veschmieten, wiels sien groota Nomen es soo sea to vetruen. #2Mo 19,6 23Oba daut saul von mie wiet wajch bliewen, daut ekj mie aun däm Harn vesindjen doo en däm daut ekj wudd opphieren fa junt to bäden. Ekj woa junt noch wieda unjarechten, waut daut goode un rajchte es, daut jie doonen sellen. #1Mo 18,23-32; 2Mo 32,11—34,32; 1Sam 7,8-9 24Jehorcht däm Harn un deent am tru, un von jun gaunzet Hoat. Denkjt emma aun de groote Dinja, dee hee fa junt jedonen haft. #5Mo 6,12-15 25Oba wan jie wieda beeset doonen, woa jie un jun Kjennich veschwinjen.
Currently Selected:
1. Samuel 12: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
