Mt 8
8
Q'anit jun xjal ati xlemtx'a'k ti'j tu'n Jesus
(Mc 1.40-45; Lc 5.12-16)
1Tetzunj tku'tz Jesus twi' witz, nim xjal eb'jo'k lpe ti'j. 2Textzunju' kmuj lu ulju' jun xjal xlemtx'a'k ti'j tk'etz Jesus, kub' meje twitz ex xitma'n te:
—Taye, qa tajb'ila chin tq'anama toju' yab'il lu, chij.
3Kub'tzun tq'o'n Jesus tq'ob' tib'aju' xjal ex tma:
—Wajb'ile'. ¡Kb'anixela ja'loxi'x! chij.
Textzunju' kmuj lu, q'anitju' xjal teju' tyab'il. 4Xi'tzun tma'n Jesus te:
—B'intzpe'ya, lalun txi' tyolina; naq o'kx kutxi'ya twitzju' pale, ex q'inxa toyaja se'nxju' ntma'n tkawb'il Moyses, tu'ntzun tok ka'yina kyu'n xjal qa matxi' q'anita, chi Jesus.
Q'anitju' tmajen nejenel aj Rom tu'n Jesus
(Lc 7.1-10; Jn 4.43-54)
5Tetzunj tokx Jesus toju' tnam Kaparnawum, ul lq'eju' jun nejenel aj Rom kub'sal twitz. 6Ex xitma'n te:
—Taye, yab'ju' nmajine' ex axtzu' ta' ja, inxi'x yajti, ex majx matxi' kyej tzeyix, mixjun nyukchi, chij.
7Xi'tzun ttzaq'we'n Jesus te:
—Machinxe' q'anilteju' tmajena, chij. 8Atzunju' nejenel xittzaq'we'n te Jesus:
—Taye, mya b'a'nqine' tu'n tokxa toj njaye'; naq o'kx q'ontzju'ya chaq'b'il, ex kb'entilju' nmajine'.
9Qu'n ikxwe' atinqine' tjaq' tkawb'il juntl, ex ate'tl xjal te q'oj tjaq' nkawb'ile'. Ajtzun txi' nma'ne' te jun tu'n txi', inxi', exqa matxi' nma'ne' te juntl tu'n ttzaj, ex intzaj; exqa matxi' nchq'one' nmajine' b'inchal jun ti'xti', inxi' tb'incha'n, chij te Jesus.
10Majx jaw lab'ti Jesus tej tb'inte tyolju' xjal lu, ex xitma'ntzuntz kyeju' lepchqe'k ti'j:
—Axxi'x b'ajx tz'ela yal jun xjal toj Israel wu'ne' tuk'i'l txqan tokslab'l se'nju' ichan lu. 11Ex kxe'l nma'ne' kyeye' qa txqan xjal che ul te tjawetzq'ij ex te tkub'ix q'ij, ex che kb'el qe wal kyuk'i'l Ab'raam, Isaak ex Jakob' toj tkawb'il Qman Dyos. 12Aye'tzunju' che tenb'iltoq toj tkawb'il Dyos, che elex q'o'n toj qlolj, ja che oq'ela ex okxi'x kjach'ub'tel t-xe kwitzte, chi Jesus.
13Xi'tzun tma'n Jesus teju' nejenel:
—Kutanj ti'ja tjaya, ex kb'entelte' tmajena se'nxju' tokslab'la, chij.
Textzunju' kmuj lu q'anetju' tmajen.
Aju' qya tji Luch q'anit tu'n Jesus
(Mc 1.29-31; Lc 4.38-39)
14Xi' Jesus tja Luch, ex til qa yab'toqju' qya tji Luch tu'n kyeq ex kuẍlitoq. 15Oktzun tmko'n Jesusju' tq'ob' ex majx elju' kyeq ti'j, jawtzun we'ju' qya ex xitq'o'n kywa.
E'q'anit txqan yab' tu'n Jesus
(Mc 1.32-34; Lc 4.40-41)
16Tetzunj qok yupj e'pon q'i'n txqan yab' twitz Jesus tzyu'nqe' tu'n tajaw il; eb'je'lju' tajaw il kyi'ju' xjal naq tu'n junx tyol Jesus, ex eq'anit kkyaqilju' yab' tu'n. 17Tkyaqil ja'lu b'aj, tu'n tjapunju' kyej ttziya'n t-sanjelal Dyos Isayiy kjalu: Ate elq'inte yab'il ex k'ixk'oj qi'j, chiju' tz'ib'a'n.
Ayeju' kyajb'iltoq tu'n kyoklpe ti'j Jesus
(Lc 9.57-62)
18Tetzunj tka'yinte Jesus txqan xjal ti'jile, tchaq' tu'n kyik'x jlajxi' njab' kyuk'ilju' t-xnaq'tzb'en. 19Pontzun lq'eju' jun xjal xnaq'tzal ti'j kawb'il, ex xitma'n te Jesus:
—Xnaq'tzal, wajb'ile' tu'n nxi' lpeye' ti'ja jaxjaku' matxa'ya, chij te Jesus.
20Atzunte Jesus xittzaq'we'n te:
—Ati kye saqb'in kyjul, ex atikye' pich' kpaqb'il, atzunte tk'wal Dyos mixpeti'x jatu'n tkub'a txale ch'i'n, chij.
21Atzun juntl t-xnaq'tzb'en xitma'n te:
—Taye, q'ontza anb'il weye' tu'n nxi'ye' mqulteju' nmane' nejtl, chin xe'l lpetzuntze' ti'ja, chij.
22Atzunte Jesus xittzaq'we'n te:
—Lpekta wi'je', ex q'onkjta kyeju' kyimni tu'n tku'x kymqu'nju' kykyimni, chij Jesus.
We' jun nin kyq'iq' tu'n Jesus
(Mc 4.35-41; Lc 8.22-25)
23E'jaxtzun Jesus toju' b'ark kyuk'i'lju' t-xnaq'tzb'en. 24Tzajtzun jun nin kyq'iq' kuwx'ix tib'aju' njab' ex majx njapuntoqju' ttolob' toju' b'ark. Atzunte Jesus intoq wtan toju' b'ark. 25Okxtzun k'asu'n kyu'nju' t-xnaq'tzb'en, ex xikyma'n te:
—¡Taye, qo' tkloma! ¡Xi' qxi' mulq'aj toju' njab'! chechij.
26Atzunte Jesus xittzaq'we'n kye:
—¿Titiqu'n nche' xob'aye'? ¡Jatzunta'ju' kyokslab'le'! chij kye.
Jawtzun we' Jesus ex xitmyo'nju' kyq'iq' exju' a' ex majxkub' nak'e tkyaqil. 27Eb'jawtzun lab'tiju' t-xnaq'tzb'en ex kyma:
—¿Titi'tzunlo toklenju' xjal lu? qu'n inxi' b'i'n kyu'nju' kyq'iq' exju' njab' chechij.
Kab'e' xjal aj Kadara tzyu'nqe' tu'n tajaw il
(Mc 5.1-20; Lc 8.26-39)
28Tetzunj tpon Jesus jlajxi' njab' toju' tx'otx' Kadara tb'i, eb'jo'k yal kab'e' xjal twitz etzniqe' toj muqb'il, tzyu'nqetoq tu'n tajaw il. Inxi'xtoq che tx'u'jin ex mix-a'loxtoq tu'n tb'ent tik' toju' b'e jate'qe'; 29intoq che ẍch'in ex intoq kyma'n:
—¿Titiqu'n nqo' tzaja' tik'le'na Jesus, tk'wal Dyos? ¿Ma'tzun tzulnaja yajulqeye' extzun na'm tponte' tq'ijlalil? chechij.
30Ate'toqtzun txqan b'och nche wan nqaku' kk'etz, 31ekub'sanju' tajaw il twitz Jesus kjalu:
—Qama qo etz tiq'ina kyoju' xjal lu, q'ontza anb'il qeye' tu'n qokxe' kyoju' b'och ate'qe' nqaku' tzalu, chechij.
32Xi'tzun tma'n Jesus kye:
—Kuxna' kxi'ye', chij.
Eb'je'tztzun tajaw il kyoju' xjal ex eb'jo'kx kyoju' b'och; textzunju' kmuj lu, kkyaqilju' b'och eb'jaw lipan ex majx eb'je'x tz'aq twi' xaq tu'n kkupon tz'aq toj a' ex majx e'kyim.
33Aye'tzunju' nche' xq'uqinkyeju' b'och, e'kub' oq, tetzunj kpon toju' tnam eb'jo'kten tx'olb'alte tkyaqilju' b'aj kyi'ju' b'och ex kyi'ju' tzyunqe' tu'n tajaw il. 34Kykyaqiltzunju' najlqe' toju' tnam eb'je'tz ka'yilte Jesus, tetzunj kpon lq'e tk'etz ekub'san twitz tu'n lalun kyejten toju' kytanam.
Currently Selected:
Mt 8: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999