1. Kjennichs 20

Israel stritt met Aram

1Dan to dee Tiet, saumeld Ben Hadad, de Kjennich von Aram sikj siene gaunze Armee toop. Doa wieren 32 Kjennichs, dee am met äare Pieed un Kjrichswoages biestunden. Un hee jinkj nopp un beloagad Samaria un kjamft jäajen dee. 2Un Ben Hadad schekjt Norecht no Ahab, dän Kjennich en Israel, 3un säd to Ahab: Dien Selwa un dien Golt es mient. Un diene Frues un Kjinja sent uk miene. 4Un de Kjennich en Israel säd: Lot daut soo sennen aus du jesajcht hast, Kjennich Ben Hadad. Ekj jehia die, un aules waut ekj hab. 5Un dee waut jeschekjt wieren, kjeemen noch emol un säden: Ben Hadad sajcht: Ekj leet die sajen daut aul dien Selwa un dien Golt, un uk aul diene Frues un Kjinja sust du mie jäwen, 6oba nu woa ekj morjen om dise Tiet miene Deena no die schekjen, daut see dien Hus un de Hiesa von diene Menschen derchsieekjen, un see sellen aules waut wieetvoll es met sikj nämen. 7Dan roopt de Kjennich en Israel aule Leidasch en daut Launt toop un säd: Nu kjikjt emol woo väl disa von ons haben well. Hee schekjt no mie fa miene Frues un Kjinja, mien Selwa un mien Golt, un ekj jeef am kjeen Jäajenstaunt. 8Un aul de Leidasch un daut gaunze Volkj säden: Doo daut nich, un wellij nich en to daut. 9Un Ahab säd to Ben Hadad siene Mana: Sajcht mienen Harn un Kjennich, daut aules waut hee ieescht von mie, sien Deena, velangd, wia ekj reed to doonen, oba dit lot ekj nich. Un de Mana jinjen un druagen de Norecht trigj. 10Dan schekjt Ben Hadad Norecht trigj un säd: Lot de Jetta mie dit un daut doonen, wan en Samaria jenuach Stoff oppe Ieed es daut een jiedra von miene Mana eene Hauntvoll doavon kaun wajchdroagen. 11Un de Kjennich en Israel auntwuad: Sajcht am: Lot däm, dee sikj toom Kaumf reed moakt, nich soo puchen aus dee waut vom Kaumf kjemt. 12Ben Hadad kjrieech de Norecht aus hee met de Kjennichs en de Zelten drinkjen deed. Un hee säd to siene Mana: Een jieda opp siene Städ. Un see neemen äare Städen jäajen de Staut.

13Dan kjeem een Profeet no däm israelitischen Kjennich Ahab un säd: Dit es waut de Har sajcht: Du hast dise groote Maussen jeseenen. Ekj woa die dee vondoag en diene Macht jäwen, soo daut du weeten woascht, daut ekj de Har sie. 14Un Ahab fruach: Derch wäm? Un hee säd: Dit es waut de Har sajcht: Derch de aunjestalde von de Beaumte en de Stam. Un Ahab säd: Wäa saul dän Kaumf aunfangen? Un hee säd: Du. 15Dan tald Ahab de aunjestalde von de Beaumte en de Stam, un doa wieren 232. Un hee tald daut Volkj von Israeliten, un doa wieren 7.000 Mana. 16Bie Meddach jinjen de Truppen rut, aus Ben Hadad sikj met de 32 Kjennichs, dee am unjastetten, toop en de Zelten bedrinkjen deed. 17De aunjestalde von de Beaumte von de Stam jinjen veropp. Ben Hadad schekjt Spionen rut, un dee brochten Norecht un säden: Doa komen Mana ut Samaria rut. 18Un hee säd: Nämt dee läwendich faust, eendoont auf see opp Fräd ooda opp Kjrich rutkomen. 19Un de aunjestalde von de Beaumte jinjen rut un de Armee hinjaraun, 20un jieda Maun schluach däm doot dee ver am wia. Un de Aramäa randen wajch, un de Israeliten juagen an hinjaraun. Un Ben Hadad de Kjennich von Aram kjeem opp een Pieet met aundre Ritta toop doavon. 21Un de Kjennich von Israel jinkj rut un schluach Pieed un Woages dol. Daut jeef eene groote Schlacht un de Aramäa kjrieejen dän Dach eenen grooten Schoden.

22Dan jinkj de Profeet no däm Kjennich von Israel un säd to am: Go un vehol die, un sie väasechtich waut du deist. Wiels de Kjennich von Aram woat em Farjoa jäajen die komen.

23Däm Kjennich von Aram siene Mana säden am: Äare Jetta sent Jetta von de Boaj. Daut es wuarom dee stoakja wieren aus wie. Wan wie doch met an opp de opne Stap kjriejen kunnen, dan wudd wie stoakja sennen un an jewennen. 24Un doo uk dit: Laj aul de Kjennichs auf von äare Veauntwuatunk, un stal diene ieejne Kommandaunten aun en äare Städen. 25Dan moak die noch eene Armee, soone aus du veloaren hast, un uk Pieed un Woages soo aus ieescht, un dan lot ons oppe opne Stap met dee kjriejen. Dan woa wie stoakj sennen un an ennämen. Un hee horcht no dän Rot un deed daut soo. 26Aus daut dan Farjoa wort, roopt Ben Hadad aul de Aramäa toop un jinkj met an no Afek, om doa met de Israeliten to kjriejen. 27Un de Israeliten worden uk toopjeroopt. See kjeemen un besorjden sikj met Jereetschoft, un jinjen rut jäajen an. De Israeliten loagaden sikj ver jane. An leet daut no twee kjliene Häaden Kosen, doajäajen felden de Aramäa daut Launt.

28Un de Gottesmaun jinkj no däm Kjennich von Israel un säd: Dit es waut de Har sajcht: Wiels de Aramäa jesajcht haben, daut ekj een Gott von de Boaj sie un nich een Gott von de opne Stap, hab ekj dise gaunze Maussen en diene Macht jejäft, soo daut jie weeten kjennen daut ekj de Har sie. #2Mo 7,5 29See wieren fa säwen Doag eena jäajen däm aundren jeloagat. Dan aum säwenden Dach funk de Kjrich aun, un de Israeliten schluagen en eenen Dach 100.000 aramäische Soldoten, dee tofoot wieren.

30De äwaje randen en de Staut Afek nenn. De Stautswaunt foll opp de äwaje 27.000 Mana waut jebläwen wieren. Ben Hadad rand uk un vestuak sikj en eene Städ un dan enne aundre en de Staut. 31Un Ben Hadad siene Mana säden to am: Horch emol. Wie haben jehieet daut de israelitische Kjennichs metliedende Kjennichs sent. Well wie Sakkjleeda auntrakjen un Strenj om onse Kjap binjen, un no däm Kjennich von Israel gonen. Veleicht woat hee die daut Läwen veschoonen. 32Un see trocken sikj Sakkjleeda aun un bungen sikj Strenj rom däm Kopp, un jinjen no däm israelitischen Kjennich un säden: Dien Deena, Ben Hadad, prachat die no sien Läwen. Un hee säd: Läft dee noch? Hee es mien Brooda. 33Un de Mana jreepen schwind no daut Wuat aus een goodet Tieekjen un säden: Jo, dien Brooda Ben Hadad. Un hee säd: Got un brinjt am häa. Dan kjeem Ben Hadad äwadäl no am, un hee kroagd am en däm Kjrichswoagen nenn. 34Un Ben Hadad säd to am: De Städa, dee mien Voda von dienen Voda neem, woa ekj die trigjäwen. Un du doascht opp onse Gaussen en Damaskus Haundel driewen soo aus mien Voda en Samaria deed. Un Ahab säd: Met dise Bedinjungen lot ekj die gonen. Un see muaken eenen Bunt un hee leet am gonen.

35Dan kjeem eena von de Grupp von Profeeten no sienen Metprofeet un säd: De Har sajcht: Schlo mie emol dol. Oba hee schluach am nich dol. 36Un de ieeschta Profeet säd: Wiels du nich no däm Harn sien Wuat jehorcht hast, woat die nu een Leiw schlonen, wan du von hia wieda jeist. Un aus dee von doa wajchjinkj, troff hee eenen Leiw, un dee brocht am om. #1Kjen 13,24 37Dan jinkj hee no eenen aundren Maun un säd: Schlo mie bitscheen. Un de Maun schluach am daut hee eene Wund haud. 38Dan jinkj de Profeet wieda un jinkj no däm Wajch wua de Kjennich kjeem. Hee haud sikj daut Jesecht vestalt met eene Binj. 39Un aus de Kjennich vebie kjeem, schrieech hee no däm un säd: Ekj wia en däm Kaumf jegonen, un dan brocht eena mie eenen dän hee faust jenomen haud un säd ekj sull no däm oppaussen. Un wan dee sull wajchkomen wudd daut mien Läwen fa sien Läwen sennen, ooda ekj wudd motten 30 Kilo Selwa tolen. #2Kjen 10,24 40Un wiels ekj veschiednet to doonen haud, wia dee met eemol wajch. De Kjennich von Israel säd to am: Dan saul daut krakjt diene Strof sennen, soo aus du jesajcht hast. 41Dan neem de Profeet schwind de Binj von sien Jesecht, un de Kjennich von Israel sach daut hee eena von de Profeeten wia. 42Un hee säd toom Kjennich: Dit es waut de Har sajcht: Wiels du däm Maun, dän ekj veuadeelt haud, hast gonen loten, saul dien Läwen fa sien Läwen jenomen woaren, un dien Volkj fa sien Volkj. 43Un de Kjennich von Israel jinkj gaunz onmootich un doll no sien Hus no Samaria.

Currently Selected:

1. Kjennichs 20: PB

Highlight

Compare

Copy