1. Johanes 5
5
Jleewen haft Krauft un besiecht de Welt
1Wäa doa jleeft, daut Jesus de Christus es, dee es von Gott jebuaren un es sien Kjint. Wäa Gott aus Voda haft un am goot es, dee es uk Gott siene aundre Kjinja goot. 2Doaraun kjenn wie seenen, daut wie Gott siene Kjinja goot sent, wan wie Gott goot sent un siene Jebooten hoolen. 3Wan wie Gott goot sent, dan hool wie siene Jebooten, un siene Jebooten sent nich schwoa. #Mat 11,30; Joh 14,15; 15,23-24 4Aul dee, dee Gott toom Voda haben, äwawinden de Welt. Ons Gloowen aun Jesus, dee de Welt besiecht haft, jeft ons uk dän Siech. #Joh 16,33; 1Kor 15,57 5Wäa es dee, dee jäajen de Welt jewonnen haft, wan nich dee, dee doa jleeft, daut Jesus Christus Gott sien Sän es? #1Joh 4,4
De Zeijen fa Jesus Christus
6Dit es Jesus Christus, dee derch Wota un Bloot kjeem. Hee kjeem nich bloos derch Wota, oba derch Wota un Bloot. Un dee Jeist bestädijd daut. Gott sien Jeist es Woarheit. #Mrk 1,9; Joh 1,33; 19,34-35; 1Joh 4,2 7Fa Jesus Christus stonen aulsoo dree Zeijen: 8De Jeist, daut Wota un daut Bloot. Un dee dree stemmen äwareen. 9Wan wie aul jleewen waut Menschen sajen, kjenn wie noch sechra jleewen, waut Gott jesajcht haft. Sien Zeichnis es noch jrata. Un Gott säd, daut Jesus Christus sien Sän es. 10Wäa aun Gott sien Sän jleeft, weet bie sikj em Hoat, daut dit soo es. Wäa Gott nich jleeft, nant Gott doamet eenen Lieeja, wiels hee jleeft daut nich, waut Gott von sienem Sän jesajcht haft. #Joh 3,32-34; Reema 8,16 11Gott haft jesajcht, daut hee ons eewjet Läwen jejäft haft, un dit Läwen es en sienem Sän. 12Wäa Gott sienen Sän haft, haft Läwen. Un wäa dän Sän nich haft, haft uk nich Läwen.
Daut weeten, eewjet Läwen to haben
13Dit schriew ekj junt, dee jie aun Gott sienen Sän jleewen, daut jie weeten, daut jie daut eewje Läwen haben. #Joh 20,31 14Un wie kjennen ons secha sennen, daut hee ons hieren deit, wan wie am no waut froagen, daut no sienem Wellen es. #Joh 14,13 15Un wan wie weeten, daut hee ons hieet wan wie om waut froagen, dan weet wie uk, daut wie daut haben, om waut wie bäden.
16Wan eena sienen Brooda sindjen sitt, un daut es eene Sind, dee nich toom Doot fieet, dan saul hee fa dän Sinda to Gott bäden. Un Gott woat am de Jeläajenheit schenkjen, sien Läwen to raden, wan daut nich eene Sind es, dee toom Doot fieet. Doa es oba eene Sind, dee toom Doot fieet; fa dee saj ekj nich, daut wäa bäden saul. #Mrk 3,28-30 17Aules waut orrajcht es, es Sind. Oba nich aule Sind fieet toom Doot.
18Wie weeten, daut wäa von Gott jebuaren es, sindicht nich. Wäa von Gott jebuaren es un sien Kjint es, woat von am jehoolen, daut de beesa am nuscht aundoonen kaun. #Joh 17,15; 1Joh 3,9 19Wie weeten, daut wie von Gott sent, un daut de gaunze Welt vom beesen beharscht woat. #Gal 1,4 20Wie weeten uk, daut Gott sien Sän jekomen es un haft ons de Uagen opjemoakt, daut wie am aus dän Woarhauftjen aunseenen. Un wie sent en däm, dee de Woarheit es, en sienem Sän Jesus Christus. Hee es de woara Gott, hee es daut eewje Läwen. #Joh 17,3
21Leewe Kjinja, blieft von de Jetta wajch. #1Kor 10,14
Currently Selected:
1. Johanes 5: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.