2 Samuel 4
4
Gipatay si Isboset
1Sa pagkasayod ni Isboset, anak ni Saul, nga namatay si Abner didto sa Hebron, nawad-an siya sa kaisog ug naluya ang tibuok Israel. 2Niining higayona maoy kapitan sa mga pundok ni Isboset si Baana ug si Recab, mga anak ni Rimon nga sakop sa banay ni Benjamin nga taga-Beerot (sakop usab sa Benjamin ang Beerot 3ug ang mga taga-Beerot nangagiw ngadto sa Gitaim diin sila namuyo hangtod karon).
4Si#2 Sam. 9:3. Jonatan nga anak ni Saul, may anak nga bakol. Lima ka tuig ang iyang edad sa pag-abot sa balita gikan sa Jezreel nga namatay si Saul ug si Jonatan. Gikugos siya sa iyang yaya ug mikagiw sila. Ug tungod kay nagdalidali man ang yaya, nabuhian niya ang bata ug nabakol kini. Mepiboset ang ngalan sa bata.
5Unya si Recab ug si Baana, mga anak ni Rimon nanglakaw. Ug sa hapit na maudtong tutok miabot sila sa balay ni Isboset ug niadtong tungora nagpahulay si Isboset. 6Niining higayona nagpalid sa trigo ang babayeng magbalantay sa pultahan apan nahikatulog siya busa nakasulod si Recab ug si Baana nga iyang igsoon.#4:6 Ang bersikulo 6 nagsunod sa usa ka karaang hubad: Sa Hebreo, Misulod sila sa balay nga nagdala ug trigo ug gibunalan siya diha sa tiyan. Unya si Recab ug ang iyang igsoon nga si Baana miikyas. 7Sa paghisulod nila sa balay nakita nila si Isboset nga nahinanok sa iyang kama didto sa iyang lawak. Gitigbas nila siya ug namatay siya ug gilunggoan nila sa ulo. Gidala nila ang iyang ulo ug namauli sila agi sa Walog sa Jordan sa tibuok gabii. 8Gidala nila ngadto kang David ang ulo ni Isboset didto sa Hebron ug giingnan nila ang hari, “Ania ang ulo ni Isboset nga anak ni Saul nga imong kaaway nga buot mopatay kanimo. Ang Ginoo maoy nanimalos kang Saul ug sa iyang mga anak.”
9Apan gitubag ni David si Recab ug si Baana, “Manumpa ako sa ngalan sa Ginoo nga maoy nagluwas kanako gikan sa tanang kalisdanan: 10ang#2 Sam. 1:1-16. nagsugilon kanako nga patay na si Saul ug nagtuo nga maayo ang iyang gibalita kanako, akong gipatay didto sa Ziklag isip ganti sa iyang gibalita kanako. 11Labaw pa niini ang akong buhaton sa mga tawong daotan nga sama kaninyo. Gipatay ninyo ang usa ka tawong matarong didto gayod sa iyang kaugalingong balay ug sa iyang higdaanan. Karon patyon ko kamo tungod sa inyong gibuhat kaniya ug paphaon ko kamo gikan niining kalibotana.” 12Ug gisugo ni David ang mga sakop niyang batan-on sa pagpatay kang Recab ug kang Baana ug pagputol sa ilang mga kamot ug tiil ug pagbitay kanila didto sa Linaw sa Hebron. Unya gikuha usab nila ang ulo ni Isboset ug gisulod kini sa dapit nga gilubngan kang Abner didto sa Hebron.
Currently Selected:
2 Samuel 4: RCPV
Highlight
Share
Compare
Copy
Want to have your highlights saved across all your devices? Sign up or sign in
© 1999 Philippine Bible Society
