Rt 1
1
E'xi' Elimelek najal toj Moab'
1-2Tzaj jte' q'ij we'yaj toj tkyaqil Israel toj ju' tq'ijlalil intoq che kawin ajkawil toj Israel. Xi' jun ichan Elimelek tb'i, aj B'elen toj Juda, najal jte' q'ij toju' tx'otx' Moab'. Xitiq'i'n Noemi ju' t-xu'jil kyuk'i'l kab'e' tk'wal aye', Malon ex Kyilyon. Tetoq Eprataqe' kykyaqil toj B'elen. Eb'ajpon Moab', ex e'kyajten najal atzu'.
3O'kx tkyim Elimelek, ju' tchmil Noemi, kyajtentzun Noemitz tjunalx kyuk'i'lju' kab'e' tal. 4Yajxi'tzuntl e'mje kab'e' tal Noemi kyuk'i'l kab'e' txin aj Moab': Orpa tb'iju' jun, atzu'n juntl Rut. Tetzunj tb'aj lajoj ab'q'i, 5ex e'kyimju' Malon ex Kyilyon, kyajtentzun Noemitz mixti'xte tchmil ex tal.
Eb'ajx Noemi tuk'i'l Rut B'elen
6Jun q'ij tb'i Noemi qa matxi'toq tzaj q'aq'an tk'u'j Qman Dyos ti'ju' ttanam, matxi'toq tzaj tq'o'ntl tb'anil awal toj. 7Kub'tzun t-xima'n Noemi tu'n tanjti'j toj Juda kyuk'i'lju' tlib'. 8Tojtzun b'e xitma'na' kye:
—Kutanj kyi'je' tk'etz kytxuye'. Awt Qman Dyos b'inchan xtalb'il kyeye' kukxju', kse'n kyb'inchaye' weye' ex kyeju' wale', 9ex awt Qman Dyos tz'oninkyeye' tu'n kymje jumajtle' ex tu'n kytzalaje' kyuk'i'l toj kyjaye', chij kye.
Ex eb'ajkyaj tma'tzi'n Noemi, aye'tzunkye e'aq'wi oq'el. 10Ex xikyma'n te:
—¡Lay! ¡Qo xe'lqe' toj ttanama!, chechij.
11Atzunte Noemi xitma'n jumajtl kye:
—Kuxkxi'ye' wal, ¿tiqu'n kyajb'ila'ye' tu'n kxi'ye' wuk'i'le'? Layna' che tentlwe' wal tu'n ykmejeye' kyuk'i'l. 12Kutanj kyi'je' kyjaye'. Qu'n matxi' chin tijinwe' ex lay chin mjetle'. Maskyepe' atiwt tu'me'l, ex chin mjewte' toju' qonik'an lu exqa machin alintle', 13¿ma oktzun che b'el kyayo'ne' tzmaxi'j aj kych'iy tu'n kymjeye' kyuk'i'l? ¿Ma laytzun che mjeye' naqx tu'n ayob'enkye? Lay ye, mya tu'me'lte' ikyju'. Qu'n jaku' chin b'isunxi'xtle' kyi'je' ajkyxi' nka'yine' nche yajtiye', kse'nju' yajb'il matxi' tzaj tq'o'n Qman Dyos wi'je', chij kye.
14Aye'tzunkye e'kub'ten jumajtl oq'el. O'kx chab'ax oktma'tzi'n Orpa tlib' ex kyej ttzaqpi'n, atzunte Rut kyejten tuk'i'lju' tlib'. 15Xitzun tma'n Noemi te tlib':
—Matila Orpa matxi' tz'anjti'j toj ttanam ex tu'n tajb'en kyeju' tdyos. Ikxtzunteju'ya kutxi'ya tuk'i'l, chij.
16Atzunte Rut xittzaq'we'n te:
—¡Lalun b'isuna wi'je' qu'n layna' kyej ntzaqpi'nta! Chin xe'lwe' tuk'i'la jaxja matxa'ya ex chin najale' ja knajala'ya. Aju' ttanama k'okyel te ntaname', ex chin k'ululwe' teju' Dyos ja inima'na'ya. 17Chin kyimele' ja kkyimela'ya, ex axtzu' wajb'ila'ye' tu'n nku'x mqu'ne'. ¡Tzajxwit tq'o'n Qman Dyos jun tz'e'ysb'il nwitze' kuw qa matz'el npa'nwib'e' ti'ja, noq o'kxte' qama chin kyime', kjel ntzaqpi'ntzuntza! chij.
18Tetzunj tel tniky' Noemi ti'j Rut qa matxi'toq kub' t-xima'n b'a'nxi'x tu'n toklpe ti'j, mixti' ok iltl ti'j, 19xikyljo'ntzun kyb'etz kykab'il tzmax kypon toj B'elen.
Tetzunj kypon toj B'elen, e'jaw lab'tiju' tnam kyi'j. Intoq kyma'nju' qya:
—¡Kyka'yinxpe' ch'inkye', myatzun Noemi ju'lu!, chechij.
20Atzunte Noemi xitma'n kye:
—Lalun tzaj kyma'ntle' nb'iye' Noemi ('tzalajb'il), kymantze' nb'iye' Mara (b'isb'ajilx'), qu'n b'isb'ajilx soka' nchwinqlale' tu'n Qman Dyos nimtipumal. 21Tej wexe' tza'lu nimtoq ti'xti' weye', atzu'n sanjtz wi'je' ja'lo, mixti'te iq'i'n wu'ne', qu'n ax tajb'il Qman Dyosju'. ¿Titiqu'n inxtzaja' kyma'ne' nb'iye' Noemi, extzun matxi' chin yajtiye' ex matxi' kub' nchjo'ne' tu'n Qman Dyos?, chij.
22Ikytzu'n anjtza' ti'j Noemi toj B'elen tuk'i'l Rut ju' tlib', aj Moab'. Tetzunj kypon, Akxtoq nb'uyinjtz twitz awal seb'ad toj B'elen.
Currently Selected:
Rt 1: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999