1. Johanes 2

Christus es ons Halpa

1Leewe Kjinja, ekj schriew junt dit, daut jie von de Sind wajch bliewen. Wan oba doch wäa sindjen sull, dan hab wie Jesus Christus, dee onen Sind es, un dee bie Gott dän Voda fa ons enstonen deit. #Reema 8,34; Heb 7,25 2Christus haft met sien Doot onse Sinden betolt, un nich mau onse, uk von aule Menschen oppe Welt. #Joh 11,51-52; Kol 1,20; 1Joh 4,10 3Wan wie Gott siene Jebooten hoolen, kjenn wie doaderch weeten, daut wie am kjanen. 4Wäa doa sajcht, daut hee Gott kjant, un oba nich siene Jebooten helt, es een Lieeja, un de Woarheit es nich en am. 5Wäa oba Gott sien Wuat nojeit, bie däm es de Leew to Gott volkomen jeworden. #Joh 14,21.23 6Wäa doa bekjant, en Christus to sennen, sull uk soo läwen aus Christus jeläft haft. #Joh 13,15; 1Pet 2,21-23

Daut niee Jeboot

7Leewe Frind, waut ekj junt nu schriew es nich een nieet Jeboot. Daut es daut oole Jeboot, daut jie von Aunfank aun jehieet haben. Daut oole Jeboot es daut Wuat, daut jie jehieet haben. #Joh 13,34; 2Joh 5 8Un doch schriew ekj junt een nieet Jeboot, daut en Jesus Christus woa es un uk en junt, wiels daut diestre veschwinjt, un daut woare Licht schient nu. #Joh 8,12; Reema 13,12 9Wäa doa sajcht, daut hee em Licht es, oba sienen Brooda fient es, dee es noch em diestren. #1Joh 4,20 10Wäa sienen Brooda goot es, läft em Licht, un derch am kjemt kjeena tofaul. 11Oba wäa sienen Brooda fient es, es em diestren, un läft uk em diestren, un weet nich wua hee hanjeit, wiels daut diestre am de Uagen veblent haft.

12Leewe Kjinja, ekj schriew junt, daut junt de Sinden vejäft sent wäajen Jesus sien Nomen. 13Ekj schriew junt Vodasch, wiels jie dän kjanen, dee von Aunfank es. Ekj schriew junt junge Mana, wiels jie dän beesen besiecht haben. #Joh 1,1 14Ekj hab junt Kjinja jeschräwen, wiels jie dän Voda kjanen. Ekj hab junt Vodasch jeschräwen, dee jie dän kjanen, dee von Aunfank es. Ekj hab junt junge Mana jeschräwen, dee jie stoakj sent un Gott sien Wuat em Hoat haben un dän beesen besiecht haben. #Efs 6,10 15Siet nich hinjaraun no daut waut de Welt auntobeeden haft. Wäa de Welt un äare Lost jieren haft, en däm es nich de Leew vom Voda. #Jak 4,4 16Wiels aules waut en dise Welt es, jeltjierich sennen, hinjaraun sennen no waut de Uagen jankat un sikj groot doonen, daut staumt nich vom Voda. Daut es von dise Welt. 17De Welt un waut dee auntobeeden haft woat vegonen. Wäa oba deit waut Gott well, woat eewich bliewen.

Christus sien Jäajna

18Kjinja, de latste Stund es hia! Un jie haben jehieet, daut de Jäajenchrist komen woat. Doa sent nu aul väl Jäajenchristen jekomen. Doawäajen weet wie, daut de latste Tiet hia es. #Mat 24,24; 2Tess 2,3-4; 1Pet 4,7 19Dee sent von onse Medd rutjegonen, oba dee wieren nich von ons. Wan dee von de onse jewast wieren, wieren see bie ons jebläwen. Oba dee jinjen rut, daut daut to seenen wia, daut see nich von de onsaje wieren. #Apost 20,30; 1Kor 11,19 20Oba junt haft Christus dän Heiljen Jeist jejäft, un jie weeten de Woarheit.#2,20 Eenje oole Schreften sajen un jie weeten aula. 21Ekj hab junt nich doawäajen jeschräwen, aus wan jie de Woarheit nich weeten. Jie weeten de Woarheit un daut von de Woarheit kjeene faulsche Lia komen kaun. 22Wäa doa sajcht, daut Jesus nich de Christus es, es daut nich een Lieeja? Wäa dän Voda un dän Sän nich aunerkjant, daut es de Jäajenchrist. 23Wäa dän Sän nich aunerkjant, haft uk dän Voda nich. Wäa sikj oba to Jesus dän Sän von Gott bekjant, dee haft uk dän Voda. #Joh 5,23; 1Joh 4,15

Blieft bie de Woarheit

24Hoolt daut em Gloowen faust waut jie von Aunfank jehieet haben. Wan daut bie junt bliewen woat, waut jie von Aunfank jehieet haben, dan woa jie uk met dän Voda un met dän Sän vebungen bliewen. 25Daut es waut hee ons #2,25 Eenje oole Schreften sajen junt. vesproaken haft: daut eewje Läwen. 26Ekj hab junt von dee jeschräwen, dee junt veleiden wellen. 27Oba jie haben dän Heiljen Jeist jekjräajen, un dee läft en junt, un jie haben daut nich needich, daut junt wäa belieren mott. Waut de Jeist junt lieet es woa un nuscht jeloagen. Un soo aus hee junt lieet, soo blieft en am. #Jer 31,34; Joh 16,13; 2Kor 1,21-22

28Un nu, Kjinja, blieft en am. Dan kjenn wie secha sennen wan hee komen woat un woaren nich ver am toschaund woaren. #1Joh 4,17 29Wan jie weeten, daut Gott jerajcht es, weet jie uk, daut wäa daut rajchte deit, dee es von Gott jebuaren un es sien Kjint. #1Joh 3,7.10

Currently Selected:

1. Johanes 2: PB

Highlight

Copy

Compare