Esd 10
10
Okkyq'o'n tnam kyil kyi'j
1Tetzunj intoq na'n Dyos Esdras ex ntoq jatz tpa'n il lu, in oq'xi' ex mejli twitzu' tja Dyos, ex ate'toq jun k'loj aj Israel, ichan, qya ex k'wal, inxi'xtoq che oq' b'a'nxi'x, eb'jo'kten ttx'ukyile. 2Atzunte Sekaniy, tk'wal Jeyel ex tyajajil Elam, yolin ex xitma'n te Esdras: Matxi' qo b'inchan ile' twitz Qman Dyos, qu'n maqo mjeye' kyuk'i'l qya najchaq xjal, te nimaqtnam nimalqe' kye txqantl dyos; maskyetzun ikju', atixnate' q'uqb'ab'l kyk'u'j aj Israel ja'lo. 3Qtziyanxe' twitz Qman Dyos tu'n kyex qxla'ja'ne' qxu'jile' najchaq xjalqe' kyuk'i'lxi' kyal, ex tu'n tjapunju' kawb'il, kse'nxju' ntzajkyma'ne' kyuk'i'lju' nkub' kyb'i'n tchaq'b'il Qman Dyos qeye'. 4Iq'i'nktz tib'a, qu'n taq'unteju'ya lu tu'n tb'inchanteya, qo onilqe' tuk'i'la. Kuwsam tib'a ex tzyunkju'ya aq'untl, chij te.
5Kub'tzun we' Esdras, ex tb'incha tu'n kymanteju' kynejel pale ex kynejel aj Leb'i, ex kykyaqil aj Israel, jun kyol ax tu'n tjapun kyu'n; xikytziyatzuntz. 6Etztzun Esdras toj tja Dyos ex xi' tja Joanan, tk'wal Elyasib', ja exa' qonik'an tu'n, mixti'x wan ex mixti'x k'wan, qu'n intoq b'isun tu'n tpaj kypi'silju' eb'ju'l jumajtl Jerusalen.
7Yajxi'tzuntl ex tqanil toj Juda ex Jerusalen, tu'n kyb'u'yinte kyib'ju' eb'ju'l jumajtl. 8Alkyetzunte min xpon toj toxi'n q'ij, kse'nxju' kyej b'entti'j kyu'n nejenel ex q'ol nab'l, k'elil iq'i'nju' ti'xti' te ex k'elex xlajet kyxolju' eb'ju'l jumajtl. 9Qu'mtzun kykyaqilju' xjal kyyajajil Juda ex B'enjamin b'aj kyb'u'yi'n kyib' toj Jerusalen toj winqi'n tajlalju' tb'lejoji'n xjaw, mujqa, tej tb'aju' oxe' q'ij. Kykyaqilju' xjal lu eb'ajkub' qe twitzju' tja Dyos, intoq che lu'lun tu'n tpaju' atitoq tu'n tb'inchet ex tu'nju' jb'al intoq kub': 10Kub'tzun we' Esdras, ju' pale, ex tma:
—Mache b'inchan ile' tu'nju' ẍe mjeye' kyuk'i'lju' qya najchaq xjal, iktzu'n xchmeta' kyil aj Israel kyu'ne'. 11Qu'mtzun ja'lo, twitzku' Qman Dyos, kyq'onke' kyi'je' qa aye'ye' ati kypaje' ex kyb'inchame' tajb'il Qman Dyos. Kypamilkyib'e' kyi'ju' xjal b'inchal taq'wix ex kyi'ju' kyxu'jile' najchaq xjal, chi Esdras.
12Kykyaqiltzu'n xjal jawkyma'n kuw:
—Okyi, kqb'incha'qeye' saj tma'na qeye'. 13Naq o'kx nim qb'aje', ex lay we'ju' jb'al lwiy; expe' lay qokyaj we'ye' toj b'e, qu'n mya naq te jun q'iju' lu mujqa kab'e' q'ij, qu'n nim qb'aje' xb'inchanteju' il lu. 14Ate b'a'nju' tu'n kykyajtenju' qnejele' tza'lu yolil qi'je', kykyaqiltzu'n najlqe' kyoju' nimaqqtaname' e'mje kyuk'i'lu' qya najchaq xjal b'a'n kyul toj jun q'ij aj kytxkonjtz, k'le'nqe' kyu'n ajb'el toj kawb'il ex ajkawil te ninkytanam, tzmax ajtik' ttx'u'jil Qman Dyos qi'je' tu'n tpaju' lu, chechij.
15-16B'a'n ela' toj kywitz kykyaqilju' eb'ju'l jumajtl tu'n kyb'inchante ikju', naq o'kx Jonatan, tk'wal Asael, ex Jaasiy, tk'wal Tikb'a, min kub' toj kywitz, o'ni'nqe' kyu'n Mesulam ex Sab'tay aj Leb'i. Ejawtzun t-sk'o'n Esdras, ju' pale, jte xjal, nejenelqe'toq kyxolu' toj kyja ex aku' okq'onkye, tojtzun tnejel q'ij teju' tlajoji'n xjaw, b'ent jun k'loj kawil kyu'n kykyaqilju' eb'jaw sk'on tu'n tb'aj kyka'yi'n atl junjun b'inchb'en. 17Tojtzu'n tnejel q'ij teju' tnejel xjaw b'je'lpun b'aj tnuk'li kyb'inchb'aju' ichan e'mje kyuk'i'lju' qya najchaq xjal.
18Aye' pale ja'lu e'elyal mjeb'niqe'toq kyuk'i'l qya najchaq xjal:
Kyxol tyajajil Joswe, a tk'wal Josadak, ex kyxolu' kywitze'l: aye' Maasiy, Elyeser, Jarib' ex Wedaliy, 19kytziya axxi'x tu'n tkub' kypa'n kyib' kyuk'i'lju' kyxu'jil ex tzaj kyiq'i'n jun rit te chojb'il tu'n tpaju' kyil.
20Kyxol tyajajil Imer: aye' Anani ex Seb'adiy.
21Kyxol tyajajil Arim: aye' Maaseyiy, Eliy, Semayiy, Jeyel ex Osiy.
22Kyxol tyajajil Pasur: aye' Elyoenay, Maaseyiy, Ismael, Natanael, Josab'ad ex Elasa.
23Kyxol kyyajajil aj Leb'i: aye' Josab'ad, Simi, Kyelayiy (mujqa kyelita), Petayiy, Juda ex Elyeser.
24Kyxol aj b'itzal: a Elyasib'.
Kyxol xq'uqil ttzija: aye' Salum, Telem ex Uri.
25Aye'tzu'n txqantl aj Israel ikxtoq te'qe'ju', aye' ja'lu:
Kyxol tyajajil Paros: Ramiy, Jesiy, Malkyiy, Mijamin, Eleasar, Malkyiy ex B'enayiy.
26Kyxol tyajajil Elam: aye' Mataniy, Sakariy, Jeyel, Ab'di, Jeremot ex Eliy.
27Kyxol tyajajil Satu: aye' Elyoenay, Elyasib', Mataniy, Jeremot, Sab'ad ex Asisa.
28Kyxol tyajajil B'eb'ay: aye' Joanan, Ananiy, Sab'ay ex Atlay.
29Kyxol tyajajil B'ani: aye' Mesulam, Maluk, Adayiy, Jasub', Seal ex Ramot.
30Kyxol tyajajil Paat-moab': aye' Adna, Kyelal, B'enayiy, Maaseyiy, Mataniy, B'esalel, B'inuy ex Manases.
31Kyxol tyajajil Arim: aye' Elyeser, Isyiy, Malkyiy, Semayiy, Simeon, 32B'enjamin, Maluk ex Semariy.
33Kyxol tyajajil Asum: aye' matenay, Matata, Sab'ad, Elipelet, Jeremay, Manases ex Simi.
34Kyxol tyajajil B'ani: aye' Maday, Amram, Wel, 35B'enayiy, B'ediy, Kyeluu, 36B'aniy, Meremot, Elyasib', 37Mataniy, Matenay, Jaasay.
38Kyxol tyajajil B'inuy: aye' Simi, 39Selemiy, Natan Adayiy, 40Maknadb'ay, Sasay, Saray, 41Asarel, Selemiy, Semariy, 42Salum, Amariy ex Jse.
43Kyxol tyajajil Neb'o: aye' Jeyel, Matatiy, Sab'ad, Seb'ina, Jadaw, Joel ex B'enayiy.
44Kykyaqil ja'lu ojetoq che mje kyuk'i'l qya najchaq xjal, ex b'ajkub' kypa'n kyib' kyuk'i'l ex eb'ajx kylipb'a'nju' kyal kyi'j.
Currently Selected:
Esd 10: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999