Isaias 2
2
Maghari ang Kalinaw
(Miq. 4:1-3)
1Kini mao ang mensahe nga gihatag sa Dios kang Isaias nga anak ni Amos bahin sa Juda ug sa Jerusalem:
2Sa umaabot nga mga adlaw
ang bukid diin nahimutang ang Templo
mahimong labing habog sa tanan;
molabaw kini sa kabungtoran.
Daghang kanasoran ang mag-ambahan sa pag-adto didto
3ug ang ilang katawhan moingon,
“Manungas kita sa bukid sa Ginoo,#2:3 BUKID SA Ginoo: Bukid sa Sion, ang bungtod sa Jerusalem nga nahimong bahin sa dapit diin gitukod ang Templo ug ang palasyo.
ngadto sa Templo sa Dios ni Jacob,
aron tultolan kita niya sa iyang mga dalan
ug maglakat kita subay sa iyang agianan.”
Kay gikan sa Sion mogula ang balaod
ug sa Jerusalem makigsulti ang Ginoo ngadto sa iyang katawhan.
4Husayon#Joel 3:10; Miq. 4:3. niya ang kanasoran
ug hukman ang daghang katawhan;
ang ilang mga espada himoon nilang punta sa daro
ug himoong galab ang ilang mga bangkaw;
unya dili na mag-away ang kanasoran
o magbansay pa alang sa pagpakiggubat.
5O mga kaliwat ni Jacob,
ngari, manlakaw kita subay sa kahayag sa Ginoo.
Silot sa mga Mapahitas-on
6O Dios, gisalikway mo ang imong katawhan, ang mga kaliwat ni Jacob,
kay daghan na ang mga naghimog salamangka gikan sa sidlakan ug sa Filistia,#2:6 salamangka…Filistia: Ang Hebreo dili klaro.
ug gisunod nila ang mga buhat sa mga langyaw.
7Daghang plata ug bulawan ang ilang yuta
ug naghingapin ang ilang bahandi;
daghan silag mga kabayo
ug dili maihap ang ilang mga karwahi.
8Nalukop sa mga diosdios ang ilang yuta,
ug nagsimba sila sa mga binuhat sa ilang mga kamot.
9Silang tanan maulawan gayod;
ayaw sila pasayloa, O Ginoo.
10Pasalipod#Gipa. 6:15; 2 Tes. 1:9. sa mga bato ug tago sa yuta
aron paglikay sa kasuko sa Ginoo,
sa iyang gahom ug sa iyang himaya.
11Niadto unyang adlawa,
ang garbo ug ang pagkamapahitas-on sa tawo putlon,
ug ang Ginoo lamang maoy pasidunggan.
12Kay may adlaw nga gitagana ang Ginoo nga Labing Gamhanan
aron pagsilot sa tanang mga mapahitas-on,
sa tanang gamhanan ug halangdon.
13Putlon niya ang tag-as nga mga sidro sa Lebanon
ug ang tanang tugas sa Basan,
14ingon man ang tanang habog nga kabukiran ug kabungtoran;
15ang tanang habog nga tore
ug ang tanang kota nga lig-on.
16Tundagon niya ang dagko ug maanindot nga mga barko sa Tarsis
17ug ipaubos ang mapahitas-on
ug kuhaan sa dungog ang mga garboso;
niadto unyang adlawa ang Ginoo lamang maoy pasidunggan.
18Ang mga diosdios hingpit nga mahanaw.
19Ug ang katawhan manulod sa mga lungib
diha sa mga pangpang ug sa mga lungag sa yuta,
aron paglikay sa kasuko sa Ginoo ug sa iyang gahom ug himaya
inig-anhi niya aron pagsilot sa kalibotan.
20Niadto unyang adlawa
ilabay sa katawhan ngadto sa mga ilaga ug sa mga kabog ang ilang mga diosdios nga plata ug bulawan.
21Manulod sila sa lungib diha sa mga bato, ug mangatkat sila sa mga pangpang
aron paglikay sa kasuko sa Ginoo ug sa iyang gahom ug himaya,
inig-anhi niya aron pagsilot sa kalibotan.
22Ayaw saligi ang tawo kay mubo ra siyag kinabuhi;
unsa bay bili niya?
Currently Selected:
Isaias 2: RCPV
Highlight
Share
Copy
Want to have your highlights saved across all your devices? Sign up or sign in
© 1999 Philippine Bible Society