Is 1
1
Aye' aj Juda jun nintnam aj il
1Tpakb'ab'l Isayiy, tk'wal Amos, Tzaj tyek'u'n Qman Dyos te ti'j Juda ex ti'j Jerusalen, toju' tq'ijlalil ntoq che kawin nimaqkawil Usiy, Jotam, Akas ex Esekyiy.
2Tma: Tx'otx' ex kya'j,
kyb'intzju'ye' ntma'n Qman Dyos kjalu:
Macheb'aj nch'isa'ne' nk'wale' ex mache b'ajch'iy wu'ne',
aye'tzunkye mab'jaw kyi'nkyib' wi'je'.
3Tojtzqi'nte wakx tajaw
ex tojtzqi'nte b'ur twab'l tu'n tajaw;
atzunte Israel, ntanamku'xi'xe'
min neltnik' ex mixti' tnab'l.
4¡E' b'inchal il,
jun tnamqe'ye' nojni tu'n il,
kyyajajil b'inchal myab'a'n qe'ye',
e' pi's k'wal qe'ye'!
matz'el kypa'n kyib'e' ti'j Qman Dyos
ti'ju' Xjan Kydyos aj Isarael.
matxi' kyej kykolb'e'ne'.
5Matxi' che b'je'l pi'se',
mixjalojatl tu'n kyoka' jumete'.
Tkyaqilju' kywi'ye' ex kyanmiye'
b'ajni k'ixb'i.
6Tzajnix t-xe kyqane' japumnix toj kywi'ye'.
mixti'tl tb'anil;
tkyaqil k'ixb'ni, b'ajni tx'inj ex tx'a'k,
mix-a'lo' matxi' tz'ok ẍponte mo q'anante,
matxiwit t'ole' tu'n aseyt.
7Matxi' kyej chq'ajlajixju' kytx'otx'e',
ex nche jamun nimaqtnam toj q'aq'.
Kywitzku'xi'xe' nche wan kyajq'oje' ti'ju' kyawale'.
Tkyaqil matxi' kyej chq'ajlajix,
kse'n tnam Sodom tej tkub' xitj.
8Noq o'kxte tnam Syon xkyej we',
tjunal naku'j jun pach toj awb'il,
tjunalx xkyej ten naku'j jun pach txol txqan lob'j melon,
naku'j nintnam txoli'nkyib' tajq'oj ti'j.
9Noqwit min xkyaj tq'o'n Qman Dyos nimtipumal jte'tl qb'aj,
ikywitlo xqo oka' kse'n Sodom ex Komor.
K'u'lb'il axxi'x twitz Dyos
10E'nejenel aj Sodom, kyb'intze' tyol Qman Dyos,
tnam aj Komor, kyb'inku'ye'
t-xnaq'tzb'il Qman Dyos kyeye'.
11Lu ntma'n Qman Dyos:
¿Titi' k'ajb'ela' txqan kychojb'ile' weye?
Matxi' chin siktiye' tu'n txqan chojb'il k'ok'sb'il patu'n rit,
exju' ky-until qpoj wakx;
min nchekub' kychk'el tman wakx, kychk'el tman rit ex kychk'el tman chib', toj nwitze'.
12¿Alkye xq'mante kyeye'
tu'n tb'aj kytxa'ju'ne' q'olb'eb'l weye' ajkyule' nwitze'?
13Lalun tzaj kyi'ntle' oyaj mixti' tajb'en weye';
lay tzik'xju' kysb'el wu'ne'.
Nche tzajkytxko'nju'ye' tnam,
tu'n tkub' kyik'sa'n ak'a'j xjaw ex q'ij te ojlab'l,
lay nk'amtlwe' kyninq'ije', b'inchal myab'a'n.
14Nche el wik'u'nwe' kyninq'ije' toj ak'a'j xjaw ex kyb'uyjtib'ile';
¡mixyab'a'nqe' kyb'inchb'aje' toj nwitze'
layx che ik'xtl wu'ne'!
15Kse'n njaw kyi'n kyq'ob'e' tu'n kyk'ulune',
nxiwewa'nwe' nwitz kyeye';
b'a'nqa nim txqan kyna'j Dyose',
lay che'x nb'i'ne'.
qu'n b'ajni txa'j kyq'ob'e' toj chik'.
16¡Kytx'jom kyib'e', kyẍtilsam kyib'e'!
¡Min wajb'ile' tu'n nka'yintetle' myab'a'n nkyb'incha'ne'!
¡Kytzaqpinkju'ye il!
17¡Kyknome' tu'n kb'inchanteye' b'a'n,
kyq'onk tilile' tu'n kyb'inchanteye' tnik'alilti'j,
kyonimju'ye' tokx tjaq' jitz'b'il,
kyb'inchame' tnik'alilti'j teju' meb'a,
kyklome' toklenju' kyimni tchmil! chij.
18Intma'n Qman Dyos kjalu:
Kukytzaje', qo'qe' yolin.
b'a'nqa kyaqxi'xju' kyile',
knẍtilsa'we' kse'n txun che'w;
b'a'nqa ikse'n jun xb'alun xwoqi'n toj txqan tz'il,
kẍnu'lixel kse'n saq noq'.
19Qama chin kyb'i'ye'
kynik'b'e'ye' tb'anil awal ntzaj toju' tx'otx';
20qatzun mache kyajtene' tojxju' kypi'sile',
ilti'j che kyimele' toj q'oj.
Chi Qman Dyos tzaj tma'n.
Kt-ẍtilsa' Qman Dyos Jerusalen
21¡Se'n taq'wi soka', b'a'n nintnam,
junx tuk'i'l jun qya ajpajil!
Kykyaqiltoq kye' xjal najlqe' toja tnik'alkyi'j nejtl
ex b'a'ntoq kychwinqlal,
atzu'n ja'lo b'yolxjal q'e'tl.
22Saqpwaq toqa tnejel, ja'lo matxi' tz'oka te tz'is,
ikytoqju'ya kse'n tb'anil b'in, atzu'n ja'lo matz'oka naq a'tl.
23Majx pi'sqe' kawil toja
kamiw kyib' kyuk'i'l eleq'.
Kykyaqilx nkytzyu'n pwaq ti'j chajyolil
ex axi'x kyajb'ilju' oyaj.
Min nkyb'incha'n tnik'alilti'j teju' meb'a
ex min nxikyka'yi'n toklen qya kyimni tchmil.
24Qu'mtzun, ntma'n Qman Dyos nimtipumal,
nimtipumal toj Israel:
¡O'kxtzu'n! kychja'kye' wajq'oje.
Knq'a' tu'me'l t-xele' kye.
25K'aq'pomel jumajtl nq'ob'e' ti'ja,
ex majx kb'ajel npati'ne' ttz'isa;
knẍtilsa'ya te tkyaqilju' ttz'ilila.
26Knb'incha'ye tu'n kyok tajkawila kse'nx tnejel,
exqe' q'ol nab'l kse'nxju' tnejel.
K'okyel q'ontzun tb'itza
Nintnam tnik'alti'j, Nintnam tz'aqlixi'x.
27Che ntzaqpi'ye' najlqe' toj Syon
tuk'i'l tnik'alilti'j ex kolb'il, tu'n tanjtzkyi'j wuk'i'le'.
28Aye'tzu'n pi'sqe' ex aj il kche b'ajel npẍu'ne',
ex che kyimelju' nchin nelkyik'u'ne'.
29K'elel kych'ixawe' tu'n b'ansi ex tu'n txqan awal
ju' achb'ajilxi'x kyeye',
janche k'uluna'ye' kye witzleb'.
30Che okyile' kse'n t-xaq b'ansi tzqij,
ex kse'n awal mixti' a' toj.
31K'okyelju' kuw xjal kse'n ttxa triy,
ex k'okyelju' taq'unb'en kse'n q'aq' nel tx'itj:
kykab'il che jamul junx
ex mix-a'lo' kyupilte, chi Dyos.
Currently Selected:
Is 1: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999