Rt CHIK'B'AB'L
CHIK'B'AB'L
Aju' b'o's tqanil lu naku'j jun tal a' toj chq'ajlaj toju' txqan yajb'il ex xitb'il toj kyq'ijlalilju' ajkawil. Nyolin ti'j jun txin Rut tb'i, aj Moab', kyimu' tchmil, juntoq ichan aj Israel, okju' txin lu majx b'a'n xjal te tlib', oktq'o'n tnam Israel te ttanam ex eltnik' teku' Qman Dyos, qu'mtzun oklpe ti'ju' kyokslab'l aj Juda. Majx tb'anil ela' tchwinqlalu' txin lu toj twitz jun q'inun twitze'lju' qtzan tchmil, ex mjeju' ichan lu tuk'i'lju' txin Rut, kse'nxju' nb'inchet kyxol aj Israel toju' tq'ijlalil lu.
Aju' toj tq'ijlalil Rut nb'inchettoq jun ti'xti' junxi'tl kyetwitzju' qxol, atzu'n kyxol aj Israel naq'liqe'tltoq, kse'nte Noemi xitchq'o'n Rut kẍeb'il tk'etz B'oos (tnej oxe'), tu'ntoq txitqani'n toklenju' qya kyimni tchmil tu'n tmje tuk'i'l twitze'lxi'x, tu'n t-xika'yi'n tu'n ex tu'n tten tk'wal tuk'i'l. (ka'yinx toj Deut. 25.5-10). Atzu'n u'j lu ntchik'b'a'n tu'nju' xitma'n Noemi kye tu'n tanjkyi'j kyja (1.11-13) tu'n tpaju' matxitoq tijin ex lay tentl tal, atzunkye' tlib' tu'n kymje kyuk'i'l junxi'l xjal. Axtoq juntl nb'aju' kyxol aj Israel mikxa' nb'aju' qxol, ti'ju' tx'otx': Atoq kyximju' qa te Dyos te' tx'otx', naq majina'n kytx'otx' kyu'n te Dyos ex laytoq tu'n txikyk'a'yi'n te juntl qa mya kywitze'l. O'kxtoqu' twitz kyawal nxikyk'a'yi'n. Qa ati jun makub' prowix kyxol, b'a'n tu'n t-xitk'a'yi'n ttx'otx' tex twitze'l mya te junxi'tl xjal tu'ntzun lalun txi' kyeju' mya tojx kyjakyib'. (ka'yinxa toj Lev. 25.23-30). Atzu'n teju' Noemi ex Rut a B'oos ch'exb'elte kywinqlal tu'nju' kywitze' toqkyib' Elimelek qtzan tchmil Noemi tuk'i'l B'oos, ex jakutoq b'ent tlq'onte B'oos ttx'otx' Noemi ex tu'n tmje tuk'i'l Rut t-xu'jilb'en qtzan Malon tk'wal qtzan Elimelek. Oku' Rut tu'nelju' tmjeb'le'n te tya ttxu Dab'i nimaqkawil ex te tyajilb'en Qman Jesus. Matz'okju' tpomlen jun te najchaq xjal toju' tb'anil kyajlal tyajilb'en, nim toklen toj tkyaqil kyyajajil xjal, ex ntyek'u'n qa junelnite' qoklen tu'n Qman Dyos qa nqo okslan te ex maqeqk'u'j ti'j, exqa nqo niman te.
Currently Selected:
Rt CHIK'B'AB'L: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999