1. Kjennichs 2

Salomo woat Kjennich

1Aus David dan meist bat aum stoawen wia, räd hee noch eemol met sienen Sän Salomo un säd: 2Ekj mott dän selwjen Wajch gonen aus daut opp de Ieed bestemt es. Sie mootich un stal dien Maun. 3Hool daut, waut de Har dien Gott die jebeeden deit. Schekj die to sienen Wajch, un hool siene Jesazen, Jebooten, Väaschreften, un Aunordnungen, soo aus dee en Moses sien Jesaz jeschräwen stonen. Dan woat die aules goot utkomen, waut du deist un wua du han jeist. #5Mo 17,14-20; Jos 1,7 4Wan du daut deist, dan woat de Har sien Vespräakjen, daut hee mie jejäft haft utfieren. Hee säd: Wan diene Säns doano seenen woaren, daut see mie von Hoat un Seel tru bliewen, dan woat daut nich väakomen daut nich eena von miene Nokomen woat Kjennich äwa Israel sennen. 5Un doa es noch waut. Du weetst waut Joab, dee Zeruja äa Sän, to mie deed aus hee de twee Kommandaunten von Israel äare Armee ombrocht. Doa wia Abner, Ner sien Sän, un Amasa, Jeter sien Sän. Hee brocht dee en eene Frädenstiet om, fa Bloot daut see en däm Kjrich vegoten hauden. Un nu droag ekj de Schult un de Foljen doavon, daut dee oschuldje Mana omjebrocht worden. #2Sam 3,27; 20,10 6Doo waut du aus rajcht sitst, oba lot am nich frädlich oolt woaren, bat hee stoaft un begroft woat. 7Oba sie tru to Barsillai siene Säns, dee von Gilead. Lot dee met de aundre aun dienen Desch äten. Dee bleewen mie tru aus ekj ver dienen Brooda Absalom flichten deed. #2Sam 15,13-16; 17,27; 19,32-41 8Un dan es doa uk noch Schimi, Gera sien Sän, de Benjaminita von Bahurim. Dee spruak eenen growen Fluch opp mie, aus ekj no Mahanajim jinkj. Oba don aus hee no mie biem Jordan kjeem, vespruak ekj am ver däm Harn, daut ekj am nich doot moaken wudd. #2Sam 16,5; 19,17-24 9Lot am nich doamet wajchkomen. Du best een weisa Maun un woascht weeten, waut met däm jedonen sull. Lot am en sien Bloot stoawen.

10Un David storf un wort en de Davidstaut begroft. 11David wia 40 Joa Kjennich äwa Israel. Säwen Joa wia hee Kjennich en Hebron, un 33 Joa en Jerusalem. #2Sam 5,4-5; 1Chr 29,27 12Un soo wort Salomo Kjennich no sienen Voda David, un hee rejieed daut Rikj met eene strenje Haunt.

13Dan kjeem Adonija, Hagit äa Sän no Batseba, Salomo siene Mutta. Un see säd to am: Kjemst du opp Fräd? Un hee säd: Jo, opp Fräd. 14Un hee säd: Ekj hab waut to die to sajen. Un see säd: Doawäajen saj. 15Un hee säd: Du weetst, daut mie daut Kjennichrikj jehieed, un daut aulemaun en Israel gaunz doamet räakjend, daut ekj wudd Kjennich woaren. Oba dan dreid sikj daut soo daut mien Brooda Kjennich wort, soo aus de Har daut haben wull. 16Doawäajen wensch ekj nu een Dinkj. Saj mie dee nich auf. Un see säd: Waut west du haben? 17Un hee säd: Go no Kjennich Salomo, hee woat die daut nich aufsajen, un froag am no Abischag von Schunem, daut see saul miene Fru sennen. #2Sam 3,7; 1Kjen 1,3 18Un Batseba säd: Goot. Ekj woa met däm Kjennich doavon räden.

19Un Batseba jinkj nom Kjennich Salomo un räd to am äwa Adonija siene Froag. Un de Kjennich stunt opp aus see nenn kjeem un hee kjneed sikj ver ar, un dan sad hee sikj opp sienen Troon. Un hee leet eenen Stool brinjen fa ar un stald dän aun de rajchte Sied von sienen Troon. 20Un see säd to am: Ekj well die no een kjlienet Dinkj froagen. Saj mie daut nich auf. Un de Kjennich säd to ar: Mutta, froag no waut du west. Ekj woa die daut nich aufsajen. 21Un see säd: Lot dien Brooda Adonija Abischag, von Schunem, aus Fru haben. 22Un Kjennich Salomo säd to siene Mutta: Wuarom wurscht du no Abischag, von Schunem, fa Adonija froagen? Du kust krakjt soo goot no daut gaunze Rikj fa am froagen. Hee es ella aus ekj, un Abjatar de Priesta un Joab, Zeruja äa Sän, unjastetten am. #1Kjen 1,6-7 23Un de Kjennich Salomo vespruak met een Eit ver däm Harn: Lot Gott mien Läwen nämen, wan dit nich Adonija sien Läwen kost. 24Soo secha aus de Har läft, dee mie dit Rikj en miene Macht jejäft haft, un mie opp mienen Voda David sienen Troon jesat haft, un dee mie un miene Nokomen dit Aumt jejäft haft, soo aus hee daut vesproaken haud, Adonija saul vondoag noch stoawen. 25Un Kjennich Salomo schekjt Benaja, Jojada sien Sän, daut hee Adonija dolschluach un ombrocht.

26Un hee säd to Abjatar dän Priesta: Go no Anatot no diene Buararie. Du hast dien Doot vedeent, oba wiels du Gott däm Harn siene Bundeskjist besorjen deetst fa mienen Voda David un met am en aul sienen Trubbel bleefst, woa wie die nich nu ombrinjen. #1Sam 22,20-23; 30,7; 2Sam 15,24; 1Kjen 1,7 27Soo kjeem daut, daut Salomo Abjatar aufsad von sien Priesta Aumt ver däm Harn. Met dit jinkj en Erfellunk daut Wuat woont de Har en Silo jesajcht haud äwa Eli siene Nokomen. #1Sam 2,31-32

28Aus Joab dit hieed, flicht hee no däm Harn sien Zelt un hilt sikj aun de Akjspetzen aum Aultoa. Joab haud Adonija unjastett, wan uk nich Absalom. #1Kjen 1,51 29Un aus däm Kjennich Salomo daut jesajcht wort, daut Joab no däm Harn sien Zelt jeflicht wia, un daut hee sikj biem Aultoa hilt, säd Salomo to Benaja, Jojada sien Sän: Go doahan, un schauf am auf. #2Mo 21,12-14 30Un Benaja jinkj no däm Harn sien Zelt un säd: De Kjennich velangt daut du rut kjemst. Oba Joab säd: Nä, ekj woa hia stoawen. Un Benaja jinkj trigj un säd däm Kjennich waut jeworden wia un waut Joab jesajcht haud. 31Un de Kjennich säd to am: Lot am sienen Wunsch haben. Schlo am dol un begrow am. Doamet woa wie de Schult von mie un von mien Voda siene Famielje wajch doonen, wäajen daut oschuldje Bloot woont Joab vegoten haft. 32De Har woat Joab doafäa strofen, daut hee Menschen omjebrocht haft. Hee haft twee Mana aufjeschauft onen daut mien Voda David doavon wist, un dee wieren aulebeid bäta aus hee selfst. Daut wieren Abner, Ner sien Sän, Kommandaunt von de Armee en Israel, un Amasa, Jeter sien Sän, Kommandaunt von de Armee en Juda. #1Kjen 2,5 33Lot dee äa Doot opp emma opp Joab sienen Kopp un opp siene Nokomen sennen. Oba opp David un siene Nokomen un sien Troon lot opp emma Fräd vom Harn sennen. 34Un Benaja, Jojada sien Sän, jinkj un schluach Joab doa en daut Zelt von däm Harn siene Jäajenwuat doot. Un Joab wort bie sien Tus en de Wiltnis begroft. 35De Kjennich sad Benaja, Jojada sienen Sän, äwa de Armee en Joab siene Städ, un de Kjennich sad Zadok däm Priesta en Abjatar siene Städ en. #1Kjen 4,4

36Dan leet de Kjennich aun Schimi bestalen: Komm un bu die hia en Jerusalem een Hus. Won hia un velot dise Staut nich. 37Aun dän Dach daut du rut jeist un äwa dän Kidron Riefa staupst woascht du stoawen. Dan woat diene Strof opp die komen. 38Un Schimi säd to däm Kjennich: Mien Har un Kjennich, mie es daut goot soo aus du sajchst. Un Schimi wond lang en Jerusalem. 39Dan kjeem daut oba, no dree Joa, daut twee von Schimi siene Deena wajchranden. See jinjen no Achisch, Maacha sien Sän, dee en Gat Kjennich wia. Un daut wort Schimi jesajcht, daut siene Deena en Gat wieren. 40Un Schimi muak sikj reed un reet opp eenen Äsel no Gat no Achisch om siene Deena to sieekjen. Hee jinkj doa han un brocht dee uk trigj. 41Aus Salomo daut jesajcht wort, daut Schimi ut Jerusalem jegonen wia no Gat un wia trigjekomen, 42leet hee Schimi ver sikj komen. Un de Kjennich säd to am: Hast du nich ver däm Harn met een Eit vesproaken, un hab ekj die nich gaunz iernst jesajcht daut aun dän Dach wan du ut dise Staut rut jeist, krakjt eendoont wuahan, dän Dach woascht du stoawen. Un sätst du nich: Daut es mie goot. Ekj woa daut jehorchen. 43Wuarom hast du dan nich dien Eit ver däm Harn jehoolen un hast nich daut jedonen waut ekj von die velangd? 44Du weetst sea goot, woo bees du to mienen Voda David wieescht. Nu woat de Har die doafäa bestrofen, #1Kjen 2,8 45oba hee woat däm Kjennich Salomo säajnen. David sien Troon saul opp emma ver däm Harn bestonen bliewen. 46Un de Kjennich schekjt Benaja, Jojada sienen Sän, un dee jinkj un schluach Schimi doot. Soo wort daut Rikj en Salomo siene Macht vesechat.

Currently Selected:

1. Kjennichs 2: PB

Highlight

Copy

Compare