Jer 9
9
1¡Noqwit t-xiklil a' qe' nwitze',
ikywit ta'l nwitze' kse'n tnimal a',
tu'ntzun woq'e' q'ijtl ex qonik'an
kyi'ju' kyimni toj ntaname'!
2¡Noqwit ati jatu'n nnajana'ye' toj chq'ajlaj,
tu'n nxi' oqe' najchaq ti'jxi' ntaname'!
Qu'n kykyaqilx min xjapun tyol Qman Dyos kyu'n
jun k'loj xjalqe' ma jawkyi'nkyib'.
3Majx naq'li kytzi tu'n kychan yol
naku'j nche smajin.
Mixti'x nche yolin ax toju' tx'otx';
xi'kykub' ichinxi'xtl atl junjun q'ij toju' myab'a'n:
Intma'n Qman Dyos ikjalu:
Min kyajb'il tu'n telkynik' weye', chij.
4Lay qetl tk'u'j jun xjal ti'j juntl
naqpe' ti'j titz'in mo ti'j ttzik
naqna' nkysb'u'n kyib'ju' kyitz'inkyib'
ex njawkyi'n amiw yol ti'j jun ex ti'j juntl.
5Teyile junjun nxmayin ti'j juntl,
mix-a'lo' jun ax yolin.
Matxi' che nq'et tu'n kychan yol
taq'wixqe'xi'x, layx 6kyej kyu'n.
Chi Qman Dyos:
¡Naqx sb'ub'l,
naqx chajyolil!
Min tajb'ilju' ntaname' tu'n teltnik' weye'.
7Qu'mtzun ayine' Dyos Manb'aj te tkyaqil ipumalj nchin q'mante:
¿Ti'tzuntl knb'incha'ye' ti'ju' ntaname',
qa mya tu'n t-ẍtilset toj q'aq'?
8Iky kyaq'ju' kse'n talsmaj nb'iyun;
naqx nche chanyol.
Inche'x kyq'olb'e'n kamiw tuk'i'l tzalajb'il
extzun nkub' kyq'o'n xpatxab' kwitz.
9¿Ma laytzun kub' ntz'e'ysa'ne' kywitz tu'n kypaju' ti'xti' lu?
¿Ma laytzun txinq'o'ne' tleq' jun tnam ikju'?
Ayine' Dyos Manb'aj nchin yolin.
10Che oq'e' ex che jiq'chanqe'ye' kyi'ju' witz,
che uxine' kyi'ju' kojb'il te k'ik'leb'l,
qu'n matxi' che b'aj tz'e'y ex mix-a'lo'tl inik' kyoj;
mixti'tl tq'ojq'ojel toj kywi' alu'mj kyoj,
eb'ajxpena' oqju' pich' exqe' tojk'ul txkup.
11Kyjel nq'o'ne' Jerusalen naq tik'lenxtl,
kjelten te kyja xo'j;
che kjel chq'ajlajixju' nimaqtnam toj Juda wu'ne',
che kjelten mixti' xjal kyoj. Chi Qman Dyos.
12¿Alkye jun atixi'x tnab'l tu'n tkane' ja'lu toj twitz? ¿Alqe matxi' txityek'u'na' Qman Dyos ti'xti' lu tu'n t-xitchik'b'a'n kye txqantl? ¿Tiqu'n b'ajni xitu'nju' tx'otx', tzqij naku'j chq'ajlaj mix-a'lo' nik' toj?
13Tzaq'web'l tu'n Qman Dyos: Matzaj tkyaqil ja'lu, qu'n kyej kykolb'e'n aj Israel xnaq'tzb'il b'ajx nq'o'ne' kye; min nxikyb'i'ne' ex mixjun kub'kyanq'i'n. 14E'anq'in toju' tch'uẍal kyanmi, ek'ulun kwitzju' mya dyosqe', kse'nxju' xiyek'u'n kye kyu'n kyman. 15Qu'mtzun ayine' Dyos Manb'aj te tkyaqil ipumalj, nchin q'mante: kxe'l nq'o'ne' kywa k'axi'x, kxe'l nq'o'ne' kyk'wa' a' tku'x b'i'yb'il toj. 16Che kxe'l nslamu'ne' kyoj nimaqtnam min kyojtzqi'n ex min kyojtzqi'n kyman; knb'incha'ye' tu'n tljonjtz toj kyq'ij tu'n kykub' b'yo'n tu'n k'uẍtx'e'nb'il, tzmax ajkymankun kykyaqil, chi Dyos.
Oq'el toj Jerusalen
17Chi Qman Dyos nimtipumal kjalu:
¡Kyb'intzpe'ye'! che kytxkontzju'ye' qya
ax kyaq'unju' tu'n kyoq'.
18¡lwix kukytzaj
tu'n kyoq' tu'n b'is qi'j;
nimxwit ta'l qwitz tz'el
che exwit ta'l ttxowqwitz tu'n qoq'el!
19Tzmaxtzu' Syon npona' tq'ojq'ojel wi'yj tu'n k'i'xk'oj:
¡Matxi' qokub' xitu'ne'!,
¡matxi' tz'el qch'ixawe'!
Kjel qtzaqpi'nju'ye' qtx'otx'e',
matxi' che kub' xitu'nju' qjaye'.
20Qya, kyb'intze' tyol Qman Dyos,
kyb'intzju'ye' tqanil tu'n.
Che kyxnaq'tzanxe' kyale' tu'n kyoq'
exqe' qya kamiwe' tu'n kymante toj kyoq'el:
21Matz'okxju' kamik toj qjaye',
mapon toju' qjaye' te kawb'il;
inche tb'yo'n k'wal kyoj b'e
exqe' ku'xun jachaq ta'qe' xjal.
22E'kyaj woqonje ichan kyimniqe'tl
kse'n tz'is toj kojb'il
kse'n spiy nkyej tz'aq tu'n ch'umal
ex mix-a'lo' njaw sk'onte, chi Qman Dyos.
23Lu ntma'n Qman Dyos:
Lalun jaw tnima'ntib'ju' ati tnab'l tu'nju' atixi'x tnab'l,
exju' kuw tu'nju' ati tipumal
expe' q'inun tu'nju' tq'inumal.
24Qa ati jun tajb'il tu'n tjaw tnima'ntib'
nima'nktztib' tu'nju' ojtzqi'nqine' tu'n,
tu'nju' b'i'n tu'n ayine' Dyos Manb'aj
nimxi'x nk'u'jlalile' twitz tx'otx', in nb'incha'ne' tnik'alilti'j ex ttxolilti'j,
atzunwe' nchin tzalaj ti'j.
Ayine' Dyos Manb'aj nchin yolin, chi Dyos.
25Lu ntma'n Qman Dyos: Tzul q'ij kb'el ntz'e'ysa'ne' kywitz kykyaqilju' tnam o'kx nb'jo'ka' kyq'o'n kyechel ti'j kychib'jil: 26Aye' Ejipt, Juda, Edom, Amon, ex Moab', ex kykyaqilju' najlqe' toj chq'ajlaj tek' nb'aj kyjon kywi'. Qu'n kykyaqilju' tnam lu ex tkyaqilju' tnam Israel, mixya okslalqe' weye' toj kyanmi.
Currently Selected:
Jer 9: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999